မြန်မာ-အိန္ဒိယ နယ်စပ်ကုန်သွယ်ရေးအတွက် အရေးပါသည့် စစ်ကိုင်းတိုင်းဒေသကြီး၊ ကလေး-တမူး လမ်းပိုင်းပေါ်ရှိ ခါမ်းပါတ်မြို့ကို စစ်ကောင်စီတပ်များက ယနေ့ (ဇွန် ၂၀ ရက်) တွင် ပြန်လည်ထိန်းချုပ်လိုက်ကြောင်း ဒေသတွင်း သတင်းရင်းမြစ်များထံက သိရသည်။
နယ်စပ်ကုန်သွယ်ရေး၏ အသက်သွေးကြောဖြစ်သော ကလေး-တမူး လမ်းမကြီးကို ပြန်လည်စိုးမိုးရန်အတွက် စစ်ကောင်စီတပ်သည် ပြီးခဲ့သည့် ဇွန်လ ၇ ရက်နေ့ကစတင်ကာ ကလေးမြို့ဘက်မှတစ်ကြောင်း၊ တမူးမြို့ဘက်မှတစ်ကြောင်း စစ်ကြောင်းခွဲ၍ စစ်ဆင်ရေးတစ်ရပ် ဖော်ဆောင်ခဲ့ကာ ယနေ့တွင် ပြန်လည်ထိန်းချုပ်လိုက်ခြင်းဖြစ်သည်။
“သူတို့ (စစ်ကောင်စီတပ်) က ကလေးဘက်ကော တမူးဘက်ကော ညှပ်ပြီး စစ်ကြောင်းထိုးလာတာ။ မြို့ထဲကိုတော့ သူတို့ ပြန်ဝင်သွားပြီ။ လောလောဆယ် မြို့တွင်းရော ပတ်ဝန်းကျင်မှာရော မိုင်းရှင်းတာတို့ နယ်မြေရှင်းတာတို့ လုပ်နေတယ်လို့ ကြားရတယ်။ ဒါပေမဲ့ ဒေသခံတွေအတွက်ကတော့ ကုန်သွယ်ရေး ပြန်ပွင့်မလားဆိုတာထက် စစ်ကောင်စီတပ်တွေ မြို့ထဲပြန်ဝင်လာတော့ နောက်ဆက်တွဲ ဖမ်းဆီးတာတွေ၊ စစ်ဆေးတာတွေ ပိုကြမ်းလာမှာကိုပဲ ရင်တထိတ်ထိတ်နဲ့ စိုးရိမ်နေရတယ်” ဟု ၎င်းက ဆိုသည်။
စစ်ကောင်စီတပ်၏ ထိုးစစ်ဆင်မှုကြောင့် တော်လှန်ရေးလက်နက်ကိုင်အဖွဲ့ဝင်များ ဆုတ်ခွာသွားခဲ့ပြီးနောက် လက်ရှိတွင် စစ်ကောင်စီတပ်က မြို့တွင်းနှင့် ပတ်ဝန်းကျင်ဒေသများ၌ နယ်မြေရှင်းလင်းရေးနှင့် လုံခြုံရေးယူခြင်းများကို လုပ်ဆောင်နေသည်။
“သူတို့က ကုန်သွယ်ရေးလမ်းကြောင်းကို ပြန်ရချင်လို့ ကလေးကော တမူးကော ညှပ်ပြီး အင်အားအလုံးအရင်းနဲ့ စစ်ကြောင်းထိုးလာတာ။ စစ်ရေးအရ အထိအခိုက်နည်းအောင် ကျွန်တော်တို့ဘက်က ယာယီဆုတ်ခွာပေးလိုက်ပေမဲ့ ဒါဟာ သူတို့ လုံးဝအပိုင်ရသွားတာမျိုး မဟုတ်ပါဘူး။ ” ဟု ဒေသခံတော်လှန်ရေးရဲဘော်တစ်ဦးက ဆိုသည်။
အဆိုပါ စစ်ဆင်ရေးအတွင်း တမူးမြို့ဘက်မှ ဆင်းလာသည့် စစ်ကောင်စီစစ်ကြောင်းသည် ရန်လင်းဖိုင်ကျေးရွာအနီးသို့ ရောက်ရှိနေပြီး၊ ကလေးမြို့ဘက်မှ တက်လာသည့် စစ်ကြောင်းမှာမူ ၅ မိုင်ကျေးရွာ ဝန်းကျင်အထိ ရောက်ရှိကာ နယ်မြေစိုးမိုးရေး ဆက်လက်လုပ်ဆောင်နေကြောင်း ဒေသခံသတင်းရင်းမြစ်များက ဆိုသည်။
ခါမ်းပါတ်မြို့ကို ပြန်လည်ထိန်းချုပ်ပြီးနောက် စစ်ကောင်စီဘက်က ပျက်စီးနေသည့် အဆောက်အအုံများနှင့် လမ်း၊ တံတားများ ပြုပြင်ခြင်း၊ မိုင်းရှင်းလင်းခြင်းများကို လုပ်ဆောင်ကာ နယ်စပ်စီမံခန့်ခွဲရေးနှင့် ကုန်သွယ်ရေးလုပ်ငန်းများ ပြန်လည်စတင်ရန် ပြင်ဆင်နေကြောင်း သတင်းထွက်ပေါ်နေသည်။
ကလေး-တမူးလမ်းကြောင်းသည် မြန်မာ-အိန္ဒိယ နယ်စပ်ကုန်သွယ်ရေးအပြင် ဒေသခံပြည်သူများ၏ သွားလာရေး၊ ကျန်းမာရေး၊ ပညာရေးနှင့် အသက်မွေးဝမ်းကျောင်းများအတွက် အဓိကအားထားရသည့် လမ်းကြောင်းတစ်ခု ဖြစ်သည်။
စစ်ကောင်စီတပ်သည် ၎င်းတို့လက်လွှတ်ခဲ့ရသည့် ကလေး-တမူး လမ်းကြောင်းတစ်လျှောက်လုံးကို အပြည့်အဝ ပြန်လည်ထိန်းချုပ်နိုင်ရေးအတွက် လက်ရှိတွင်လည်း နယ်မြေစိုးမိုးရေးလုပ်ငန်းများကို ဆက်လက်တိုးမြှင့် လုပ်ဆောင်လျက်ရှိသည်။