ရှမ်းပြည်နယ် ပူးတွဲလှုပ်ရှားမှုကော်မတီ (SSJAC) က ဒေသတွင်း အုပ်ချုပ်ရေး၊ တရားစီရင်ရေး၊ ပညာရေးနှင့် ကျန်းမာရေးအပါအဝင် ပြည်သူ့ဝန်ဆောင်မှု လုပ်ငန်းများကို ခေတ်ကာလနှင့်အညီ ပိုမိုတိုးမြှင့် အားထုတ်လုပ်ဆောင်သွားမည်ဟု ယနေ့ ဇွန်လ ၆ ရက်တွင် ကျရောက်သည့် တည်ထောင်ခြင်း ၃၀ ပြည့် နှစ်ပတ်လည်နေ့၌ အထူးပြု ထုတ်ပြန်ကြေညာလိုက်သည်။
SSJAC ၏ ယနေ့ထုတ်ပြန်ချက်တွင် လက်ရှိဖြစ်ပေါ်နေသော နိုင်ငံရေး၊ စစ်ရေး အကျပ်အတည်းများကြားမှ ပြည်သူလူထု၏ အကျိုးစီးပွားကို မြှင့်တင်ရန်အတွက် အုပ်ချုပ်ရေးနှင့် တရားစီရင်ရေးကဲ့သို့သော မဏ္ဍိုင်ကြီးများကိုပါ မိမိတို့ကိုယ်ပိုင် ယန္တရားဖြင့် တိုးမြှင့်ဆောင်ရွက်သွားမည်ဟု ဆိုထားသည်။
ယင်းလုပ်ရပ်သည် မင်းအောင်လှိုင်တို့ အာဏာရှင်စစ်အုပ်စု၏ တရားမဝင် အုပ်ချုပ်ရေး အာဏာစက်နှင့် စစ်အာဏာရှင်စနစ်ကို မြေပြင်တွင် ပြတ်ပြတ်သားသား စိန်ခေါ်လိုက်ခြင်းဖြစ်ကြောင်း လေ့လာသူများက သုံးသပ်သည်။
စစ်ခေါင်းဆောင် မင်းအောင်လှိုင်က ရှမ်းပြည်နယ်အတွင်း စစ်အာဏာရှင်စနစ် သက်ဆိုးရှည်ရေးနှင့် နယ်မြေစိုးမိုးရေးအတွက် နည်းမျိုးစုံဖြင့် ကြိုးပမ်းနေချိန်ဖြစ်သည်။
အဆိုပါ ရှမ်းပြည်နယ် ပူးတွဲလှုပ်ရှားမှုကော်မတီ (SSJAC) ကို လွန်ခဲ့သည့် ၁၉၉၆ ခုနှစ် ဇွန်လ ၆ ရက်နေ့တွင် ရှမ်းပြည်နယ် ငြိမ်းချမ်းရေးကောင်စီ (SSPC) နှင့် ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) တို့က နိုင်ငံရေးမဟာမိတ်အဖြစ် စတင်တည်ထောင်ခဲ့ခြင်း ဖြစ်သည်။
ဆယ်စုနှစ် ၃ ခုနီးပါး နိုင်ငံရေး၊ စစ်ရေးအရ အနိမ့်အမြင့် အမျိုးမျိုးကို ဖြတ်သန်းခဲ့ရသော်လည်း ရှမ်းအမျိုးသားညီညွတ်ရေး၊ ရှမ်းပြည်နယ်ညီညွတ်ရေးနှင့် ဖက်ဒရယ်ပြည်ထောင်စု ညီညွတ်ရေးမူများကို အစဉ်တစိုက် ဆုပ်ကိုင်ထားခဲ့ကြောင်း ဖော်ပြထားသည်။
လက်ရှိတွင် မင်းအောင်လှိုင် ဦးဆောင်သည့် စစ်တပ်သည် ရှမ်းပြည်နယ်အတွင်းရှိ တိုင်းရင်းသား လက်နက်ကိုင်တပ်ဖွဲ့များနှင့် တော်လှန်ရေးအင်အားစုများအကြား သွေးခွဲသပ်လျှိုခြင်း၊ နိုင်ငံရေးဆွေးနွေးပွဲများဖြင့် အချိန်ဆွဲခြင်းနှင့် ပြည်သူလူထု၏ အသက်အိုးအိမ်စည်းစိမ်များကို ဖိနှိပ်ချုပ်ချယ်ခြင်းများ ဆက်တိုက်လုပ်ဆောင်လျက်ရှိသည်။
စစ်အုပ်စု၏ ယင်းလုပ်ရပ်များနှင့် ဆန့်ကျင်ဘက်အဖြစ် SSJAC အနေဖြင့် ဖက်ဒရယ်ဒီမိုကရေစီအင်အားစုများနှင့် ပူးပေါင်းကာ (က) အာဏာရှင်စနစ် အမြစ်ပြတ်ရေး၊ (ခ) အရပ်သားအုပ်ချုပ်ရေး အထွတ်အထိပ်ဖြစ်စေရေး၊ (ဂ) ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးနှင့် (ဃ) အရပ်သားအစိုးရတစ်ရပ် ပေါ်ထွန်းလာရေး စသည့် အဓိကဦးတည်ချက် ၄ ရပ်ကို ဆက်လက်အကောင်အထည်ဖော်သွားမည်ဟု ကတိပြုထားသည်။
နိုင်ငံရေးလေ့လာသုံးသပ်သူများ၏ အဆိုအရ စစ်အုပ်စုက ၎င်းတို့၏ စစ်အာဏာရှင်စနစ်အောက်တွင် တရားစီရင်ရေးနှင့် အုပ်ချုပ်ရေးကို လက်ဝါးကြီးအုပ်ကာ ပြည်သူလူထုအား ဖိနှိပ်ရန် ကြိုးပမ်းနေသည့် အချိန်အခါမျိုးတွင်၊ ရှမ်းပြည်နယ်၏ သြဇာရှိ မဟာမိတ်အဖွဲ့အစည်းဖြစ်သော SSJAC က ယခုကဲ့သို့ ကိုယ်ပိုင် အုပ်ချုပ်ရေးနှင့် တရားစီရင်ရေးဆိုင်ရာ ဝန်ဆောင်မှုများကို ခေတ်ကာလနှင့်အညီ အရှိန်အဟုန်မြှင့်လုပ်ဆောင်မည်ဟု ကြေညာချက်ထုတ်ပြန်လာခြင်းသည် မြေပြင်တွင် စစ်တပ်၏ တရားဝင်မှုကို လုံးဝပယ်ဖျက်ပြီး ဖက်ဒရယ်ဒီမိုကရေစီ စနစ်ဆီသို့ ပြည်သူလူထုနှင့်အတူ တက်လှမ်းရန် ခြေလှမ်းပြင်လိုက်ခြင်းဖြစ်ကြောင်း သိရသည်။