By MPA
မုံရွာမြို့နယ် ပြည်သူ့လုံခြုံရေးရေးအဖွဲ့(ပလဖ) စခန်းကို NUG တပ်ရင်းများ ဝင်ရောက်စီးနင်းရာမှ ပစ်ခတ်မှုဖြစ်ပွားပြီး မြို့နယ် ပလဖတာဝန်ခံ အာကူးအပါအဝင် ခြောက်ဦး သေဆုံးခဲ့ကြောင်း မြေပြင်သတင်းရင်းမြစ်များထံမှ စုံစမ်းသိရှိရသည်။
အဆိုပါ စီးနင်းမှုကို အမျိုးသားညီညွတ်ရေးအစိုးရ (NUG)၊ မုံရွာခရိုင်တပ်ရင်းများဖြစ်ကြသည့် တပ်ရင်း (၂၂)၊ (၂၃)၊ (၂၄)၊ (၂၅) နှင့် (၂၈) စသည့် တပ်ရင်း ၅ ရင်း ပူးပေါင်း၍ လုပ်ဆောင်ခဲ့ခြင်းဖြစ်သည်။
“မနေ့ကညက ဖြစ်တာ၊ အောင်သာရွာမှာဖြစ်တာပါ။ ဘာကြောင့် စီးနင်းတယ်ဆိုတာတော့ သေချာမသိရဘူး။ တော်လှန်ရေးအဖွဲ့အချင်းအချင်း အခုလိုဖြစ်တာ အတော်ကို အကျဉ်းတန်ပါတယ်ဗျာ။ ကိုအာကူးကျသွားတယ်လို့ပါကြားတယ်” မုံရွာမြို့အတွင်းရှိ တော်လှန်ရေးရဲဘော်တစ်ဦးက မှတ်ချက်ပြုသည်။
စီးနင်းမှုအတွင်း မြို့နယ်ပလဖစခန်းမှ ရဲဘော် ၃ ဦး သေဆုံးခဲ့ပြီး၊ တိုက်နယ် (၄) ပလဖအချုပ်ထောင်မှ အချုပ်သားတစ်ဦးလည်း သေဆုံးခဲ့ကြောင်း သိရသည်။
ယခုကဲ့သို့ ပလဖအဖွဲ့များကို စီးနင်းစဉ် စားသောက်ဆိုင်တစ်ခုတွင် ရောက်ရှိနေသည့် ပလဖအဖွဲ့ဝင်အချို့ကို ပစ်ခတ်စဉ် အနီးအနားတွင် ထိုင်နေသည့် အရပ်သား အမျိုးသားနှစ်ဦးပါ ကျည်ထိမှန်ကာသေဆုံးခဲ့ရကြောင်းသိရသည်။
ယခုဖြစ်စဉ်နှင့် ပတ်သက်ပြီး မုံရွာမြို့နယ် ပလဖအဖွဲ့ Facebook Page သို့ဆက်သွယ်မေးမြန်းထားသော်လည်း ပြန်လည်ဖြေကြားမှုမရှိသေးပေ။