ချစ်သူမိန်းကလေးအား နိုင်ငံတွင် ဆက်လက်နေထိုင်ခွင့် သက်တမ်းတိုးပေးရန်အတွက် အိမ်အကူအဖြစ် သူဌေးအမည်ခံငှားရမ်းခဲ့သော စင်္ကာပူ အမျိုးသားတစ်ဦးကို အောက်တိုဘာ ၁၃ ရက်တွင် ထောင်ဒဏ် သုံးပတ် ချမှတ်လိုက်သည်။
အသက် ၄၅ နှစ်အရွယ် စင်္ကာပူနိုင်ငံသား ဖိုင်ဇယ်လ် ဖာရစ်ဒ် သည် နိုင်ငံခြားလုပ်သားများ အလုပ်အကိုင်ဆိုင်ရာ အက်ဥပဒေ (Employment of Foreign Manpower Act) အရ အစိုးရဌာနသို့ လိမ်လည်ထုတ်ပြန်ချက် ပေးခဲ့မှုဖြင့် စွဲချက်တစ်ရပ်ကို ဝန်ခံခဲ့သည်။
သူ၏ ချစ်သူအား တရားဝင် အလုပ်လုပ်ခွင့်ပါမစ်မရှိဘဲ ကိုယ်ပိုင်အလုပ်လုပ်ကိုင်သူ နိုင်ငံခြားသားအဖြစ် ပံ့ပိုးကူညီမှုနှင့် သက်ဆိုင်သည့် အချိန်ပိုင်း ကလေးထိန်းအဖြစ် လုပ်ကိုင်ခွင့်ပြုခဲ့မှု ဖြင့်လည်း ထပ်မံစွဲချက်တင်ခံထားရသည်။
တရားရုံး၏ စစ်ဆေးကြားနာချက်များအရ ဖိုင်ဇယ်လ်သည် လက်ရှိအသက် ၃၇ နှစ်ရှိ ဖိလစ်ပိုင်နိုင်ငံသူ ဆိုတို ဂျဲနီ ဗီလာရွန် နှင့် ၂၀၂၁ ခုနှစ်တွင် ချစ်ကြိုက်ခဲ့ကြောင်း သိရသည်။ ထိုအချိန်က ဂျဲနီသည် တရားဝင် ပါမစ်ဖြင့် ရွှေ့ပြောင်းအိမ်တွင်းအကူအဖြစ် လုပ်ကိုင်နေသူ ဖြစ်သည်။
၂၀၂၄ ခုနှစ် ဖေဖော်ဝါရီလ အစောပိုင်းတွင် ဂျဲနီကို သူမ၏ အလုပ်ရှင်က အလုပ်ထုတ်တော့မည်ဖြစ်ကြောင်း ဖိုင်ဇယ်လ်အား ပြောပြခဲ့ပြီး၊ စင်္ကာပူတွင် ဆက်လက်နေထိုင်နိုင်ရန်အတွက် ဖိုင်ဇယ်လ်အား သူဌေးအမည်ခံပေးရန် တောင်းဆိုခဲ့သည်။
ဖိုင်ဇယ်လ်သည် ၂၀၂၄ ခုနှစ် ဖေဖော်ဝါရီ ၂၈ ရက်နေ့တွင် သဘောတူခဲ့ပြီး အိမ်အကူအတွက် အလုပ်ပါမစ်လျှောက်လွှာကို အစိုးရအလုပ်ပါမစ်ထိန်းချုပ်သူထံ တင်သွင်းခဲ့သည်။ ၎င်းသည် ဂျဲနီအား အိမ်အကူအဖြစ် ငှားရမ်းရန် ရည်ရွယ်ချက်မရှိသော်လည်း လျှောက်လွှာတွင် မိမိ၏ အိမ်အကူအဖြစ် အလုပ်ခန့်မည် ဖြစ်ကြောင်း လိမ်လည်ကြေညာခဲ့သည်။
၂၀၂၄ ခုနှစ် မတ်လ ၉ ရက်နေ့တွင် ဂျဲနီသည် တရားဝင်အလုပ်ပါမစ် ရရှိခဲ့သည်။
ရှေ့နေ၏ ပြောကြားချက်အရ ၂၀၂၄ ခုနှစ် မတ်လ အစောပိုင်းမှ အဆိုပါနှစ် ဇူလိုင်လ အစောပိုင်းအထိ ၄လနီးပါးကာလအတွင်း ဂျဲနီသည် ဖိုင်ဇယ်လ်၏ နေအိမ်တွင် ချစ်သူအဖြစ် တစ်ပတ်လျှင် ၄ညမှ ၅ညအထိ လာရောက်နေထိုင်ခဲ့ပြီး ၎င်း၏ နေအိမ်တွင် မည်သည့်အိမ်အကူ တာဝန်များကိုမျှ လုပ်ဆောင်ရခြင်း မရှိခဲ့ပေ။
ယင်းအစား ဂျဲနီသည် အခြားတစ်နေရာ၌ ကလေးထိန်းအဖြစ် သွားရောက်လုပ်ကိုင်ခဲ့ပြီး၊ တစ်ပတ်လျှင် ၂ညမှ ၃ညအထိ ထိုနေရာတွင် နေထိုင်ခဲ့သည်။ ဖိုင်ဇယ်လ်သည် ယင်းကိစ္စကို သိရှိသော်လည်း ၎င်း၏ အမည်ဖြင့် အလုပ်ပါမစ်ကို ဆက်လက်ထားရှိစေကာ ကလေးထိန်းအဖြစ် လုပ်ကိုင်နိုင်ရန် သဘောတူခွင့်ပြုခြင်းဖြင့် အလိုတူအလိုပါ ကူညီပေးခဲ့ကြောင်း တရားရုံးက ဆုံးဖြတ်ခဲ့သည်။
အလုပ်သမားဝန်ကြီးဌာန ရှေ့နေက ဖိုင်ဇယ်လ်အား ထောင်ဒဏ် ၄ပတ် ချမှတ်ရန် တောင်းဆိုခဲ့သော်လည်း ဖိုင်ဇယ်လ်၏ ရှေ့နေများက ထောင်ဒဏ် ၂ပတ်သာ ချမှတ်ပေးရန် တောင်းဆိုခဲ့သည်။
သူ၏ ရှေ့နေက ဖိုင်ဇယ်လ်သည် ၂၀၀၈ ခုနှစ်မှစ၍ ကွာရှင်းထားပြီး ၎င်း၏ တစ်ဦးတည်းသော သားကို တစ်ဦးတည်း ပြုစုစောင့်ရှောက်နေရသူဖြစ်ကြောင်း ပြောကြားခဲ့သည်။
သူသည် ကိုဗစ်-၁၉ ကာလဖြစ်သည့် ၂၀၂၁ ခုနှစ်တွင် ဂျဲနီနှင့် ဆုံတွေ့ခဲ့ခြင်းဖြစ်ကြောင်းလည်း ရှေ့နေက ပြောသည်။
ဂျဲနီသည် အလိမ်အညာအစီအစဉ်တွင် ပါဝင်ခဲ့ခြင်းအတွက် စက်တင်ဘာလ ၁ ရက်နေ့တွင် ထောင်ဒဏ် ၃ပတ် ချမှတ်ခြင်း ခံခဲ့ရသည်။
ဖိုင်ဇယ်လ်သည် ၎င်း၏ အမှားအတွက် “မည်သည့် ဆင်ခြေမျှ မပေးလို” ကြောင်း ပြောသော်လည်း၊ ယင်းအကြံကို ဂျဲနီက အရင်ဆုံး အကြံပြုခဲ့ခြင်းဖြစ်ပြီး ဖိုင်ဇယ်လ်က ပထမတွင် ငြင်းပယ်ခဲ့ကြောင်း ပြောကြားခဲ့သည်။ သို့ရာတွင် ဂျဲနီက ထပ်မံတောင်းပန်သောကြောင့် စိတ်မပါသော်လည်း သဘောတူခဲ့ရသည်ဟု ဆိုသည်။
ဂျဲနီသည် ဖိုင်ဇယ်လ်၏ နေအိမ်တွင် အိမ်မှုကိစ္စများ လုပ်ကိုင်ပေးခဲ့သော်လည်း ယင်းသည် ချစ်သူတစ်ဦးအနေဖြင့်သာ လုပ်ကိုင်ပေးခြင်းဖြစ်ပြီး အိမ်အကူ တာဝန်ဖြင့် လုပ်ဆောင်ခြင်း မဟုတ်ကြောင်း ရှေ့နေက ပြောသည်။
ထို့ပြင် ဖိုင်ဇယ်လ်သည် ဂျဲနီ၏ အလုပ်ပါမစ် ပယ်ဖျက်သည်အထိ လိုအပ်သော အခွန်အခများကို ပေးဆောင်ခဲ့ပြီး၊ ဂျဲနီအား တစ်လလျှင် စင်္ကာပူဒေါ်လာ ၇၀၀ (အမေရိကန်ဒေါ်လာ ၅၄၀) ပေးခဲ့ကြောင်းနှင့် တစ်ခါတစ်ရံ ပို၍ ပေးခဲ့ကြောင်း ဖိုင်ဇယ်လ်၏ ရှေ့နေကပြောသည်။
အမှုသည်သည် “လောဘကြောင့် သို့မဟုတ် အမြတ်ထုတ်လိုသည့် ရည်ရွယ်ချက်ကြောင့် မဟုတ်ဘဲ၊ ချစ်ရသူတစ်ဦးကို ကူညီလိုသည့် မှားယွင်းသော ဆန္ဒကြောင့်” လုပ်မိခဲ့ခြင်းဖြစ်ကြောင်း ရှေ့နေက ဆိုသည်။
ယခုအမှု အကျိုးဆက်များသည် ဖိုင်ဇယ်လ်၏ ဘဝအပေါ် “ပြင်းထန်စွာ ထိခိုက်စေခဲ့ပြီး”၊ ဂျဲနီသည် ထောင်ဒဏ်ကျခံပြီးနောက် စင်္ကာပူသို့ ပြန်လည်ဝင်ရောက်ခွင့် ရတော့မည် မဟုတ်သောကြောင့် ၎င်းတို့ တရားဝင် ပေါင်းသင်းရန် ရည်ရွယ်ခဲ့သည့် ဆက်ဆံရေးကို “အဆုံးသတ်စေနိုင်ဖွယ်ရှိသည်” ဟု ရှေ့နေက ပြောကြားခဲ့သည်။
ဂျဲနီသည် ပြစ်မှု၏ မူလကြံစည်သူ ဖြစ်ပြီး ကလေးထိန်းအလုပ်မှ ငွေကြေးအကျိုးအမြတ် ရရှိခဲ့သော်လည်း ဖိုင်ဇယ်လ်မှာ မည်သည့် ငွေကြေးအကျိုးအမြတ်မှ မရရှိခဲ့ကြောင်း ရှေ့နေက တင်ပြခဲ့သည်။
တရားသူကြီးက ဂျဲနီကို ချမှတ်ခဲ့သော ထောင်ဒဏ် ၃ပတ်ကို ထောက်ရှု၍ ဖိုင်ဇယ်လ်အား အနည်းဆုံး ထောင်ဒဏ် ၃ပတ် ချမှတ်သင့်ကြောင်း ဆုံးဖြတ်ခဲ့သည်။