မန္တလေးတိုင်း၊ ငါန်းဇွန်မြို့နယ်၊ မြို့သာရဲစခန်းမှ အရက်ဝယ်ထွက်လာသည့် စစ်အုပ်စုဝင်များ ပစ်ခတ်ခံရပြီး ၂ဦး ပွဲချင်းပြီး သေဆုံးခဲ့ကြောင်းသိရသည်။
နိုဝင်ဘာ ၄ရက်၊ နံနက် ၁၁နာရီ ၂၄မိနစ်ခန့်တွင် မြို့သာရဲစခန်းမှ မြို့သာဈေးမြောက်ဘက်လမ်း အတိုင်း အရက်ဝယ်ထွက်လာသည့် စစ်အုပ်စုဝင် ၃ဦးကို ပစ်ခတ်တိုက်ခိုက်ခဲ့ကြောင်း Special Task Force Ngazun အဖွဲ့က သတင်းထုတ်ပြန်သည်။
” မြို့သာရဲစခန်းထွက်လာတာဗျ။ အရပ်ဝတ်နဲ့လာတာဗျ။ ရဲစခန်းနဲ့ မီတာ ၂၀၀လောက်မှာ စျေးဘက်မှာတော့ သူတို့ကင်းပုန်းတွေရှိတယ်။ အဲ့ကြားထဲကနေတိုက်ခိုက်တာဗျ။ သူတို့နဲ့ မီတာ ၂၀အကွာမှာတီးလိုက်တာဗျ” ဟု Special Task Force အဖွဲ့တာဝန်ခံက MPA သို့ပြောသာ်။
ယင်းတိုက်ခိုက်မှုကြောင့် ဒဏ်ရာရရှိသူမှာ ထွက်ပြေးလွတ်မြောက်သွားကြောင်း သိရသည်။
” လက်နက်ကတော့မရဘူးဗျ။ တစ်ယောက်လွတ်သွားလို့။ ၃ယောက်လာ၊ ၂ယောက်အဲ့နားတင်ကျသွားတာ” ဟု ၎င်းက ဆက်လက်ပြောသည်။
ယင်းသို့တိုက်ခိုက်ပြီးနောက် မြို့သာဈေးပတ်လည်တွင် ကင်းပုန်းဝပ်နေသည့် စစ်အုပ်စုများက ပြန်လည်ပစ်ခတ်ခြင်း၊ မြို့သာရဲစခန်းအတွင်းမှ လက်နက်ကြီးပစ်ခတ်ခြင်းနှင့် ဒရုန်းဖြင့် ဗုံးကြဲခြင်းတို့ ပြုလုပ်ခဲ့သော်လည်း PDF ရဲဘော်များ အထိခိုက်မရှိပြန်လည်ဆုတ်ခွာနိုင်ခဲ့ကြောင်းသိရသည်။
စစ်အုပ်စုဝင်များ ထိခိုက်၊ သေဆုံးမှုကို MPA အနေနှင့် သီးခြားအတည်မပြုနိုင်ပေ။