အမျိုးသားများ၏ သုက်ပိုး လှုပ်ရှားနိုင်စွမ်းကို မြှင့်တင်ပေးနိုင်သည့် လိမ်းဆေးတစ်မျိုးကို တရုတ်သုတေသီများက တီထွင်နိုင်ခဲ့ရာ၊ ကမ္ဘာပေါ်တွင် အမျိုးသား၏ မျိုးပွားနိုင်စွမ်း ပြဿနာ အကျပ်အတည်းကို ဖြေရှင်းရာတွင် အထောက်အကူဖြစ်စေမည်ဟု Independent သတင်းဌာန က ဖော်ပြထားသည်။
လွန်ခဲ့သော ဆယ်စုနှစ် ငါးခုအတွင်း ကမ္ဘာတစ်ဝန်းလုံးရှိ အမျိုးသားများ၏ မျိုးပွားနိုင်စွမ်း ကျဆင်းလာခဲ့ပြီး၊ အမျိုးသားများသည် သုက်ပိုးပုံသဏ္ဌာန် မူမမှန်မှုများအပြင် သုက်ပိုးဆဲလ် အရေအတွက်နှင့် ရွေ့လျားနိုင်စွမ်း လျော့နည်းခြင်းတို့ကို ကြုံတွေ့နေရသည်။
ပြီးခဲ့သည့်နှစ်က ထုတ်ဝေခဲ့သော လေ့လာမှုတစ်ခုတွင် မြောက်အမေရိက၊ ဥရောပနှင့် သြစတြေးလျရှိ အမျိုးသားများအကြား သုက်ပိုးအရေအတွက်သည် ၂၀၀၀ ပြည့်နှစ်နောက်ပိုင်းတွင် “စိုးရိမ်ဖွယ်ရာ” ကျဆင်းသွားခဲ့ပြီး၊ ၎င်းသည် နေထိုင်မှုပုံစံ ရွေးချယ်မှုများနှင့် ပတ်ဝန်းကျင်ရှိ ဓာတုပစ္စည်းများကြောင့်လည်း ပါဝင်ကြောင်း သတိပေးထားသည်။
ပန်းသေပန်းညှိုးခြင်းကဲ့သို့ သိသာထင်ရှားသော လက္ခဏာများကို အလွယ်တကူ သိနိုင်သော်လည်း၊ သုက်ပိုးအရည်အသွေး ကျဆင်းခြင်းကဲ့သို့သော အခြားပြဿနာများသည် သတိထားမိနိုင်သည့် ရောဂါလက္ခဏာများ မပေါ်ပေါက်မီတွင် ဖြစ်ပေါ်လာနိုင်သည်။
သုက်ပိုးအရည်အသွေး တိုးတက်စေရန်အတွက် အများဆုံး အကြံပြုထားသော ကုထုံးများတွင် ဆေးလိပ်ဖြတ်ခြင်းကဲ့သို့သော နေထိုင်မှုပုံစံ ပြောင်းလဲခြင်းများ ပါဝင်သကဲ့သို့၊ ခွဲစိတ်ပြုပြင်ခြင်း သို့မဟုတ် ဟော်မုန်းကုသမှုများကဲ့သို့သော ပိုမိုပြင်းထန်သည့် နည်းလမ်းများလည်း ပါဝင်သည်။
ယခုအခါ ဖူတန်တက္ကသိုလ် (Fudan University)၊ မျိုးပွားမှုနှင့် ဖွံ့ဖြိုးတိုးတက်ရေးဌာနမှ သိပ္ပံပညာရှင်များသည် သုက်ပိုးအရည်အသွေးကို မြှင့်တင်ရန်အတွက် လိမ်းရလွယ်ကူသော ဆေးရည်တစ်မျိုးကို တီထွင်လိုက်ကြခြင်းဖြစ်သည်။
ဝှေးစေ့ပေါ် အပြင်ဘက်မှ လိမ်းရသည့် အဆိုပါ လိမ်းဆေးရည်ကို တိရစ္ဆာန်များတွင် စမ်းသပ်အောင်မြင်ပြီး ဖြစ်ကြောင်း သိရသည်။
သုတေသီများက စမ်းသပ်ရာတွင် ကြွက်ထီးများကို အပူဒဏ်၊ မကပ်သော ပလတ်စတစ်အပေါ်ယံလွှာ PTFE (polytetrafluoroethylene) နှင့် ခဲကဲ့သို့သော သုက်ပိုးလှုပ်ရှားမှုကို လျော့နည်းစေသည်ဟု သိရှိထားသည့် အရာများနှင့် စတင်ထိတွေ့စေခဲ့သည်။
၎င်းတို့၏ သုက်ပိုးအရည်အသွေး ကျဆင်းသွားကြောင်း အတည်ပြုပြီးနောက်၊ ပုံမှန် သုက်ပိုးဖွဲ့စည်းပုံနှင့် လှုပ်ရှားမှုကို ထိန်းသိမ်းပေးနိုင်သည်ဟု သိရှိထားသော SKAP2 ပရိုတင်းဓာတ်ဖြင့် ပြုလုပ်ထားသည့် ဟိုက်ဒရိုဂျယ် (hydrogel) ကို ကြွက်များ၏ ဝှေးစေ့ပေါ်ရှိ အရေပြားပေါ်တွင် လိမ်းပေးလိုက်သည်။
အဆိုပါ ဂျယ်လ်ကို နို့မှရရှိသည့် ဘေးကင်းသော ဂျယ်လီနှင့်တူသည့် အမှုန်လေးများဖြင့် ပြုလုပ်ထားပြီး၊ ၎င်းတို့သည် SKAP2 ပရိုတင်းကို အရေပြားမှတစ်ဆင့် ဆဲလ်များအတွင်းသို့ သယ်ယူပေးသည်။
SKAP2 ပရိုတင်းသည် သုက်ပိုးအရည်အသွေးကို ပြုပြင်ရန် သို့မဟုတ် တိုးတက်စေရန် လိုအပ်သည့်နေရာသို့ တိုက်ရိုက်ရောက်ရှိစေရန် သုတေသီများက ထိုဂျယ်လ်ကို တီထွင်ခဲ့ခြင်း ဖြစ်သည်။
ဂျယ်လ်ကို တစ်လကြာ လိမ်းပေးပြီးနောက် သုတေသီများက ကြွက်များ၏ သုက်ပိုးလှုပ်ရှားမှုမှာ များစွာ တိုးတက်လာပြီး ပုံမှန်အဆင့်သို့ ပြန်လည်ရောက်ရှိလေ့ရှိကြောင်း တွေ့ရှိခဲ့ကြသည်။
“အမျိုးသား မျိုးပွားမှုဆိုင်ရာ ကျန်းမာရေးအတွက် ဆန်းသစ်သော ကြားဝင်ဆောင်ရွက်မှုအနေဖြင့် အဆိုပါဟိုက်ဒရိုဂျယ်လ် လိမ်းဆေးကို အသုံးပြုခြင်းသည် အလားအလာကောင်းများစွာ ရှိသည်” ဟု ၎င်းတို့က လေ့လာမှုတွင် ရေးသားခဲ့သည်။
အဆိုပါ လိမ်းဆေးရည်သည် သုက်ပိုးလှုပ်ရှားနိုင်စွမ်း လျော့ကျခြင်းအတွက် “ပထမဆုံးသော ပစ်မှတ်ထား ပြုပြင်ကုသသည့် နည်းဗျူဟာ” ဖြစ်သည်ဟုလည်း ၎င်းတို့၏ ထုတ်ပြန်ချက်တွင် ဖော်ပြထားသည်။
သိပ္ပံပညာရှင်များသည် သုက်ပိုးလှုပ်ရှားမှု နည်းပါးသည်ဟု ရောဂါရှာဖွေတွေ့ရှိထားသော အမျိုးသားများ၏ သုက်ရည်ပေါ်တွင်လည်း ဂျယ်လ်ကို စမ်းသပ်ခဲ့သည်။
ဂျယ်လ်ဖြင့် မွေးမြူပြီးနောက် ၎င်းတို့၏ သုက်ရည်နမူနာများသည် သိသိသာသာ ပိုမိုကောင်းမွန်သော သုက်ပိုးလှုပ်ရှားမှုနှင့် သက်ဝင်လှုပ်ရှားမှုတို့ကို တွေ့ရှိခဲ့ရသည်။
“သုက်ပိုးလှုပ်ရှားမှုနှင့် ပုံသဏ္ဌာန်ကို ပြန်လည်ကောင်းမွန်လာစေခြင်းဖြင့်၊ သဘာဝအတိုင်း ကိုယ်ဝန်ရရှိခြင်းနှင့် အကူအညီဖြင့် မျိုးပွားခြင်း နှစ်မျိုးစလုံးအတွက် အောင်မြင်မှုနှုန်းကို ပိုမို မြှင့်တင်ပေးနိုင်သည်” ဟုလည်း သိပ္ပံပညာရှင်များကပြောကြားခဲ့ သည်။