အစ္စရေးစစ်တပ်သည် အီရန်နိုင်ငံနှင့် စစ်ရေးအရ တင်းမာမှုများ မြင့်တက်ကာ တိုက်ခိုက်မှုများ ဖော်ဆောင်နေသည့်ကြားမှ ဂါဇာမြို့အတွင်းရှိ ပါလက်စတိုင်းသားများကို ဆက်လက်ဗုံးကြဲတိုက်ခိုက်ခဲ့ရာ သီးခြားတိုက်ခိုက်မှုနှစ်ခုအတွင်း မိန်းကလေးငယ်နှစ်ဦးအပါအဝင် လူ ၆ ဦး သေဆုံးသွားခဲ့သည်။
အဆိုပါတိုက်ခိုက်မှုများကို အစ္စရေးလေတပ်နှင့် တင့်ကားတပ်ဖွဲ့များက လုပ်ဆောင်ခဲ့ခြင်းဖြစ်ပြီး ဂါဇာမြို့ရှိ လူနေရပ်ကွက်များကို ပစ်မှတ်ထားခဲ့ခြင်းဖြစ်သည်။
လေကြောင်းမှ ဗုံးကြဲမှုနှင့် တင့်ကားများဖြင့် ပစ်ခတ်မှုကြောင့် အပြစ်မဲ့အရပ်သားများ ထိခိုက်သေဆုံးခဲ့ရကာ အဆောက် အဦအချို့လည်း ပျက်စီးခဲ့ရသည်။
သေဆုံးသူများထဲတွင် အကာအကွယ်မဲ့သည့် ကလေးငယ်များ ပါဝင်နေခြင်းကြောင့် အရပ်သားများအပေါ် အင်အားသုံးတိုက်ခိုက်မှုများနှင့် ပတ်သက်၍ လူ့အခွင့်အရေးအဖွဲ့များက ပြင်းပြင်းထန်ထန် ဝေဖန်လျက်ရှိသည်။
ဤတိုက်ခိုက်မှုသည် အစ္စရေးအနေဖြင့် ဒေသတွင်းစစ်မျက်နှာအနှံ့တွင် စစ်ရေးအရှိန်ကို လျှော့ချရန် ဆန္ဒမရှိကြောင်း ပြသနေခြင်းလည်း ဖြစ်သည်။
လက်ရှိတွင် အစ္စရေးသည် အီရန်နှင့် စစ်ပွဲ ရင်ဆိုင်နေရသော်လည်း ဂါဇာဒေသအပေါ် ထိုးစစ်ဆင်မှုများကို ရပ်တန့်ခြင်းမရှိဘဲ ဆက်လက်လုပ်ဆောင်နေခြင်းကြောင့် ဒေသတွင်း လူသားချင်းစာနာထောက်ထားမှုဆိုင်ရာ အကျပ်အတည်းများ ပိုမိုဆိုးရွားလာနေကြောင်း သိရသည်။