သမ္မတကြီး ဦးဝင်းမြင့်ကို အမျိုးသားညီညွတ်ရေးအစိုးရ (NUG) က လုပ်ကြံနိုင်သဖြင့် လုံခြုံရေးပေးထားရခြင်းဖြစ်သည်ဟု စစ်တပ်လော်ဘီများက တယ်လီဂရမ်ချန်နယ်များ၌ အောက်တန်းကျစွာ ဝါဒဖြန့်မှုများကို တွင်တွင်ကျယ်ကျယ်လုပ်ဆောင်လျက်ရှိသည်။
နိုင်ငံတော်သမ္မတကြီး ဦးဝင်းမြင့်၏ လုံခြုံရေးကို အကြောင်းပြ၍ စစ်တပ်လော်ဘီများဘက်မှ သတင်းအမှားများအား အစီအစဉ်ရှိရှိ ဖြန့်ဝေလာခြင်းသည် အလွန်အောက်တန်းကျသော လုပ်ရပ်ဖြစ်ကြောင်း ဝေဖန်မှုများ ကျယ်ကျယ်ပြန့်ပြန့် ထွက်ပေါ်နေသည်။
သမ္မတကြီးအား နေအိမ်အကျယ်ချုပ် ပုံစံမျိုးဖြင့် ဆက်လက်ထိန်းသိမ်းထားခြင်းကို တရားမျှတသည့် လုပ်ရပ်ဖြစ်အောင် ဖန်တီးလိုသဖြင့် NUG က လုပ်ကြံသတ်ဖြတ်နိုင်သည်ဟူသော စွပ်စွဲချက်များဖြင့် ပြည်သူလူထုအား ထင်ယောင်ထင်မှား ဖြစ်စေရန် လုပ်ဆောင်နေခြင်း ဖြစ်သည်။
အဆိုပါ ဝါဒဖြန့်မှုသည် သမ္မတကြီးဦးဝင်းမြင့်အား လွတ်ငြိမ်းချမ်းသာခွင့် ပေးလိုက်ပြီဟု ကြေညာခဲ့သော်လည်း လက်တွေ့တွင်မူ နေအိမ်အကျယ်ချုပ်ဖြင့် ဆက်လက်ချုပ်ကိုင်ထားသည်ကို ဖုံးကွယ်ရန် အကြောင်းပြချက် ရှာဖွေနေခြင်း ဖြစ်သည်။
“လုံခြုံရေးကြောင့် စိုးရိမ်ရလို့ ထိန်းသိမ်းထားရတယ်ဆိုတဲ့စကားက အာဏာသိမ်းပြီးကတည်းက သုံးလာတဲ့ ရိုးအီနေတဲ့ နည်းဗျူဟာဟောင်းကြီးပါ။ အခုတော့ NUG ကို အသုံးချပြီး အကွက်ဆင်နေတာပဲ ဖြစ်ပါတယ်” ဟု စစ်တပ်ဝါဒဖြန့်ဝေမှုကို စောင့်ကြည့်နေသည့် လူငယ်တစ်ဦးက မှတ်ချက်ပြုသည်။
သမ္မတကြီးဦးဝင်းမြင့်နှင့် ဒေါ်အောင်ဆန်းစုကြည်တို့သည် ပြည်သူ့ဆန္ဒနှင့်အညီ ရွေးကောက်တင်မြှောက်ခံထားရသည့် စစ်မှန်သော ခေါင်းဆောင်များ ဖြစ်ကြပြီး NUG နှင့် CRPH ဆိုသည်မှာလည်း အဆိုပါ ခေါင်းဆောင်များ၏ လမ်းစဉ်အတိုင်း ပြည်သူ့ဆန္ဒကို ကာကွယ်ရန် ပေါ်ပေါက်လာသည့် အဖွဲ့အစည်းများဖြစ်ရာ ၎င်းတို့အကြား ရန်သူသဖွယ် သဘောထားရှိနေသည်ဟူသော စွပ်စွဲချက်သည် လုံးဝ ယုတ္တိမရှိသော ကိစ္စဖြစ်သည်ဟု အထက်ပါ လူငယ်တစ်ဦးက ဆိုသည်။
ယခုကဲ့သို့ လုပ်ကြံပြောဆိုနေခြင်းသည် တော်လှန်ရေးအင်အားစုများအကြား သွေးခွဲရန်နှင့် ခေါင်းဆောင်များအား အထီးကျန်ဖြစ်စေရန် ကြံစည်သည့် နိုင်ငံရေးလှည့်ကွက်တစ်ခု ဖြစ်ပါသည်။ ခေါင်းဆောင်များက NUG အား လက်မခံဘဲ ငြင်းဆိုနေသည့် ပုံစံမျိုးဖြင့် ဝါဒဖြန့်နေခြင်းသည် ပြည်သူ့တော်လှန်ရေး၏ စုစည်းမှုကို ဖျက်ဆီးလိုသော ရည်ရွယ်ချက်သာ ဖြစ်ကြောင်း နိုင်ငံရေးလေ့လာသူတစ်ဦးက ပြောသည်။
“စစ်တပ်လော်ဘီတွေရဲ့ ရေးသားချက်တွေကို ကြည့်ရင် သမ္မတကြီးကို ဓားစာခံအဖြစ် ဆက်ပြီးတော့ အသုံးချချင်နေတာကြောင့် အကွက်ဆင်နေတာဆိုတာ သိသာပါတယ်။ NUG က လုပ်ကြံမှာစိုးလို့ဆိုတဲ့ စွပ်စွဲချက်က ဘယ်လိုမှ သဘာဝမကျပါဘူး။ ဒါဟာ တော်လှန်ရေးအင်အားစုတွေရဲ့ ဂုဏ်သိက္ခာကို ညှိုးနွမ်းအောင် တမင်တကာ လုပ်ဆောင်နေတဲ့ ဝါဒဖြန့်မှုသက်သက်ပဲ ဖြစ်ပါတယ်” ဟု ၎င်းက ပြောသည်။
ထို့ပြင် သမ္မတကြီးအား လွတ်ငြိမ်းချမ်းသာခွင့် ပေးလိုက်ပြီဟု ကြေညာထားပြီးမှ ပြင်ပသို့ သွားလာခွင့်မပေးဘဲ ကန့်သတ်ထားခြင်းသည် ဥပဒေကြောင်းအရသော်လည်းကောင်း လူသားချင်းစာနာမှုအရသော်လည်းကောင်း လုံးဝ မမှန်ကန်သော လုပ်ရပ်ဖြစ်ကြောင်း လေ့လာသူများက ထောက်ပြကြသည်။
ဤသည်မှာ လွတ်လပ်ခွင့်ပေးခြင်း မဟုတ်ဘဲ အကျဉ်းထောင်ပုံစံ ပြောင်းလဲလိုက်ခြင်းသာ ဖြစ်သည်ဟု ဝေဖန်နေကြသည်။
လုံခြုံရေးပေးသည်ဟူသော ခေါင်းစဉ်အောက်တွင် ပြည်သူ့ခေါင်းဆောင်အား ဖမ်းဆီးထားခြင်းသည် နိုင်ငံတကာ ဖိအားများကို ရှောင်လွှဲရန် ကြိုးစားသည့် လှည့်ကွက်တစ်ခုဖြစ်ပြီး ဤအချက်ကို ပြည်သူများနှင့် နိုင်ငံတကာကပါ အမှန်အတိုင်း သိမြင်နေကြပြီ ဖြစ်ကြောင်း ပြည်သူများက ဆိုသည်။
ပြည်သူလူထု၏ အသံများတွင်လည်း စစ်တပ်လော်ဘီများ၏ ယခုကဲ့သို့ ရုပ်ပျက်ဆင်းပျက် ရေးသားချက်များသည် ၎င်းတို့၏ ကြောက်စိတ်ကို ဖော်ပြနေခြင်းသာ ဖြစ်သည်ပြီး သမ္မတကြီးအား အမှန်တကယ် လွတ်လပ်စေလိုပါက ပြည်သူများ၏ လက်ထဲသို့သာ အပ်နှံရန် တောင်းဆိုမှုများလည်းရှိသည်။
“စစ်အုပ်စုဟာ နိုင်ငံရေးအရ အကျပ်ရိုက်နေတာကို ဖုံးကွယ်ဖို့အတွက် အခုလို သတင်းအမှားတွေကို အသုံးချနေတာပါ။ ခေါင်းဆောင်တွေကို ဆက်ပြီးချုပ်ကိုင်ထားပြီး တော်လှန်ရေးအဖွဲ့အစည်းတွေအပေါ် အပြစ်ပုံချနေတာဟာ မြန်မာ့နိုင်ငံရေးပြဿနာကို ပိုပြီးရှုပ်ထွေးအောင် လုပ်နေတာပဲ ဖြစ်ပါတယ်” ဟု တက်ကြွလှုပ်ရှားသူတစ်ဦးက ထောက်ပြသည်။
အဆိုပါ အောက်တန်းကျသော ဝါဒဖြန့်မှုများကို ပြည်သူများအနေဖြင့် သတိထား စောင့်ကြည့်ရန် လိုအပ်သလို သတင်းမှားများကြောင့် တော်လှန်ရေးအင်အားစုများအကြား သံသယများ မဝင်လာစေရန်လိုအပ်ပြီး စစ်တပ်လော်ဘီများ၏ အဓိက ပစ်မှတ်သည် လူထု၏ စိတ်ဓာတ်ကို ရိုက်ချိုးရန်နှင့် ညီညွတ်မှုကို ဖြိုခွဲရန်ပင် ဖြစ်ကြောင်း ၎င်းက ဆက်လက်ပြောသည်။
ပြည်သူ့ခေါင်းဆောင်များအား အမှန်တကယ် လွတ်လပ်ခွင့်ပေးပြီး ပြည်သူ့ဆန္ဒကို အလေးထားမှသာ နိုင်ငံရေးပြဿနာများ ပြေလည်နိုင်မည်ဖြစ်ကြောင်းနှင့် လော်ဘီများ၏ လုပ်ကြံချက်များသည် အမှန်တရားကို ဘယ်တော့မှ ကျော်လွှားနိုင်မည် မဟုတ်ကြောင်း နိုင်ငံရေးလေ့လာသူများနှင့် တက်ကြွလှုပ်ရှားသူများကဆိုသည်။