ရန်ကုန်မြို့၊ မဟာဝိဇယစေတီတော်ဝင်းအတွင်းရှိ မဟာဗောဓိညောင်ပင်၌ အရွက်များ အရောင်ပြောင်းလဲခြင်းမှာ နိမိတ်ကောင်းဖြစ်သည်ဟု ဝါဒဖြန့်မှုများ ထွက်ပေါ်လာပြီးနောက် တစ်ရက်အကြာ ယနေ့ မေလ ၈ ရက်နေ့တွင် အဆိုပါညောင်ရွက်များမှာ တစ်ရွက်မကျန် ကြွေကျသွားကြောင်း သိရှိရသည်။
ထို့အပြင် ၎င်းညောင်ပင်အနီးရှိ အခြားသောအပင်များတွင်လည်း အရွက်များမှာ အစိမ်းရောင်မှ ဝါဖျော့ရောင်သို့ အလားတူ ပြောင်းလဲလာနေသည်ကို မြင်တွေ့နေရသဖြင့် ယင်းဖြစ်စဉ်မှာ ဘာသာရေးဆိုင်ရာ ထူးခြားဖြစ်စဉ်မဟုတ်ဘဲ သဘာဝပတ်ဝန်းကျင်ဆိုင်ရာ ရိုက်ခတ်မှုသာဖြစ်ကြောင်း စိုက်ပျိုးရေးပညာရှင် တစ်ဦးက ထောက်ပြသည်။
“အခုလို အရွက်တွေအားလုံး တစ်ပြိုင်နက်တည်း ကြွေကျသွားတာဟာ အပင်က ပြင်းထန်တဲ့ အပူဒဏ်နဲ့ ရေဓာတ်ခန်းခြောက်တဲ့ဒဏ်ကို ခံနေရလို့ပါ။ အပင်ကိုယ်တိုင် ဆက်ပြီးအသက်ရှင်နိုင်ဖို့အတွက် ရေငွေ့ပျံတာကို အစွမ်းကုန်လျှော့ချလိုက်တဲ့ သဘာဝရဲ့ ခုခံကာကွယ်မှု ယန္တရားတစ်ခုပဲ ဖြစ်ပါတယ်” ဟု ၎င်းက ပြောသည်။
၎င်းက ဆက်လက်၍ ဘေးပတ်ဝန်းကျင်ရှိ အပင်များပါ အရွက်များ လိုက်ဝါလာခြင်းမှာ ထိုဒေသအတွင်း အပူချိန်လွန်ကဲမှု (Heat Stress) ကြောင့် အပင်များ၏ ဇီဝကမ္မဖြစ်စဉ် ယိုယွင်းလာခြင်းကို ပြသနေခြင်းဖြစ်ပြီး၊ သိပ္ပံနည်းကျ အချက်အလက်များကို မျက်ကွယ်ပြု၍ နိမိတ်များအဖြစ် ပုံဖော်ခြင်းမှာ ကျိုးကြောင်းဆီလျော်မှု မရှိကြောင်း ဆိုသည်။
ရန်ကုန်မြို့ခံ ပြည်သူတစ်ဦးကလည်း “မနေ့ကတင် ရွှေအိုရောင် နိမိတ်ကောင်းဆိုပြီး ဝါဒဖြန့်ခဲ့ပေမဲ့ ဒီနေ့မှာတော့ အရွက်တွေ အကုန်ကြွေကျသွားတာဟာ သဘာဝတရားက အမှန်တရားကို ပြန်ပြီး သက်သေပြလိုက်တာပဲ။ ပြည်သူတွေမှာ လျှပ်စစ်မီးနဲ့ ရေအခက်အခဲတွေ ကြုံနေရတဲ့အချိန်မှာ အပင်တွေတောင် အပူဒဏ်မခံနိုင်လို့ သွေ့ခြောက်နေရတာကို နိမိတ်လို့ ပြောနေတာကတော့ တကယ့်ကို ရုပ်ဆိုးလွန်းပါတယ်” ဟု ဝေဖန်သည်။
နိုင်ငံအတွင်း စစ်ပွဲများနှင့် ကုန်ဈေးနှုန်းကြီးမြင့်မှုကြောင့် ပြည်သူများ ဒုက္ခရောက်နေချိန်တွင် အစိုးရဌာနများက အပင်တစ်ပင် အရွက်ဝါသည်ကို နိုင်ငံတော်အဆင့် သတင်းအဖြစ် ပုံဖော်နေခြင်းမှာ လူထု၏အာရုံကို လွှဲရန် ကြိုးပမ်းသည့် လုပ်ရပ်ဟောင်းကြီးသာ ဖြစ်ကြောင်း နောက်ထပ် ပြည်သူတစ်ဦးက မှတ်ချက်ပြုသည်။
နိုင်ငံရေးလေ့လာသူများ၏ အဆိုအရ စစ်ကော်မရှင်သည် ၎င်းတို့၏ အုပ်ချုပ်ရေးအာဏာအပေါ် ဘုန်းကံရှိသယောင် ပြသနိုင်ရန်အတွက် မိုးကုတ်ပတ္တမြားသတင်းနှင့် ဤညောင်ရွက်သတင်းကို တပြိုင်တည်း ထုတ်ပြန်ခဲ့ခြင်းဖြစ်သည်ဟု ရှုမြင်ကြသည်။
သို့သော်လည်း လက်တွေ့တွင် အပင်မှ အရွက်များ ကြွေကျကုန်ခြင်းမှာ ၎င်းတို့အုပ်ချုပ်သည့် ကာလအတွင်း တိုင်းပြည်၏ ယိုယွင်းပျက်စီးနေသည့် အခြေအနေကို ပိုမိုထင်ဟပ်စေသည့် ဆိုးကျိုးနိမိတ်သာ ဖြစ်ကြောင်း ထောက်ပြမှုများလည်းရှိသည်။
အဆိုပါ ဖြစ်စဉ်သည် လူငယ်ထုနှင့် အသိပညာရှိသူများအကြားတွင် လှောင်ပြောင်ဝေဖန်စရာ တစ်ရပ်ဖြစ်လာခဲ့ပြီး၊ ဆိုရှယ်မီဒီယာများပေါ်တွင်လည်း သိပ္ပံနည်းကျ အဖြေထုတ်မှုများက ဝါဒဖြန့်ချိရေးထက် ပိုမိုအားကောင်းလာခဲ့သည်။
ခေတ်အဆက်ဆက် အာဏာရှင်များသည် ဘာသာရေးနှင့် နိမိတ်များကို အသုံးပြု၍ လူထုအပေါ် သြဇာလွှမ်းမိုးရန် ကြိုးပမ်းလေ့ရှိသော်လည်း၊ ခေတ်သစ်လူ့အဖွဲ့အစည်း၏ အသိတရားရှေ့မှောက်တွင် ယင်းလုပ်ရပ်များမှာ အရာမထင်တော့ကြောင်း နိုင်ငံရေးလေ့လာသူများက ထောက်ပြသည်။