ကိုးကန့်တပ် (MNDAA) ထိန်းချုပ်ထားသည့် ကွတ်ခိုင်မြို့နယ်တွင် ကျောင်းဆရာ၊ ဆရာမ လုံလောက်မှု မရှိခြင်းကြောင့် ဒေသခံများကိုယ်တိုင် ဆရာ၊ ဆရာမ ရှာဖွေပေးနေရကြောင်း ဒေသခံများထံမှ စုံစမ်းသိရှိရသည်။
ထိုကဲ့သို့ ကိုးကန့်တပ်၏ အထူးဒေသ (၁) တွင် ဆရာ၊ ဆရာမပေါင်း ၈၀၀ ကျော်ရှိကြောင်း ထုတ်ပြန်ထားသော်လည်း၊ ကွတ်ခိုင်မြို့နယ်တစ်ခုလုံးအတွက် ဆရာ၊ ဆရာမ စုစုပေါင်း ၄၀၀ နီးပါးသာ ချထားပေးနေကြောင်း ဆိုသည်။
“ဒီနေ့ ကျောင်းအုပ်တို့ကို အစည်းအဝေးခေါ်တယ်။ ကျောင်းတိုင်းကို ဖွင့်ပေးမယ်။ သို့သော်လည်း ရွာဘက်က ဆရာ၊ ဆရာမ မရှာပေးနိုင်ဘူးဆိုရင် သူတို့ဘက်က ဆရာ၊ ဆရာမ ချမပေးဘူး။ ဆရာ၊ ဆရာမ လုံလောက်မှုမရှိဘူး။ ကျောင်းသားဦးရေများတဲ့ ကျောင်းဆိုရင် နှစ်ယောက်ပဲ ချပေးမယ်။ ကျန်တာ ရွာသားတွေအနေနဲ့ ဆရာတွေ ရှာပေးရမယ်။ ကျမတို့ရွာမှာတော့ မူလွန်ကနေ မူလတန်းပဲ ပြန်ဖွင့်နိုင်တာ။ ဆရာ၊ ဆရာမ ငါးယောက်တော့ ချပေးထားတယ်” ဟု ကွတ်ခိုင်မြို့ခံ အမျိုးသမီးတစ်ဦးက ပြောသည်။
ကျောင်းသားဦးရေ ၅၀ အောက်ရှိသော ကျေးရွာအချို့တွင် ရွာခံများအနေဖြင့် ဆရာ၊ ဆရာမ ရှာဖွေပေးရမည်ဖြစ်ပြီး၊ ဆရာ၊ ဆရာမများ၏ လစာကို ကိုးကန့်အထူးဒေသ (၁) မြန်မာပညာရေးဌာနက ပေးချေသွားမည်ဖြစ်ကြောင်း ၎င်းက ပြောသည်။
ထို့ပြင် ရပ်ရွာများမှ ခန့်ထားသော ဆရာ၊ ဆရာမများသည် ပညာအရည်အချင်း အနည်းဆုံး ဆယ်တန်း (Grade-11 သို့မဟုတ် Grade-12) အောင်မြင်သူ ဖြစ်ရမည့်အပြင်၊ စာသင်ကြားဖူးသည့် အတွေ့အကြုံရှိသူ ဖြစ်ရမည်ဟု သိရသည်။
“ဆရာ၊ ဆရာမတွေတော့ ရှာနေကြတယ်။ ဒါပေမဲ့ ရှာမတွေ့ဘူး။ တချို့ရွာတွေမှာတော့ ကိုယ့်ရွာက ကလေးတွေရဲ့ ပညာရေးကို ငဲ့ညှာပြီး အရင်နှစ်က ဆရာမတွေကပဲ ပြန်သင်ပေးမယ်လို့ ပြောတယ်။ ကျောင်းတွေတောင် အပ်နေပြီ၊ အခုအချိန်ထိ ဆရာမက လုံလောက်မှုမရှိသေးဘူး။ ဘယ်လိုဖြစ်လာမလဲတော့ မသိဘူး” ဟု ကျောင်းဆရာမတစ်ဦးနှင့် နီးစပ်သူတစ်ဦးက ပြောသည်။
ကွတ်ခိုင်မြို့ရှိ ပုဂ္ဂလိက ကိုယ်ပိုင်အထက်တန်းကျောင်းများအနေဖြင့် ကိုးကန့်တပ်၏ အထူးဒေသ (၁) မြန်မာပညာရေးဌာနထံတွင် ကျောင်းသားဦးရေနှင့် ကျောင်းဆရာ၊ ဆရာမဦးရေ အပြည့်အစုံကို လျှောက်ထားတင်ပြရမည်ဖြစ်ပြီး၊ အထူးဒေသ (၁) ၏ သင်ရိုးညွှန်ကြားချက်အတိုင်းသာ သင်ကြားပေးရမည်ဖြစ်ကြောင်း သိရသည်။
“အခုလောလောဆယ်က ကျောင်းသားစာရင်းကောက်တုန်းပဲ ရှိသေးတယ်။ ကျောင်းအပ်တဲ့သူတွေလည်း နည်းနေသေးတယ်။ တချို့ ကိုးကန့်တပ်က သတ်မှတ်ထားတဲ့ စည်းကမ်းတွေကို သဘောမကျလို့ တာဝန်မထမ်းဆောင်တော့တဲ့ ဆရာမတွေလည်း ရှိတယ်။ ထွက်သွားကြတာပေါ့။ အဲဒီအထဲမှာ CDM ဆရာမ တချို့လည်း ပါတယ်” ဟု ကွတ်ခိုင်မြို့ခံ အမျိုးသမီးတစ်ဦးက ပြော သည်။
ကုန်တင်ကားကြီး ဝင်တိုက်မိ၍ ပျက်စီးသွားသည့် ကွတ်ခိုင်မြို့ရှိ အလက (၂) နှင့် အထက (၂) တို့၏ မုခ်ဦးတံခါးမကြီးမှာ ယနေ့ထက်ထိ ပြန်လည်ပြုပြင်ခြင်း မရှိသေးသည့်အပြင်၊ ကျောင်းအပ်နှံသည့် ကလေးငယ်များလည်း မရှိသေးကြောင်း ဆိုသည်။
ပြီးခဲ့သည့် မေလ ၂၅ ရက်နေ့တွင် ကိုးကန့်တပ်၏ အထူးဒေသ (၁) မြန်မာပညာရေးကျောင်းက ကျောင်းသားများကို စတင်လက်ခံခဲ့ခြင်း ဖြစ်သည်။
ကွတ်ခိုင်မြို့တွင် တအာင်းတပ်မတော် (TNLA) ထိန်းချုပ်စဉ်ကာလက တအာင်းပြည်ပညာရေးကောင်စီ (TLEC) အောက်တွင် ကျောင်းသားပေါင်း ၁၂,၀၀၀ ကျော် သင်ကြားနိုင်ခဲ့သလို၊ ကျောင်းပေါင်း ၁၃၀ ကျော်ကိုလည်း ဖွင့်လှစ်ပေးနိုင်ခဲ့သည်။