ထိုင်းစစ်တပ်က တာ့ခ်နယ်စပ်ကို ကာကွယ်ရန် အသင့်ရှိဟု ထုတ်ပြန်

ထိုင်းစစ်တပ်၏ တတိယစစ်တိုင်းဒေသကြီးက ကရင်ပြည်နယ်အတွင်းရှိ လိမ်လည်မှုစင်တာအနီးတွင် မြန်မာစစ်တပ်နှင့် တော်လှန်ရေးတပ်ဖွဲ့များအကြား တိုက်ပွဲများ ပြင်းထန်လာနေမှုကြောင့် မြန်မာနိုင်ငံနှင့် ထိစပ်နေသော နယ်စပ်ဒေသတစ်လျှောက် ကာကွယ်ရေးလုပ်ငန်းများကို တိုးမြှင့်ရန် အသင့်ပြင်ဆင်ထားကြောင်း ထုတ်ပြန်ခဲ့သည်။

ထိုင်းပိုင်နက် နယ်မြေနှင့် တစ်ကီလိုမီတာသာ ဝေးကွာသော မြန်မာနိုင်ငံ ကရင်ပြည်နယ်အတွင်း နိုဝင်ဘာ ၂၂ ရက်က ဖြစ်ပွားခဲ့သည့် တိုက်ခိုက်မှုများကြောင့် တာ့ခ်ခရိုင်၊ မဲဆောက်မြို့နယ်တွင် စိုးရိမ်ပူပန်မှုများ ဖြစ်ပေါ်စေခဲ့သည်။

ကရင်အမျိုးသားအစည်းအရုံး (KNU) တပ်မဟာ ၆ နှင့် မြန်မာစစ်ကော်မရှင်၏ အမှတ် ၂၂ စစ်ဆင်ရေး ကွပ်ကဲရေး ဌာနချုပ်တို့အကြား မဲဆောက်မြို့၊ မဲကွန်ကင်ကျေးရွာ၏ တစ်ဖက်ကမ်းရှိ မြဝတီမြို့နယ်၊ မင်းလှပန်းရွာ ဝန်းကျင်တွင် တိုက်ပွဲများဖြစ်ပွားခဲ့သည်။

တိုက်ပွဲအတွင်း မြန်မာစစ်တပ်က တော်လှန်ရေးအဖွဲ့များအား ကြီးမားသည့် ထိုးစစ်ဆင်ခဲ့ရာတွင် ၆၀ မီလီမီတာ မော်တာကျည် တစ်လုံးသည် မဲကွန်ကင်ရွာသို့ ကျရောက်ပေါက်ကွဲခဲ့ရာ နေအိမ်လေးလုံးနှင့် ပစ်ကပ်ကားတစ်စီး ပျက်စီးခဲ့သည်။ ထိခိုက်ဒဏ်ရာရသူများ မရှိသော်လည်း ယင်းဖြစ်စဉ်ကြောင့် ဒေသခံများ တုန်လှုပ်ခြောက်ခြားခဲ့ကြသည်။

ယင်းအခြေအနေအပေါ် တုံ့ပြန်သည့်အနေဖြင့် ထိုင်းလုံခြုံရေးတပ်ဖွဲ့များက ၁၂၀ မီလီမီတာ မီးခိုးကျည်တစ်လုံး သတိပေးပစ်ခတ်ခဲ့ပြီး ၎င်းတို့၏ အသင့်အနေအထားအဆင့်ကို မြှင့်တင်ခဲ့သည်။
အဆိုပါ တိုက်ပွဲများကြောင့် မြန်မာနိုင်ငံသား ၁၂၅ ဦးသည် နယ်စပ်တစ်လျှောက်ရှိ ဘေးကင်းလုံခြုံသည့် နေရာများတွင် ခိုလှုံခဲ့ကြပြီး ထိုင်းအရာရှိများက လူသားချင်းစာနာမှု အကူအညီများ ပေးအပ်လျက်ရှိသည်။

တတိယစစ်တိုင်းဒေသကြီး၏ တပ်မှူး ဗိုလ်ချုပ်ကြီး ဝေါရာထက် ဘူညာနှင့် နရဲစွမ်း စစ်ဆင်ရေးတပ်ဖွဲ့မှူး ဗိုလ်ချုပ် မိုက်ထရီ ချူပရီချာတို့သည် နိုဝင်ဘာ ၂၄ ရက်က မဲကွန်ကင်ကျေးရွာအား စစ်ဆေးခဲ့ပြီး မော်တာပေါက်ကွဲမှုများနှင့် လှိုင်းဂယက်များကြောင့် ပျက်စီးခဲ့သည့် အဆောက်အအုံများကို စစ်ဆေးခဲ့ကြသည်။