DW
အစ္စရေးစစ်တပ်သည် ပါလက်စတိုင်းဟားမတ်စ် အုပ်စုနှင့် စစ်သွေးကြွများ အသုံးပြုနေသည်ဟုဆိုကာ ဂါဇာမြို့ရှိ အထပ်မြင့်အဆောက်အအုံတစ်ခုကို ယနေ့ တိုက်ခိုက်ခဲ့သည်။
ဟားမတ်စ်စစ်သွေးကြွများသည် ဒေသတွင်း တပ်စွဲထားသည့် အစ္စရေးစစ်သားများ၏ “တည်နေရာကို စောင့်ကြည့်ရန်” ထိုအဆောက်အအုံကို အသုံးပြုခဲ့ကြောင်း အစ္စရေးကာကွယ်ရေးတပ်ဖွဲ့ (IDF) က ပြောကြား သည်။
သတင်းအေဂျင်စီများက ထိုအဆောက်အအုံကို ရွှေ့ပြောင်းနေထိုင်သူ မိသားစုများအတွက် ခိုလှုံရာအဖြစ် အသုံးပြုနေသည်ဟု ဆိုသည်။
အစ္စရေးကာကွယ်ရေးတပ်ဖွဲ့ (IDF) ၏ အာရဗီဘာသာစကားပြောရေး ဆိုခွင့်ရှိသူ အဗီချိုင်း အဒ်ရာအီက ဂါဇာမြို့ရှိ အယ်လ်-ရူယာ အဆောက်အအုံနှင့် အနီးအနားရှိ တဲများမှ ဒေသခံများကို အထူးရည်ရွယ်ကာ X (ယခင် Twitter) တွင် အရေးပေါ် သတိပေးချက်ကို လူမှုမီဒီယာပေါ်တွင် ဖော်ပြခဲ့သည်။
“အစ္စရေးကာကွယ်ရေးတပ်ဖွဲ့ဟာ အဆောက်အအုံအတွင်း သို့မဟုတ် အနီးမှာ ဟားမတ်စ်အကြမ်းဖက်အခြေခံအဆောက်အအုံတွေ ရှိနေတဲ့အတွက် မကြာမီ အဆောက်အအုံကို တိုက်ခိုက်မှာပါ” ဟု အဒ်ရာအီက ရေးသားခဲ့သည်။
“ပြည်သူများရဲ့ ဘေးကင်းလုံခြုံရေးအတွက်၊ အဆောက်အအုံကနေ တောင်ဘက် Mawasi Khan Younis မှာရှိတဲ့ လူသားချင်းစာနာထောက်ထားမှုဆိုင်ရာ ဇုန်ကို အခုချက်ခြင်း ထွက်ခွာပေးဖို့ လိုအပ်ပါတယ်” ဟု သတိပေးချက်တွင် ဖော်ပြထားသည်။
အမေရိကန်သမ္မတ ဒေါ်နယ်ထရမ့်က ပါလက်စတိုင်းစစ်သွေးကြွအုပ်စု ဟားမတ်စ်ကို အစ္စရေးဓားစာခံများကို ပြန်လွှတ်ပေးပြီး ဂါဇာရှိ စစ်ပွဲကို အဆုံးသတ်ရန် ဝါရှင်တန်က အဆိုပြုထားသည့် သဘောတူညီချက်၏ စည်းကမ်းချက်များကို လက်ခံရန်အတွက် နောက်ဆုံးသတိပေးချက် ထုတ်ပြန်ခဲ့သည်။
“အစ္စရေးတွေက ကျွန်တော့်စည်းကမ်းချက်တွေကို လက်ခံပြီးပါပြီ” ဟု ထရမ့်က ၎င်း၏ Truth Social အကောင့်တွင် တင်ခဲ့ပြီး အမေရိကန်တွင် အကြမ်းဖက်အဖွဲ့အစည်းအဖြစ် သတ်မှတ်ထားသည့် ဟားမတ်စ်အဖွဲ့အားလည်း ထပ်တူလက်ခံရန် တိုက်တွန်းခဲ့သည်။
“မလက်ခံခဲ့ရင် ဘာတွေဖြစ်လာမလဲဆိုတာကို ကျွန်တော် ဟားမတ်စ်ကို သတိပေးထားပြီးသားပါ။ ဒါဟာ ကျွန်တော့်ရဲ့ နောက်ဆုံးသတိပေးချက်ဖြစ်ပြီး နောက်ထပ် ရှိတော့မှာ မဟုတ်ပါဘူး” ဟုလည်း ထပ်မံရေးသားခဲ့သည်။
ထရမ့်သည် မတ်လတွင်လည်း အလားတူ “နောက်ဆုံးသတိပေးချက်” ကို ပြုလုပ်ခဲ့ပြီး ရွေးကောက်ပွဲအပြီး ဇန်နဝါရီလ ၂၀ ရက်နေ့တွင် ရာထူးမယူမီ အစ္စရေးဓားစာခံများကို ပြန်လွှတ်ပေးရန် စစ်သွေးကြွအဖွဲ့ထံသို့ သတိပေးချက် ပေးပို့ခဲ့သည်။
အစ္စရေးပြည်သူ့ရုပ်သံလိုင်း Kan 11 ၏ အဆိုအရ လက်ရှိကမ်းလှမ်းချက်သည် အမေရိကန်တွင်မွေးဖွားသည့် အစ္စရေးငြိမ်းချမ်းရေးလှုပ်ရှားသူ ဂါရှန်ဘက်စကင်မှတစ်ဆင့် ဟားမတ်စ်နှင့် ညှိနှိုင်းခဲ့သည့် အခြေခံမူများပေါ်တွင် အခြေခံထားသည်ဟု သိရသည်။
ဘက်စကင်သည် ဟားမတ်စ်အရာရှိများနှင့် တိုက်ရိုက်ဆက်သွယ်မှုများကြောင့် ၂၀၁၁ ခုနှစ်တွင် အစ္စရေးစစ်သား ဂီလက် ရှယ်လစ်အား ပါလက်စတိုင်းအကျဉ်းသား ၁,၀၀၀ ခန့်နှင့် လဲလှယ်သည့် သဘောတူညီချက်ကို ရရှိခဲ့ဖူးသည်။
ဓားစာခံမိသားစုများကို ကိုယ်စားပြုသည့်အဖွဲ့ဖြစ်သော ဓားစာခံများနှင့် ပျောက်ဆုံးနေသော မိသားစုများဖိုရမ်က အစ္စရေးဓားစာခံများ လုံခြုံစွာပြန်လာသည်အထိ အစ္စရေးအစိုးရအား သဘောတူညီချက်ကို ထောက်ခံပြီး “သမ္မတထရမ့်ကို အပြည့်အဝ ထောက်ခံမှုပေးရန်” တိုက်တွန်းခဲ့သည်။
ဟားမတ်စ်က ဂါဇာရှိ ဓားစာခံသဘောတူညီချက်အတွက် နောက်ဆုံးကမ်းလှမ်းချက်ကို တုံ့ပြန်ရာတွင် အစ္စရေးနှင့် လက်ရှိစစ်ပွဲတွင် အပစ်အခတ်ရပ်စဲရေးရရှိရန်အတွက် အစီအစဉ်အချို့ကို လက်ခံရရှိခဲ့သည်ဟု ပြောကြားခဲ့သည်။
ပါလက်စတိုင်းစစ်သွေးကြွအဖွဲ့က ထိုအစီအစဉ်များကို မည်သို့လုပ်ဆောင်ရမည်ကို ဆွေးနွေးနေသည်ဟု ဆိုသည်။
“ဟားမတ်စ်ဟာ ညှိနှိုင်းမှုစားပွဲကို ချက်ချင်းပြန်လာဖို့ ဆန္ဒရှိပါတယ်” ဟု အဖွဲ့၏ ထုတ်ပြန်ချက်တွင် ဖော်ပြထားသည်။
ထို့အပြင် ဟားမတ်စ်က ၎င်း၏လက်အောက်ခံအဖွဲ့များက ထိန်းသိမ်းထားသည့် အစ္စရေးဓားစာခံများကို ပြန်လွှတ်ပေးပြီး ပိတ်ဆို့ထားသောဒေသရှိ စစ်ပွဲကို အဆုံးသတ်ရန်အတွက် ပါလက်စတိုင်းအကျဉ်းသားများကို ပြန်လွှတ်ပေးနိုင်မည့် သဘောတူညီချက်တစ်ခု ရရှိရန် ရည်မှန်းထားကြောင်းလည်း ထပ်လောင်းပြောကြားခဲ့သည်။
၂၀၂၃ ခုနှစ်၊ အောက်တိုဘာလ ၇ ရက်နေ့က ဟားမတ်စ်အဖွဲ့၏ အကြမ်းဖက်တိုက်ခိုက်မှုကြောင့် ယခုစစ်ပွဲ စတင်ခဲ့ပြီး အရပ်သားအများစုဖြစ်သည့် အစ္စရေးလူမျိုး ၁,၂၀၀ ခန့် သေဆုံးခဲ့သည်။
ထိုအချိန်မှစ၍ ဟားမတ်စ်က ထိန်းချုပ်ထားသည့် နယ်မြေ၏ ကျန်းမာရေးဝန်ကြီးဌာန၏ အဆိုအရ ဂါဇာတွင် ပါလက်စတိုင်းလူမျိုး ၆၄,၀၀၀ ကျော် သေဆုံးခဲ့ပြီးဖြစ်သည်။