မလေးရှားနိုင်ငံ၊ ဒေဆာ ပါလာဝန်ရပ်ကွက်အတွင်းမှ တန်ဖိုးကြီးလူနေရပ်ကွက်တစ်ခုရှိ သုံးထပ်ဗန်ဂလိုတစ်ခုအား ဝင်ရောက်စီးနင်းခဲ့ရာ တရုတ်နိုင်ငံသားတစ်ဦး နောက်ကွယ်မှ ကြိုးကိုင် ဆောင်ရွက်နေသည့် ပြည့်တန်ဆာလုပ်ငန်းကို ဦးဆောင်သူတစ်ဦးအပါအဝင် နိုင်ငံခြားသား ၄၀ ဦးကို ဖမ်းဆီးရမိခဲ့သည်။
အဆိုပါ စစ်ဆင်ရေးကို လူဝင်မှုကြီးကြပ်ရေးဌာန၏ ထောက်လှမ်းရေးနှင့် အထူးစစ်ဆင်ရေးဌာနခွဲက ဖေဖော်ဝါရီလ ၁၂ ရက်နေ့ နံနက် ၁၂ နာရီ ၂၇ မိနစ်တွင် ပါစီရန် ရစ်ချီ (Persiaran Ritchie) လမ်းတစ်လျှောက် ဆောင်ရွက်ခဲ့ခြင်းဖြစ်ပြီး အသက် ၂၁ နှစ်မှ ၄၃ နှစ်ကြားရှိ နိုင်ငံခြားသားများကို ဖမ်းဆီးနိုင်ခဲ့ခြင်း ဖြစ်သည်။
ဖမ်းဆီးခံရသူများထဲတွင် လုပ်ငန်းကို နောက်ကွယ်မှ ကြိုးကိုင်သူဟု ယူဆရသည့် တရုတ်နိုင်ငံသား အမျိုးသားတစ်ဦး ပါဝင်ကြောင်း လူဝင်မှုကြီးကြပ်ရေး ဒုတိယညွှန်ကြားရေးမှူးချုပ် လော့ခ်မန်း အက်ဖန်ဒီ ရမ်လီ က ပြောကြားသည်။
“ကျန်တဲ့ ဖမ်းဆီးခံရသူတွေကတော့ တရုတ်အမျိုးသား ၁၁ ဦးနဲ့ တရုတ်အမျိုးသမီး ၁၉ ဦး၊ ဗီယက်နမ်အမျိုးသမီး ၅ ဦး၊ မြန်မာအမျိုးသမီး ၂ ဦးနဲ့ ဂျပန်အမျိုးသမီး ၂ ဦးတို့ ဖြစ်ကြပါတယ်” ဟု ၎င်းက ဖေဖော်ဝါရီ ၁၃ ရက်နေ့ ထုတ်ပြန်ချက်တွင် ဖော်ပြခဲ့သည်။
ကနဦး စုံစမ်းစစ်ဆေးမှုများအရ ဂိုဏ်းခေါင်းဆောင်ဟု စွပ်စွဲခံထားရသူနှင့် နောက်ထပ် တရုတ်အမျိုးသားတစ်ဦးတို့တွင် တရားဝင် အလုပ်အကိုင်ပါမစ်များ ရှိကြောင်း သိရသည်။
“တရုတ်အမျိုးသား ၆ ဦး၊ တရုတ်အမျိုးသမီး ၁၉ ဦး၊ ဂျပန်အမျိုးသမီး ၂ ဦးနဲ့ ဗီယက်နမ်အမျိုးသမီး ၅ ဦးတို့ကတော့ အလည်အပတ်ဗီဇာ (Social Visit Passes) ကို ကိုင်ဆောင်ထားကြတာ တွေ့ရပါတယ်” ဟု ၎င်းက ဆိုသည်။
ကျန်ရှိနေသော နိုင်ငံခြားသားများမှာမူ နိုင်ငံအတွင်း နေထိုင်ရန် ခိုင်လုံသော ခရီးသွားစာရွက်စာတမ်း သို့မဟုတ် ဗီဇာတစ်စုံတစ်ရာ မရှိကြကြောင်း သိရသည်။
အဆိုပါ စီးနင်းမှုအတွင်း တရုတ်နိုင်ငံကူးလက်မှတ် ၂၉ အုပ်၊ ဗီယက်နမ်နိုင်ငံကူးလက်မှတ် ၅ အုပ်နှင့် ဂျပန်နိုင်ငံကူးလက်မှတ် ၂ အုပ်အပြင်၊ တရားမဝင်လုပ်ငန်းမှ ရရှိသည်ဟု ယူဆရသော ငွေသား ရင်းဂစ် ၂၆,၆၀၀ (စင်ကာပူဒေါ်လာ ၈,၅၉၀ ခန့်) ကိုလည်း သိမ်းဆည်းရမိခဲ့ကြောင်း ဒါတု လော့ခ်မန်းက ပြောကြားခဲ့သည်။
ယင်းအပြင် ယာဉ်နှစ်စီးကိုလည်း သိမ်းဆည်းခဲ့ပြီး အဆိုပါ ဗန်ဂလိုအား ကိုယ်ကျင့်တရားပျက်ပြားသော လုပ်ငန်းများ လုပ်ဆောင်နိုင်ရန် ပြုပြင်မွမ်းမံမှုများ ပြုလုပ်ထားကြောင်း ၎င်းက ဖြည့်စွက်ပြောကြားခဲ့သည်။
“ဒီဗန်ဂလိုဟာ အထက်တန်းလွှာ လူနေရပ်ကွက်မှာ တည်ရှိတာကြောင့် အာဏာပိုင်တွေရဲ့ စောင့်ကြည့်မှုကို ရှောင်ရှားနိုင်ဖို့ ရည်ရွယ်ရွေးချယ်ထားတာ ဖြစ်နိုင်ပါတယ်” ဟုလည်း ၎င်းက ပြောကြားသည်။
ဖမ်းဆီးခံရသည့် တရုတ်အမျိုးသားတစ်ဦးမှာ အရောင်းကိုယ်စားလှယ်အဖြစ် တာဝန်ယူထားပြီး အွန်လိုင်းပလတ်ဖောင်းများမှတစ်ဆင့် ဖောက်သည်များကို ရှာဖွေပေးရသူ ဖြစ်သည်။
“ဒီဂိုဏ်းဟာ နိုင်ငံခြားသားရော ပြည်တွင်းက ဖောက်သည်တွေကိုပါ ပစ်မှတ်ထားပြီး ၄၅ မိနစ်အတွက် ရင်းဂစ် ၁,၀၀၀ နဲ့ ၉၀ မိနစ်အတွက် ရင်းဂစ် ၃,၅၀၀ အထိ ကောက်ခံတယ်လို့ ယူဆရပါတယ်။ ဒီလုပ်ငန်းဟာ လပေါင်း ၆ လခန့် သက်တမ်းရှိပြီလို့ သိရပါတယ်” ဟု ၎င်းက ပြောကြားခဲ့သည်။