စစ်ကိုင်းတိုင်းအထက်ပိုင်း၏ စစ်ရေးနှင့် လမ်းပန်းဆက်သွယ်ရေးတွင် အချက်အချာကျသော အင်းတော်မြို့ကို ပြီးခဲ့သည့် ဧပြီလ ၃၀ ရက်နေ့တွင် စစ်ကော်မရှင်တပ်များက စတင်စိုးမိုးခဲ့ပြီးနောက်၊ ယနေ့ မေလ ၅ ရက်နေ့တွင် မော်လူးမြို့ကိုပါ ထပ်မံသိမ်းပိုက်လိုက်ပြီဖြစ်ကြောင်းသိရသည်။
ရက်ပိုင်းအတွင်း မြို့နှစ်မြို့ကို အင်အားသုံးပြန်လည်ရယူခြင်းသည် စစ်ကိုင်းအထက်ပိုင်းတွင် ကြုံတွေ့နေရသည့် စစ်ရေးအကျပ်အတည်းကို ကုစားရန် စစ်ကော်မရှင်၏ အပတ်တကုတ် ကြိုးပမ်းချက်တစ်ခု ဖြစ်ကြောင်း စစ်ရေးလေ့လာသူများက သုံးသပ်သည်။
မြေပြင်ရှိ တော်လှန်ရေးရဲဘော်တစ်ဦးက “ရန်သူဟာ သူတို့ရဲ့ ထောက်ပံ့ရေးလမ်းကြောင်း ပြတ်တောက်သွားတာကို အကြီးအကျယ် စိုးရိမ်နေတာပါ။ ဒါကြောင့်လည်း မြေပြင်စစ်ကြောင်းတွေကို လေကြောင်းပစ်ကူနဲ့ လက်နက်ကြီး အားသာချက်တွေ အလွန်အကျွံသုံးပြီး တန်ပြန်ထိုးစစ်ဆင်လာတာ ဖြစ်ပါတယ်” ဟု မြေပြင်အခြေအနေကို ရှင်းပြသည်။
အဆိုပါမြို့များသည် မန္တလေး-မြစ်ကြီးနား ကားလမ်းနှင့် ရထားလမ်းပေါ်ရှိ အဓိကလမ်းဆုံလမ်းခွများ ဖြစ်သည့်အားလျော်စွာ၊ ကချင်ပြည်နယ်အတွင်း ပိတ်မိနေသော စစ်စခန်းများသို့ ရိက္ခာနှင့် စစ်ကူပို့ဆောင်နိုင်မည့် လမ်းကြောင်းပွင့်ရေး (Line of Communication) ကို စစ်ကော်မရှင်က အဓိကဦးတည် လုပ်ဆောင်ခဲ့ခြင်းဖြစ်သည်။
မော်လူးမြို့ကို လက်လွှတ်လိုက်ရခြင်းသည် တော်လှန်ရေးအင်အားစုများအတွက် ကချင်ပြည်နယ်နှင့် စစ်ကိုင်းတိုင်းအကြား နယ်မြေဆက်စပ်မှုကို ဖြတ်တောက်ခံရသလို ဖြစ်စေပြီး၊ ထောက်ပံ့ရေးလမ်းကြောင်းများအပေါ်တွင်လည်း အဟန့်အတားအချို့ ဖြစ်ပေါ်စေနိုင်သည်။
သို့သော် မြို့ပေါ်မှ ခေတ္တဆုတ်ခွာပေးလိုက်ရခြင်းသည် ရေရှည်နယ်မြေစိုးမိုးမှု ခိုင်မာသွားခြင်းမဟုတ်ကြောင်း တော်လှန်ရေးအင်အားစုများက ရှုမြင်ကြသည်။
“ကျွန်တော်တို့ မြို့ပေါ်ကနေ နည်းဗျူဟာအရ ခေတ္တဆုတ်ခွာပေးလိုက်ရပေမဲ့ မြို့ပြင်ပတ်ပတ်လည်မှာတော့ ဝိုင်းရံပိတ်ဆို့ထားဆဲပါ။ မြို့ထဲက ရန်သူ့တပ်တွေဟာ ကျွန်တော်တို့ရဲ့ ပြောက်ကျားစစ်ဒဏ်ကို အချိန်မရွေး ပြန်ရင်ဆိုင်ရမှာပါ” ဟု ရဲဘော်တစ်ဦးက ဆက်လက်ပြောဆိုသည်။
စစ်ကော်မရှင်တပ်များ မြို့တွင်းသို့ ပြန်လည်ဝင်ရောက်လာပြီးနောက် ဖမ်းဆီးစစ်ဆေးမှုများနှင့် နေအိမ်မီးရှို့ခံရမည့် ဘေးအန္တရာယ်များကို ပြည်သူများက အထူးစိုးရိမ်နေကြသည်။
မော်လူးမြို့ခံတစ်ဦးက “မြို့ထဲကို စစ်တပ်ဝင်လာတာနဲ့ လူတွေက အကုန်ပြေးကြရတာပဲ။ အိမ်တွေမှာ ကျန်ခဲ့တဲ့သူတွေကိုလည်း လိုက်စစ်နေတာတွေ ရှိတယ်။ အရင်ကလို အေးအေးဆေးဆေး နေရမှာမဟုတ်တော့ဘူးဆိုတာ လူတိုင်းသိနေကြတယ်” ဟု ဆိုသည်။
စစ်ကော်မရှင်သည် အင်းတော်နှင့် မော်လူးမြို့တို့ကို အခြေစိုက်စခန်းများအဖြစ် အသုံးချကာ အနီးနားရှိ ဗန်းမောက်၊ ကသာနှင့် အခြားတော်လှန်ရေးနယ်မြေများသို့ စစ်ကြောင်းထိုးလာနိုင်သည့် အလားအလာရှိနေသည်။
တော်လှန်ရေးအင်အားစုများဘက်ကလည်း ယခုဆုံးရှုံးမှုကို သင်ခန်းစာယူကာ ပိုမိုခိုင်မာသော စစ်ရေးညှိနှိုင်းမှုများဖြင့် တန်ပြန်စစ်ဆင်ရေးများကို အရှိန်မြှင့်ရန် ပြင်ဆင်လျက်ရှိသည်။
အင်းတော်နှင့် မော်လူးမြို့တို့ကို စစ်ကော်မရှင်က ပြန်လည်ထိန်းချုပ်လိုက်ခြင်းသည် စစ်ကိုင်းအထက်ပိုင်း စစ်မျက်နှာတွင် စစ်ရေးတင်းမာမှု ပိုမိုမြင့်တက်လာစေမည့် အချက်ပြမှုဖြစ်ပြီး တိုက်ပွဲများကြောင့် ခရီးသွားလာမှုနှင့် ကုန်စည်စီးဆင်းမှုများတွင် အခက်အခဲများ ကြုံတွေ့ရနိုင်သဖြင့် ပြည်သူများအနေဖြင့် စစ်ရေးသတိ အစဉ်အမြဲရှိနေရန်နှင့် ဘေးလွတ်ရာသို့ ကြိုတင်ပြင်ဆင်မှုများ ပြုလုပ်ထားရန် လိုအပ်ကြောင်း စစ်ရေးလေ့လာသူများက သုံးသပ်သည်။