တရုတ်ကာကွယ်ရေးဝန်ကြီးဟောင်း နှစ်ဦးကို အဂတိမှုဖြင့် ဆိုင်းငံ့သေဒဏ် ချမှတ်

တရုတ်နိုင်ငံ၏ ကာကွယ်ရေးဝန်ကြီးဟောင်းများ ဖြစ်ကြသည့် ဝေဖန်းဟီနှင့် လီရှန်းဖူတို့ကို အဂတိလိုက်စားမှု စွဲချက်များဖြင့် ဆိုင်းငံ့သေဒဏ် ချမှတ်လိုက်ကြောင်း တရုတ်နိုင်ငံပိုင်မီဒီယာများက သတင်းထုတ်ပြန်သည်။

စစ်ဘက်ခုံရုံးတစ်ခုက ၎င်းတို့နှစ်ဦးအား နှစ်နှစ်ဆိုင်းငံ့သေဒဏ် စီရင်ချက်ကို ယနေ့တွင် ချမှတ်ခဲ့ခြင်းဖြစ်ပြီး၊ ယင်းမှာ တရုတ်နိုင်ငံ၏ ထိပ်တန်းစစ်ဘက်အရာရှိကြီးများအပေါ် အပြင်းထန်ဆုံး အရေးယူမှုတစ်ရပ် ဖြစ်လာသည်။

ဆိုင်းငံ့သေဒဏ်၏ သဘောမှာ ပြစ်ဒဏ်ချမှတ်ပြီးနောက် နှစ်နှစ်တာ စောင့်ကြည့်ကာ၊ ထိုကာလပြည့်မြောက်ပါက သေဒဏ်မှ ထောင်ဒဏ်တစ်သက်တစ်ကျွန်းသို့ ပြောင်းလဲသတ်မှတ်မည် ဖြစ်သည်။ သို့သော် ပြစ်ဒဏ်လျှော့ပေါ့ပေးခြင်း သို့မဟုတ် ခံဝန်ဖြင့် လွတ်ငြိမ်းခွင့်ပေးခြင်းတို့ကိုမူ လုံးဝပြုလုပ်မည်မဟုတ်ကြောင်း Xinhua သတင်းတွင် ဖော်ပြသည်။

တရားရုံးက ၎င်းတို့နှစ်ဦးစလုံးသည် လာဘ်ပေးလာဘ်ယူမှုများတွင် ပြစ်မှုထင်ရှားကြောင်း ဆုံးဖြတ်ခဲ့သည့်အပြင်၊ ၎င်းတို့ပိုင်ဆိုင်သည့် ကိုယ်ပိုင်ပိုင်ဆိုင်မှု အားလုံးကိုလည်း ပြည်သူ့ဘဏ္ဍာအဖြစ် သိမ်းဆည်းရန် အမိန့်ချမှတ်ခဲ့သည်။

အဆိုပါ ထုတ်ပြန်ချက်သည် တရုတ်နိုင်ငံအတွင်း အဂတိလိုက်စားမှု တိုက်ဖျက်ရေး အရှိန်အဟုန်မြှင့် လုပ်ဆောင်နေချိန်တွင် ထွက်ပေါ်လာခြင်းဖြစ်သည်။ ဝေဖန်းဟီသည် ၂၀၁၈ ခုနှစ်မှ ၂၀၂၃ ခုနှစ်အထိ တာဝန်ထမ်းဆောင်ခဲ့ပြီး၊ လီရှန်းဖူက ၂၀၂၃ ခုနှစ် မတ်လတွင် ၎င်း၏နေရာ၌ ဆက်ခံခဲ့ခြင်း ဖြစ်သည်။

လီရှန်းဖူ၏ ကာကွယ်ရေးဝန်ကြီး သက်တမ်းမှာမူ အလွန်တိုတောင်းခဲ့ပြီး၊ ၎င်းသည် ၂၀၂၃ ခုနှစ် ဩဂုတ်လတွင် လူမြင်ကွင်းမှ ရုတ်တရက် ပျောက်ကွယ်သွားခဲ့ကာ အောက်တိုဘာလတွင် ရာထူးမှ ထုတ်ပယ်ခြင်း ခံခဲ့ရသည်။

Reuters သတင်းဌာန၏ ဖော်ပြချက်အရ လီရှန်းဖူသည် လာဘ်ငွေ အမြောက်အမြား လက်ခံခဲ့သလို အခြားသူများကိုလည်း လာဘ်ထိုးခဲ့သည်ဟု သံသယရှိခဲ့ကြောင်းနှင့် နိုင်ငံရေးတာဝန်များကို ပျက်ကွက်ကာ ကိုယ်ကျိုးရှာခဲ့ကြောင်း စုံစမ်းစစ်ဆေးမှုများအရ သိရသည်။

အလားတူ ဝေဖန်းဟီသည်လည်း လာဘ်ငွေနှင့် တန်ဖိုးကြီးပစ္စည်း အမြောက်အမြားကို လက်ခံခဲ့သည့်အပြင်၊ ဝန်ထမ်းရေးရာ ရာထူးနေရာ ချထားပေးမှုများ၌ အခြားသူများ မတရားအကျိုးအမြတ်ရရှိရန် ကူညီပေးခဲ့သည်ဟု စစ်ဆေးတွေ့ရှိရသည်။

ပြီးခဲ့သည့် ဖေဖော်ဝါရီလအတွင်းက တရုတ်သမ္မတ ရှီကျင့်ဖျင်သည် ထိပ်တန်းစစ်ဗိုလ်ချုပ်ကြီး ကျန်းယိုရှားကို ရာထူးမှ ဖယ်ရှားခဲ့သည့် စစ်ဘက်ဆိုင်ရာ အဂတိနှိမ်နင်းမှုများနှင့် ပတ်သက်၍ လူသိရှင်ကြား ထုတ်ဖော်ပြောဆိုခဲ့ဖူးသည်။

ထိုစဉ်က သမ္မတ ရှီကျင့်ဖျင်က တရုတ်တပ်မတော်သည် အဂတိလိုက်စားမှု တိုက်ဖျက်ရေးတွင် “တော်လှန်ရေးဆန်ဆန် ပြုပြင်ပြောင်းလဲမှုများ” ကို လုပ်ဆောင်နေကြောင်း ပြောကြားခဲ့ခြင်းဖြစ်သည်။

သို့သော် ဝေဖန်သူများကမူ သမ္မတ ရှီကျင့်ဖျင်သည် ၎င်းအာဏာရလာချိန်မှစ၍ ဖော်ဆောင်နေသော အဂတိတိုက်ဖျက်ရေး လှုပ်ရှားမှုများကို ၎င်း၏ နိုင်ငံရေးပြိုင်ဘက်များအား ဖယ်ရှားရန် လက်နက်သဖွယ် အသုံးပြုနေခြင်းဖြစ်သည်ဟု ဆိုကြသည်။