“အင်္ဂလန် ရှိန်ပြီး ကစားမလား။ ယှဉ်ပြီး ကစားမလားဆိုတာ ပွဲအဖြေပဲ”
ပထမဦးဆုံး ဆီမီးဖိုင်နယ် ပွဲစဉ်မှာတော့ တစ်ကမ္ဘာလုံးကို အံ့အားသင့်စေပြီး စပိန်တို့က ဗိုလ်စွဲဖို့ ရေပန်းစားနေတဲ့ ပြင်သစ်ကို ၂ ဂိုးပြတ်နဲ့ အပြတ်အသတ် နောက်ကောက်ချကာ ဗိုလ်လုပွဲဆီ အရင်ဦးဆုံး တက်လှမ်းသွားခဲ့ပါပြီ။ အခုတော့ ဒုတိယမြောက် ဗိုလ်လုပွဲ လက်မှတ်တစ်စောင်ကို လုယူဖို့အတွက် ဘောလုံးလောကရဲ့ သမိုင်းဝင် ရန်ဘက်ဟောင်းကြီးနှစ်သင်းဖြစ်တဲ့ အင်္ဂလန်နဲ့ အာဂျင်တီးနားတို့ ထိပ်တိုက်ရင်ဆိုင်ရတော့မှာ ဖြစ်ပါတယ်။
အင်္ဂလန်နဲ့ အာဂျင်တီးနားတို့ရဲ့ ပွဲစဉ်ဟာ ဘောလုံးပွဲသက်သက်တင်မကဘဲ နိုင်ငံရေး၊ သမိုင်းကြောင်းနဲ့ မကျေပွဲရာဇဝင်တွေ ရောယှက်နေတဲ့ ပွဲကြီးပွဲကောင်းဖြစ်လို့ ရင်ခုန်စိတ်လှုပ်ရှားစရာ အလွန်ကောင်းနေပါတယ်။ မက်ဆီခေတ်မှာ အာဂျင်တီးနားနဲ့ အင်္ဂလန်တို့ ပထမဆုံးနဲ့ နောက်ဆုံးတွေ့ဆုံကြတဲ့ သမိုင်းဝင်ပွဲစဉ်လည်း ဖြစ်သွားနိုင်ပါတယ်။ ဒီလိုသမိုင်းဝင်ပွဲကောင်းကြီးအတွက် နောက်ဆုံးရ အခြေအနေတွေနဲ့ MPA ရဲ့ အထူးသုံးသပ်ချက်ကို အသေးစိတ် တင်ဆက်ပေးလိုက်ပါတယ်။
(၁) အင်္ဂလန်နဲ့ အာဂျင်တီးနား
ပွဲချိန် – ဇူလိုင် ၁၆ ရက်၊ မြန်မာစံတော်ချိန် နံနက် ၁ နာရီခွဲ
နော်ဝေကို ခက်ခက်ခဲခဲ ကျော်ဖြတ်လာခဲ့တဲ့ အင်္ဂလန်နဲ့ ဆွစ်ဇာလန်ကို ကျောက်ဆောင်လို ခံစစ်ကြားကနေ ဖောက်ထွက်လာခဲ့တဲ့ အာဂျင်တီးနားတို့ရဲ့ ရင်ဆိုင်မှုဖြစ်ပါတယ်။ ပရိသတ်တွေ ခန့်မှန်းရခက်နေတဲ့ ဒီပွဲကို အချက်အလက်တွေနဲ့တကွ ခွဲခြမ်းစိတ်ဖြာကြည့်ရအောင်။
၁။ နှစ်သင်းရဲ့အစဉ်အလာ
အင်္ဂလန်နဲ့ အာဂျင်တီးနားတို့ သမိုင်းမှာ ခြောက်ကြိမ်တွေ့ဆုံထားပါတယ်။ တွေ့ဆုံမှုတိုင်းဟာ သမိုင်းတင်ကျန်ရစ်လေ့ရှိပါတယ်။ ၁၉၈၆ ကမ္ဘာ့ဖလားက မာရာဒိုနာရဲ့ ဘုရားပေးတဲ့လက် ‘Hand of God’ ဂိုး၊ ၁၉၉၈ ကမ္ဘာ့ဖလားက ဒေးဗစ်ဘက်ခမ်း အနီကတ်ပြခံရပြီး အင်္ဂလန်တို့ ရှုံးနိမ့်ခဲ့ရတဲ့ ဖြစ်ရပ်နဲ့ ၂၀၀၂ ကမ္ဘာ့ဖလားမှာ ဘက်ခမ်းက ပင်နယ်တီနဲ့ ကလဲ့စားချေခဲ့တဲ့ သမိုင်းကြောင်းတွေဟာ ဒီပွဲမစတင်ခင်မှာတင် ပရိသတ်တွေကို ရင်ခုန်သံမြန်စေပါတယ်။
ဒါ့အပြင် လက်ရှိကမ္ဘာ့ချန်ပီယံ အာဂျင်တီးနားအတွက် မက်ဆီရဲ့ နောက်ဆုံးသော ကမ္ဘာ့ဖလားဆစ်ဂနယ်ကို ဗိုလ်လုပွဲအထိ သယ်ဆောင်သွားဖို့ ဖြစ်သလို၊ အင်္ဂလန်အတွက်တော့ ၁၉၆၆ နောက်ပိုင်း နှစ်ပေါင်း ၆၀ နီးပါး ကြာမြင့်ခဲ့ပြီဖြစ်တဲ့ ကမ္ဘာ့ဖလားအိပ်မက်ကို အကောင်အထည်ဖော်ဖို့ ဗိုလ်လုပွဲဆီ တက်လှမ်းရမယ့် သမိုင်းဝင် ပွဲစဉ်တစ်ပွဲလည်း ဖြစ်ပါတယ်။
၂။ လူစာရင်းနဲ့ ခြေစွမ်းပိုင်း
နှစ်သင်းစလုံးဟာ လက်ရှိကမ္ဘာ့အဆင့် ကစားသမားတွေနဲ့ စုဖွဲ့ထားပြီး ကစားဟန်ချင်း လုံးဝဥဿုံ ကွဲပြားခြားနားပါတယ်။
“အင်္ဂလန် – ကမ္ဘာ့အဖိုးတန်ဆုံး ကြယ်ပွင့်တွေရဲ့ လူအင်အားနဲ့ အရှိန်နှုန်း”
နည်းပြ သောမက်တူချယ်ရဲ့ လူရွေးချယ်မှုပိုင်းမှာ ဝေဖန်မှုတွေရှိခဲ့သလို ရလဒ်ပိုင်း စိုးရွံ့စရာတွေနဲ့ ကစားပိုင်းအားလျော့မှုတွေရှိနေခဲ့ပေမဲ့ အင်္ဂလန်တို့ မှန်မှန်လေး ရှေ့ကိုချီတက်လို့နေပါတယ်။ အင်္ဂလန်ဟာ ဂျုဒ် ဘယ်လင်ဂမ်၊ ဘူကာယို ဆာကာ၊ ဟယ်ရီ ကိန်း စတဲ့ ကမ္ဘာ့အဆင့်ကစားသမားတွေရဲ့ ကြံ့ခိုင်မှု၊ အရှိန်အဟုန်တွေကို အားပြုပြီး ကွင်းလယ်ပိုင်းကို စိုးမိုးပြီး ဂိုးရဖို့ ကြိုးစားလာပါလိမ့်မယ်။ အထူးသဖြင့် တောင်ပံတွေရဲ့ တစ်ဦးချင်း ရုန်းအားနဲ့ အမြန်နှုန်းက အာဂျင်တီးနားရဲ့ ဝါရင့်ခံစစ်လိုင်းကို အဓိက ဒုက္ခပေးနိုင်တဲ့ လက်နက်တွေ ဖြစ်ပါတယ်။
“အာဂျင်တီးနား – မက်ဆီရဲ့ ဉာဏ်ကစားကွက်နဲ့ အသင်းလိုက် စည်းလုံးမှု”
အာဂျင်တီးနားကတော့ လီယွန်နယ် မက်ဆီရဲ့ လျှပ်တပြက် ပေးပို့ဖန်တီးမှုတွေ၊ နေရာလွတ် ရှာဖွေနိုင်စွမ်းတွေနဲ့အတူ လာတာရို မာတီနက်ဇ်၊ ဂျူလီယန် အယ်လ်ဗာရက်ဇ်တို့ရဲ့ အဆုံးသတ်တွေကို အားကိုးသွားမှာပါ။ သူတို့ရဲ့ အဓိက အားသာချက်က ပွဲကြီးပွဲကောင်းတွေကို ကစားရဲတဲ့ အတွေ့အကြုံနဲ့ ကစားသမားအချင်းချင်း နားလည်မှုအပြည့်ရှိတဲ့ စုဖွဲ့မှု (Team Cohesion) ပဲ ဖြစ်ပါတယ်။
၃။ စူပါကွန်ပျူတာရဲ့ ဒေတာတွက်ချက်မှုနဲ့ ကျွမ်းကျင်သူတွေရဲ့ ခန့်မှန်းချက်
‘Opta Supercomputer Data ခန့်မှန်းချက်’
စူပါကွန်ပျူတာရဲ့ ထောင်ပေါင်းများစွာသော Simulation တွက်ချက်မှုတွေအရ မိနစ် ၉၀ အတွင်း ရလဒ်ထွက်ပေါ်နိုင်ခြေမှာတော့ အာဂျင်တီးနားတို့ အနည်းငယ်အသာရနေပါတယ်။
အာဂျင်တီးနား နိုင်ခြေ – ၃၈ ရာခိုင်နှုန်း၊ အင်္ဂလန် နိုင်ခြေ – ၃၅ ရာခိုင်နှုန်းနဲ့ မိနစ် ၉၀ အတွင်း သရေကျနိုင်ခြေက ၂၇ ရာခိုင်နှုန်းထိ ရှိနေပါတယ်။
‘ကျွမ်းကျင်သူတွေရဲ့ သုံးသပ်ချက်’
ဒီပွဲစဉ်ဟာ အပြန်အလှန် ဂိုးသွင်းယူနိုင်တဲ့ တိုက်စစ်ဆင်မှုတွေ မြင်တွေ့ရဖို့ ရှိနေပါတယ်။ အင်္ဂလန်က အရှိန်အဟုန်နဲ့ ဖိအားပေးကစားမှာဖြစ်ပြီး အာဂျင်တီးနားကလည်း ကွင်းလယ်ကနေ ဘောလုံးထိန်းချုပ်ကာ တန်ပြန်တိုက်စစ်တွေနဲ့ တုံ့ပြန်မှာပါ။
Betting Market ကြေးလိုင်းတွေမှာတော့ အာဂျင်တီးနားက အနည်းငယ်မျှသာ အလေးသာနေပြီး ဂိုးပေါင်းလိုင်းမှာတော့ ပထမပွဲစဉ်ဖြစ်တဲ့ စပိန်၊ ပြင်သစ်ပွဲလိုပဲ တိုက်စစ်ဖွင့်ကစားကြမယ့် အနေအထားကြောင့် ဂိုးအထက်လိုင်းက သိသိသာသာ ရေပန်းစားလှုပ်ခတ်နေပါတယ်။
၄။ MPA ရဲ့ ကောက်ချက်နဲ့ အနီးစပ်ဆုံး ရလဒ်ခန့်မှန်းချက်
ပထမဆီမီးဖိုင်နယ်မှာ စပိန်တို့က ပြင်သစ်ကို အံ့အားသင့်ဖွယ် ၂ ဂိုးပြတ်နဲ့ ဖြုတ်ချသွားခဲ့သလိုပဲ၊ ဒီပွဲမှာလည်း စိတ်လှုပ်ရှားစရာ အလှည့်အပြောင်းတွေနဲ့အတူ ဂိုးမြူးမယ့် ပွဲစဉ်တစ်ပွဲ ဖြစ်လာဖို့ ရှိပါတယ်။
အာဂျင်တီးနားရဲ့ ခံစစ်က တည်ငြိမ်ပေမဲ့ အင်္ဂလန်တိုက်စစ်ရဲ့ အရှိန်နှုန်းနဲ့ Physical အသာစီးရမှုကို အချိန်ပြည့် တားဆီးဖို့ ရုန်းကန်ရနိုင်ပါတယ်။ အင်္ဂလန်အနေနဲ့ အာဂျင်တီးနားရဲ့ ကောင်တာတွေကို သတိထားရမှာဖြစ်ပေမဲ့ သူတို့ပိုင်ဆိုင်ထားတဲ့ အရည်အသွေးမြင့် ကစားသမားတွေနဲ့ အရန်ခုံအင်အားက မိနစ် ၉၀ အတွင်း ပွဲကို အဆုံးအဖြတ်ပေးသွားနိုင်ပါတယ်။
MPA အနေနဲ့ သုံးသပ်ရရင် – ဒီပွဲဟာ အပြန်အလှန် သွင်းဂိုးတွေနဲ့အတူ အလွန်အကြိတ်အနယ်ရှိပြီး ကြည့်ကောင်းမယ့် ဂိုးများတဲ့ ပွဲစဉ် ဖြစ်လာမှာဖြစ်ပြီး၊ နောက်ဆုံးအချိန်အထိ အာရုံစူးစိုက်မှု ပိုကောင်းတဲ့ အင်္ဂလန်တို့ကပဲ မိနစ် ၉၀ အတွင်း ကပ်ပြီး အနိုင်ရရှိသွားကာ ဗိုလ်လုပွဲဆီ တက်လှမ်းပြီး စပိန်နဲ့ ရင်ဆိုင်သွားပါလိမ့်မယ်။ ဒီပွဲရဲ့အဖြေဟာ အင်္ဂလန်ပေါ်မှာပဲ မူတည်နေတယ်လို့ ညွှန်းဆိုလိုက်ချင်ပါတယ်။ အင်္ဂလန်တို့ ရှိန်ပြီး ထိန်းကစားမယ်ဆိုရင် ရလဒ် ဆိုးရွားသွားနိုင်ပါတယ်။ အင်္ဂလန်သာ သူသွင်း ကိုယ်သွင်းဆိုတဲ့ ဖောင်ဖျက်ပြီး ယှဉ်သာ ကစားမယ်ဆိုရင် ရလဒ်ကောင်းသွားမယ်လို့ သုံးသပ်လိုက်ချင်ပါတယ်။ တိုတိုပြောရရင် အင်္ဂလန်တို့ မက်ဆီကို ရှိန်ပြီး မကစားဘဲ ယှဉ်ပြီး ကစားမယ်ဆိုရင် နှစ်ပေါင်း ၆၀ ကျော်ဝေးကွာနေတဲ့ ဗိုလ်လုပွဲလက်မှတ်ကို ရရှိသွားမယ်လို့ ဆိုချင်ပါတယ်။
ခန့်မှန်းချက် – ဂိုးအထက် (Over) ပွဲစဉ်။
အနီးစပ်ဆုံး ရလဒ်ခန့်မှန်းချက် – မိနစ် ၉၀ အတွင်း အင်္ဂလန် ၃ – ၂ အာဂျင်တီးနား (သို့မဟုတ် အင်္ဂလန် ၂ – ၁ အာဂျင်တီးနား ဖြင့် ကပ်နိုင်သွားပါလိမ့်မယ်)။