၂၀၂၆ ဖီဖာ ကမ္ဘာ့ဖလား ဗိုလ်လုပွဲကို ဒိုင်လူကြီး၏ အငြင်းပွားဖွယ် ဆုံးဖြတ်ချက်များကြောင့် တရားမျှတမှုမရှိဘဲ သက်ရောက်မှုရှိခဲ့သည်ဟုဆိုကာ ပွဲစဉ်ကို ပြန်လည်ကစားပေးရန် တောင်းဆိုသည့် အွန်လိုင်း လက်မှတ်ထိုးလှုပ်ရှားမှု တစ်ရပ်ကို အာဂျင်တီးနား ဘောလုံးပရိသတ်များ စတင်ခဲ့ရာ လက်မှတ်ထိုးသူ ၈၀,၀၀၀ နီးပါး ရှိလာခဲ့ပြီဖြစ်သည်။
ဇူလိုင် ၁၉ရက်က ကစားခဲ့သည့် ကမ္ဘာ့ဖလားဗိုလ်လုပွဲ စပိန်-အာဂျင်တီးနားပွဲစဉ်တွင် အာဂျင်တီးနားအသင်းသည် စပိန်အသင်းကို ၁ ဂိုး ဂိုးမရှိဖြင့် ရှုံးနိမ့်ခဲ့သည်။
စပိန်မီဒီယာများ၏ ဖော်ပြချက်အရ အဆိုပါ လက်မှတ်ထိုးတောင်းဆိုမှုကို Change.org တွင် ဂီဆယ်လာ ဆန်ချက်ဇ် (Gisela Sánchez) ဟု အမည်ဖော်ပြထားသော အာဂျင်တီးနား ပရိသတ်တစ်ဦးက စတင်ခဲ့ခြင်းဖြစ်ကြောင်း သိရသည်။
ဆလိုဗေးနီးယားလူမျိုး ဒိုင်လူကြီး စလာဗ်ကို ဗင်ချစ်၏ အဓိက ဆုံးဖြတ်ချက်များသည် ပွဲစဉ်၏ အရေးကြီးသော အချိန်များတွင် အာဂျင်တီးနားအသင်းကို မတရားသဖြင့် ထိခိုက်နစ်နာစေခဲ့သည်ဟုဆိုကာ ဗိုလ်လုပွဲကို ပြန်လည်ကစားပေးရန် ဖီဖာထံ တောင်းဆိုထားသည်။
သတင်းထုတ်ပြန်ချိန်အထိ အဆိုပါ လက်မှတ်ထိုးတောင်းဆိုမှုသည် Change.org တွင် လက်မှတ်ရေးထိုးသူ ၇၉,၃၅၁ ဦး ရရှိထားပြီး ဖြစ်သည်။
သို့သော်လည်း ယင်းကမ်ပိန်တွင် ဗိုလ်လုပွဲကို ပြန်လည်ကစားရန် ဖီဖာကို တရားဝင် ဖိအားပေးနိုင်သည့် ဥပဒေကြောင်းအရ အခြေအမြစ်မရှိသလို ဖီဖာဘက်ကလည်း အဆိုပါတောင်းဆိုမှုကို ပြန်လည်စစ်ဆေးမည်ဖြစ်ကြောင်း အရိပ်အမြွက် ပြသထားခြင်း မရှိပေ။
ယခု ကမ်ပိန်သည် ၂၀၂၆ ကမ္ဘာ့ဖလားပြိုင်ပွဲအတွင်း ပထမဆုံးပေါ်ထွက်လာသည့် အွန်လိုင်းလှုပ်ရှားမှု မဟုတ်ပေ။ ပြိုင်ပွဲအစောပိုင်းကလည်း စပိန်နှင့် ပြင်သစ်တို့ ကစားခဲ့သော ဆီမီးဖိုင်နယ်ပွဲစဉ်တွင် လာမင်း ယားမယ် ပြစ်ဒဏ်ဘောကျူးလွန်ခံရမှုကြောင့် စပိန်အသင်း ရရှိခဲ့သည့် ပင်နယ်တီနှင့်စပ်လျဉ်း၍ ဖြစ်ရပ်အစဉ်လိုက်ကို သံသယရှိကြသဖြင့် ပြင်သစ်ပွဲစဉ်ကို ပြန်လည်ကစားပေးရန် ပရိသတ်များက တောင်းဆိုခဲ့ဖူးသည်။ အဆိုပါ ကမ်ပိန်သည်လည်း ပြိုင်ပွဲအပေါ် တစ်စုံတစ်ရာ သက်ရောက်မှု မရှိခဲ့ပေ။
အွန်လိုင်းမှတဆင့် လက်မှတ်ထိုး တောင်းဆိုမှုများသည် အငြင်းပွားဖွယ် ဒိုင်လူကြီးဆုံးဖြတ်ချက်များနှင့် ပတ်သက်၍ ပရိသတ်များ မကျေနပ်ချက်ကို ထုတ်ဖော်ပြသသည့် သာမန်နည်းလမ်းတစ်ခု ဖြစ်လာသော်လည်း ၎င်းတို့သည် ပွဲစဉ်ရလဒ်များကို ပြောင်းလဲရန် သို့မဟုတ် ပွဲပြန်ကစားရန် ဖီဖာ၏ စည်းမျဉ်းများအရ တရားဝင် အာဏာသက်ရောက်မှု တစ်စုံတစ်ရာ မရှိပေ။