ဒုတိယကမ္ဘာစစ် အာရှတိုက်တွင် ပြီးဆုံးခြင်း နှစ် ၈၀ ပြည့် အထိမ်းအမှတ်အဖြစ် တရုတ်နိုင်ငံ၏ သမိုင်းတစ်လျှောက် အကြီးကျယ်ဆုံး စစ်ရေးပြအခမ်းအနားကို သမ္မတ ရှီကျင့်ဖျင်က တရုတ်နိုင်ငံတွင် ယနေ့ ကျင်းပခဲ့သည်။
တရုတ်သမ္မတ ရှီကျင့်ဖျင်က တရုတ်နိုင်ငံသို့ ရောက်ရှိနေသော ရုရှားသမ္မတ ဗလာဒီမာပူတင်၊ မြောက်ကိုရီးယားခေါင်းဆောင် ကင်ဂျုံအွန် အပါအဝင် အဆင့်မြင့် ဧည့်သည်တော်များကို တရုတ်နိုင်ငံ၊ တီယန်အန်မင်ရင်ပြင်တွင် ကြိုဆိုခဲ့သည်။
လူပေါင်း ၅၀,၀၀၀ ကျော်တက်ရောက်ခဲ့သော စစ်ရေးပြ အခမ်းအနား၏ အဖွင့်မိန့်ခွန်းတွင် သမ္မတရှီက ယနေ့ခေတ် လူသားမျိုးနွယ်သည် ငြိမ်းချမ်းရေး သို့မဟုတ် စစ်ပွဲ၊ ဆွေးနွေးမှု သို့မဟုတ် ထိပ်တိုက်ရင်ဆိုင်မှု၊ နှစ်ဦးနှစ်ဖက်အကျိုးရှိမှု သို့မဟုတ် တစ်ဖက်နိုင်တစ်ဖက်ရှုံး ဖြစ်မှုတို့ကို ရွေးချယ်ရန် ရင်ဆိုင်နေရကြောင်း၊ တရုတ်ပြည်သူများသည် သမိုင်း၏ မှန်ကန်သောဘက်တွင် ခိုင်မာစွာ ရပ်တည်နေကြောင်း ပြောကြားခဲ့သည်။
ထို့အပြင် ရှီက တစ်ဦးကိုတစ်ဦး ဂရုစိုက်ကြရန်နှင့် တရုတ်နိုင်ငံ၏ ပြန်လည်နိုးကြားလာမှုသည် မရပ်တန့်နိုင်တော့ပါ ဟုလည်း ပြောကြားခဲ့သည်။
သမ္မတ ရှီကျင့်ဖျင်က တရုတ်နိုင်ငံ၏ ငြိမ်းချမ်းသော ဖွံ့ဖြိုးတိုးတက်မှုကို အလေးပေးပြောကြားခဲ့သော်လည်း ၎င်း၏ လွတ်လပ်မှုနှင့် တိုးတက်လာသော စစ်ရေးစွမ်းပကားများကိုပါ တပြိုင်တည်း ထည့်သွင်းပြောကြားခဲ့သည်။
မိနစ် ၇၀ ကြာမြင့်သော အဆိုပါအခမ်းအနားတွင် တရုတ်က အသစ် ထုတ်လုပ်ထားသည့် ခေတ်မီတရုတ်လက်နက်များကို ပထမဆုံးအကြိမ် ထုတ်ဖော် ပြသခဲ့ရာတွင် အသံထက်မြန်သော ဒုံးပျံများ၊ မောင်းသူမဲ့လေယာဉ်များ၊ ရေဒါရှောင် တိုက်လေယာဉ်များ ပါဝင်ခဲ့သည်။
အဆိုပါ စစ်ရေးပြအခမ်းအနားသို့ ရုရှားသမ္မတ ဗလာဒီမာပူတင်၊မြောက်ကိုရီးယားခေါင်းဆောင် ကင်ဂျုံအွန်၊ ပါကစ္စတန်ဝန်ကြီးချုပ် ရှဲဘက်ဇ် ရှာရစ်ဖ်၊ ကာဇက်စတန်သမ္မတ ကာဆင်ဂျိုမတ် တိုကာယက်ဗ်၊ မလေးရှားဝန်ကြီးချုပ် အန်ဝါ အီဘရာဟင်၊ ဘီလာရုစ်သမ္မတ အလက်ဇန္ဒား လူကာရှန်ကို၊ အီရန်သမ္မတ အီဘရာဟင် ရိုင်စီ၊ ကျူးဘားသမ္မတ မီဂဲလ် ဒီယက်ဇ်-ကာနယ် တို့ တက်ရောက်ခဲ့ကြသည်။
ထို့အပြင် အယ်လ်ဂျီးရီးယား၊ ကွန်ဂို၊ အီဂျစ်၊ ဇင်ဘာဘွေနှင့် အခြားနိုင်ငံများမှ ခေါင်းဆောင်များ၊ အာဆီယံ၊ ရှန်ဟိုင်းပူးပေါင်းဆောင်ရွက်ရေးအဖွဲ့နှင့် ကုလသမဂ္ဂတို့ကဲ့သို့သော နိုင်ငံတကာအဖွဲ့အစည်းများမှ တာဝန်ရှိသူများလည်း တက်ရောက်ခဲ့ကြသည်။
ယင်းအခမ်းအနားသို့ အနောက်နိုင်ငံများမှ ခေါင်းဆောင်များ တက်ရောက်ခြင်း မရှိခဲ့ကြပေ။