မွန်ပြည်နယ်၊မော်လမြိုင်မြို့တွင် လာဘ်စားကြမ်းသည်ဟု နာမည်ကြီးနေသော ဂိုဏ်းစတားတင်ချို ကို ပြည်ခိုင်ဖြိုးပါတီက အမတ်လောင်းအဖြစ် ရွေးချယ်ထားကြောင်း သိရသည်။
လက်ရှိ မော်လမြိုင်မြို့နယ်စီမံအုပ်ချုပ်ရေးအဖွဲ့ဝင်ဖြစ်ပြီး မော်လမြိုင်မြို့နယ်ပြည်ခိုင်ဖြိုးပါတီဥက္ကဌ လည်းဖြစ်သူ တင်ချိုကို မွန်ပြည်နယ်လွှတ်တော်၊အချိုးကျကိုယ်စားပြုစနစ်(မဲဆန္ဒနယ်အမှတ်၁)တွင် ပြည်ခိုင်ဖြိုးပါတီ အမတ်လောင်းအဖြစ် ရွေးချယ်ထားကြောင်း တရားမဝင်ရွေးကောက်ပွဲကော်မရှင် ထုတ်ပြန်ချက်အရသိရသည်။
“တင်ချိုဆိုတာ မော်လမြိုင်မှာတကယ့်ကိုဂိုဏ်းစတားပဲ။မော်လမြိုင်အုပ်ကြီးတွေကို သူပဲရွေးတယ်။ အုပ်ကြီးတွေက လစဉ်ပေးရတဲ့လိုင်းကြေး သူ့ဆီပဲ သွားတာ။မော်လမြိုင်မြို့ပေါ်က ကေတီဗီ၊ မာဆက်၊လောင်းကစား မဟုတ်တာလုပ်တာမှန်သမျှရဲ့ ခေါင်ဟာ ဒီကောင်ပဲ”ဟု မော်လမြိုင်မြို့ခံ လူမှုကူညီရေးသမားတစ်ဦးက MPAသို့ပြောသည်။
တင်ချိုသည် တရားမဝင်မွန်ဝန်ကြီးချုပ် အောင်ကြည်သိန်း၏ လက်ရင်းတပည့်ဖြစ်ပြီး ငွေအရှာ ကောင်းသဖြင့် အောင်ကြည်သိန်းအားကိုးရသော တပည့်ဖြစ်သည်။
“လာဘ်စားတာကြမ်းလို့ အမတ်လောင်းအရွေးခံရတာလို့ မော်လမြိုင်မှာ ဟာသပြောနေကြသေး တယ်။တင်ချိုက အမတ်လောင်းတင်မကဘူး။ရွေးကောက်ပွဲပြီးရင် မွန်ပြည်နယ်အစိုးရအဖွဲ့မှာ ကျိန်းသေပေါက်ဝန် ကြီးဖြစ်မယ်လို့ ကြံ့ဖွတ်အသိုင်းအဝိုင်းက အရင်ကတည်းက ပြောနေကြတယ်။ တင်ချိုနဲ့တူတူ လုပ်စားနေတဲ့ လောင်းကစားဒိုင်ချုပ်တွေ၊မူးယစ်ဆေးဖြန့်တဲ့ကောင်တွေက တင်ချို ဝန်ကြီးဖြစ်အောင် ငွေလိုက်ကြမယ်လို့ သိရတယ်”ဟု ၎င်းက ဆက်လက်ပြောသည်။
တင်ချိုသည် ယခင်က မော်လမြိုင်မြို့တွင် ကြက်သမားတစ်ဦးအဖြစ် နာမည်ကြီးခဲ့သူဖြစ်ကြောင်း မော်လမြိုင်မြို့၊မုပွန်ရပ်ကွက်နေ ပြည်ခိုင်ဖြိုးပါတီနှင့် နီးစပ်သူတစ်ဦးက ပြောသည်။
“အရင်က တိုက်ကြက်လည်း ကိုယ်တိုင်မွေးတယ်။ကြက်လည်းတိုက်တယ်။ရဲသတင်းပေးလည်း လုပ် ခဲ့တယ်”ဟု ၎င်းက ပြောသည်။
လက်ရှိမော်လမြိုင်မြို့နယ်အတွင်းရှိ ရပ်ကျေးအုပ်ချုပ်ရေးမှူးများမှာ တင်ချိုစိတ်ကြိုက်ခန့်ထားသည့် ပြည်ခိုင်ဖြိုးပါတီဝင်များဖြစ်ကြပြီး ရပ်ကွက်ကြီးအုပ်ချုပ်ရေးမှူးတို့၏ တစ်လ တရားမဝင်ရသည့် ဝင်ငွေမှာ ကျပ်သိန်း၁၀၀ခန့်ရှိကာ လစဉ် တင်ချိုထံသို့ ကျပ်၅သိန်းမှ ၁၀သိန်းကျော်အထိ ဆက်ကြေးပေးရကြောင်း လူမှုကူညီရေးသမားက ဆိုသည်။
မော်လမြိုင်ရပ်ကွက်အုပ်ချုပ်ရေးမှူးတို့မှာ စားသောက်ဆိုင်၊ကေတီဗီဆိုင်၊အနှိပ်ခန်း၊ပြည့်တန်ဆာ ခန်း၊ချဲ၊မူးယစ်ဆေး၊လောင်းကစား၊ အိမ်ခြံမြေအရောင်း အဝယ်နှင့် စစ်မှုထမ်းကြေးတို့မှ တရားမဝင် ဝင်ငွေရရှိကြပြီး၂၀၂၄ခုနှစ်၊ ပွင့်လင်းရာသီမှစ၍ မော်လမြိုင်မြို့ပေါ်ရပ်ကွက်များ၌ ဇာတ်ပွဲသွင်းကာ လောင်းကစားဝိုင်းများခင်း ခွင့်ရသဖြင့် ရပ်ကွက်အုပ်ချုပ်ရေးမှူးတို့ ဝင်ငွေပိုကောင်းလာကြကြောင်း သိရသည်။
စာတည်း-ML