တူရကီနိုင်ငံ ရဲတပ်ဖွဲ့က ခရစ္စမတ်နှင့် နှစ်သစ်ကူးပွဲတော်များတွင် တိုက်ခိုက်မှုများ ပြုလုပ်ရန် ကြံစည်မှုများနှင့် ဆက်နွှယ်သည်ဟု ယူဆရသဖြင့် နိုင်ငံတစ်ဝန်းတွင် ဝင်ရောက်စီးနင်းမှုများ တစ်ပြိုင်နက် ပြုလုပ်ခဲ့ပြီး ISIS အစွန်းရောက်အဖွဲ့ဝင်ဟု သံသယရှိသူ ၁၁၅ ဦးကို ဖမ်းဆီးထိန်းသိမ်းခဲ့သည်။
အစ္စလာမ်မစ်နိုင်ငံတော် (Islamic State) ဟုလည်း လူသိများသော ISIS အဖွဲ့မှ အဖွဲ့ဝင်များသည် အားလပ်ရက်ကာလအတွင်း တူရကီနိုင်ငံ၌ တိုက်ခိုက်မှုများ ပြုလုပ်ရန် စီစဉ်နေကြောင်း စုံစမ်းစစ်ဆေးသူများက အတည်ပြုပြီးနောက်၊ သံသယရှိသူ ၁၃၇ ဦးအတွက် ဖမ်းဝရမ်းများ ထုတ်ပြန်ခဲ့ခြင်းဖြစ်ကြောင်း အစ္စတန်ဘူလ် အစိုးရရှေ့နေရုံးက ဒီဇင်ဘာ ၂၅ ရက် နေ့တွင် ပြောကြားသည်။
“ISIS လက်နက်ကိုင် အကြမ်းဖက်အဖွဲ့အစည်းဟာ လာမယ့် ခရစ္စမတ်နဲ့ နှစ်သစ်ကူး ပွဲတော်တွေမှာ နိုင်ငံအတွင်းက လူပုဂ္ဂိုလ်တွေ၊ အထူးသဖြင့် မွတ်စလင်မဟုတ်သူတွေကို ပစ်မှတ်ထားပြီး တိုက်ခိုက်မှုတွေ လုပ်ဆောင်ဖို့ စီစဉ်နေတယ်ဆိုတဲ့ သတင်းအချက်အလက်တွေကို ရရှိခဲ့ပါတယ်” ဟု အဆိုပါ ထုတ်ပြန်ချက်တွင် ပါရှိသည်။
“သူတို့ဟာ အကြမ်းဖက်အဖွဲ့အစည်းရဲ့ လှုပ်ရှားမှုတွေအတွက် ပဋိပက္ခဖြစ်ပွားရာ ဒေသတွေနဲ့လည်း အဆက်အသွယ် ရှိနေပါတယ်” ဟုလည်း ဖော်ပြထားသည်။
ရဲတပ်ဖွဲ့သည် နေရာပေါင်း ၁၂၄ ခုသို့ တစ်ပြိုင်နက်တည်း ဝင်ရောက်ဖမ်းဆီးခြင်း၊ ရှာဖွေခြင်းနှင့် သိမ်းဆည်းခြင်း လုပ်ငန်းစဉ်များကို ဆောင်ရွက်ခဲ့ရာ ပစ္စတိုသေနတ်များ၊ ခဲယမ်းမီးကျောက်များနှင့် အဖွဲ့အစည်းဆိုင်ရာ စာရွက်စာတမ်းများဟု တာဝန်ရှိသူများက ဆိုသည့် အထောက်အထားများကို သိမ်းဆည်းရမိခဲ့သည်။ ကျန်ရှိနေသော သံသယရှိသူ ၂၂ ဦးကို ဖမ်းဆီးနိုင်ရန် လုပ်ငန်းစဉ်များ ဆက်လက်ဆောင်ရွက်နေကြောင်း ရှေ့နေများက ဆိုသည်။
တူရကီနိုင်ငံသည် ၂၀၁၇ ခုနှစ် နှစ်သစ်ကူးပွဲတော်အတွင်း အစ္စတန်ဘူလ်ရှိ Reina နိုက်ကလပ်၌ လူပေါင်းများစွာ သေဆုံးခဲ့ရသော ISIS ၏ တိုက်ခိုက်မှု ဖြစ်ပွားခဲ့ပြီးနောက်ပိုင်းတွင် နှစ်ကုန်ပိုင်း အားလပ်ရက်များ ဝန်းကျင်၌ ကျယ်ပြန့်သော အကြမ်းဖက်မှု တိုက်ဖျက်ရေး လုပ်ငန်းစဉ်များကို ပုံမှန်တိုးမြှင့် လုပ်ဆောင်လေ့ရှိသည်။
စုံစမ်းစစ်ဆေးမှုများ ဆက်လက်ပြုလုပ်နေစဉ်အတွင်း နောက်ထပ်အချက်အလက်များကို ထုတ်ပြန်ပေးသွားမည်ဖြစ်ကြောင်း အာဏာပိုင်များက ပြောကြား သည်။