ရုရှား၏ နျူကလီးယားထိပ်ဖူးတပ်ဆင်နိုင်သည့် အဆင့်မြင့် Oreshnik ဒုံးကျည်စနစ်ကို စတင်အသုံးပြုရန် အသင့်ဖြစ်ပြီဖြစ်ကြောင်း ရုရှားကာကွယ်ရေးဝန်ကြီးဌာနက ဒီဇင်ဘာ ၃၀ရက်တွင် ကြေညာထားသည်။
အဆိုပါ အဆင့်မြင့်လက်နက်စနစ်ကို အိမ်နီးချင်း ဘီလာရုစ်နိုင်ငံတွင် ဖြန့်ကျက်ချထားခြင်းဖြစ်ပြီး တပ်ဖွဲ့ဝင်များက လက်နက်စနစ် စတင်လည်ပတ်မှု အထိမ်းအမှတ်အဖြစ် အခမ်းအနား တစ်ခုကို အကျဉ်းချုပ်ပြုလုပ်ခဲ့ကြသည်။
ကာကွယ်ရေးဝန်ကြီးဌာနက အဆိုပါစနစ် စတင်အသုံးပြုနိုင်ပြီဖြစ်ကြောင်းကို အတည်ပြုခဲ့သော်လည်း ဖြန့်ကျက်ထားသည့် ဒုံးကျည်အရေအတွက် သို့မဟုတ် ဘီလာရုစ်နိုင်ငံအတွင်း တည်ရှိသည့်နေရာနှင့် လက်နက်စနစ်၏ စွမ်းဆောင်ရည်ဆိုင်ရာ အသေးစိတ်အချက်အလက်များကိုမူ ထုတ်ဖော်ပြောကြားခြင်း မရှိပေ။
ယခုလုပ်ရပ်သည် ယခုလအတွင်း Oreshnik ဒုံးကျည်စနစ်များ စစ်ပွဲအသင့်အနေအထားဖြစ်စေရမည်ဟု ဒီဇင်ဘာလအတွင်းက ပြောကြားခဲ့သော သမ္မတ ဗလာဒီမာ ပူတင်၏ မိန့်ခွန်းနောက်ပိုင်း ထွက်ပေါ်လာခြင်းဖြစ်သည်။
ပူတင်က ငြိမ်းချမ်းရေး ဆွေးနွေးမှုများ၌ ကရင်မလင်၏ တောင်းဆိုချက်များကို ကိဗ်နှင့် အနောက်အုပ်စု မဟာမိတ်များက ငြင်းပယ်ပါက ယူကရိန်းတွင် ရုရှား၏ နယ်မြေသိမ်းပိုက်မှုများကို ထပ်မံတိုးချဲ့သွားမည်ဟု သတိပေးထားသည်။