ယနေ့ ညနေပိုင်းတွင် ဆောင်ခလာပြည်နယ်၊ ဟတ်ယိုင်မြို့နယ်ရှိ ပါတန် ပရာသန်ကီရီဝပ် (Patong Prathan Khiriwat) ကျောင်းအတွင်းသို့ သေနတ်သမားတစ်ဦး ဝင်ရောက်ပစ်ခတ်ပြီး ကျောင်းသားနှင့် ဆရာများကို ဓားစာခံအဖြစ် ဖမ်းဆီးထားသည့် အရေးပေါ်အခြေအနေတစ်ရပ် ဖြစ်ပွားနေကြောင်း သိရသည်။
ဤဖြစ်ရပ်နှင့် ပတ်သက်၍ ထိုင်းတော်ဝင်ရဲတပ်ဖွဲ့၏ ဒုတိယပြောရေးဆိုခွင့်ရှိသူ ရဲမင်းကြီး ကစ်တီရတ် ဖန်ဖက် (Kittirat Phanphet) က ပြည်နယ်ရဲတပ်ဖွဲ့ဒေသ ၉ မှူး ဒုတိယဗိုလ်ချုပ်ကြီး ပီယာဝပ် ချာလမ်ဆရီအား အခင်းဖြစ်နေရာသို့ ဦးဆောင်နှိမ်နင်းရန် အရေးတကြီး အမိန့်ပေးထားသည်။
ဖြစ်စဉ်မှာ ယနေ့ညနေ ၄ နာရီ ၄၅ မိနစ်ခန့်တွင် စတင်ခဲ့ခြင်းဖြစ်ပြီး၊ M4 ရိုင်ဖယ် ကိုင်ဆောင်ထားသည်ဟု ယူဆရသော သေနတ်သမားသည် ကျောင်းအတွင်း ပစ်ခတ်မှုများ ပြုလုပ်ခဲ့သဖြင့် ဒဏ်ရာရရှိသူများရှိနေကာ Grade 11 (Mathayom 5) ကျောင်းသားတစ်ဦး အပါအဝင် ဆရာအချို့ကို ကျောင်းအဆောက်အဦအတွင်း ဓားစာခံအဖြစ် ဖမ်းဆီးထားခြင်း ဖြစ်သည်။
လက်ရှိတွင် အာဏာပိုင်များသည် ကျောင်းဝန်းတစ်ခုလုံးကို ဝိုင်းရံပိတ်ဆို့ထားကာ နည်းဗျူဟာမြောက် စစ်ဆင်ရေးများကို ဂရုတစိုက် ဆောင်ရွက်နေကြောင်းသိရသည်။
ညနေ ၆ နာရီ ၄ မိနစ်အချိန်အထိ ကျောင်းအတွင်းမှ သေနတ်သံများကို ကြားနေရဆဲဖြစ်ပြီး သေနတ်သမားကို ဖမ်းဆီးရမိခြင်း မရှိသေးကြောင်း သိရသည်။ ရဲမင်းကြီးက စစ်ဆင်ရေး၏ အဆင့်တိုင်းတွင် ဓားစာခံများနှင့် ပြည်သူလူထု၏ ဘေးကင်းရေးကို အဓိကဦးစားပေးရန် အလေးပေး ပြောကြားထားသည်။
ထို့ပြင် အာဏာပိုင်များ၏ လုပ်ငန်းဆောင်တာများကို အနှောင့်အယှက် မဖြစ်စေရန်နှင့် ပါဝင်ပတ်သက်နေသူများ၏ ဘေးကင်းရေးအတွက် အခင်းဖြစ်နေရာမှ ပုံရိပ်များနှင့် အချက်အလက်များကို တိုက်ရိုက်ထုတ်လွှင့်ခြင်း (Live လွှင့်ခြင်း) များ ရှောင်ကြဉ်ရန် မီဒီယာနှင့် ပြည်သူလူထုအား တောင်းဆိုထားသည်။
ပြည်သူများအနေဖြင့်လည်း ဟတ်ယိုင်မြို့၊ ပါတန်ခရိုင်ရှိ ပါတန်ပရာသန်ကီရီဝပ်ကျောင်းနှင့် အနီးတစ်ဝိုက်ရှိ လမ်းကြောင်းများကို အခြေအနေ မပြေလည်မချင်း ဖြတ်သန်းသွားလာခြင်း မပြုရန်နှင့် ရှောင်ရှားကြရန် အရေးပေါ် သတိပေးထားသည်။
တော်ဝင်ထိုင်းရဲတပ်ဖွဲ့ကလည်း အခြေအနေအရ နောက်ထပ် အချက်အလက်များကို ဆက်လက်ထုတ်ပြန်ပေးသွားမည် ဟု ထုတ်ပြန်ထားသည်။