ရန်ကုန်မြို့၊ မဟာဝိဇယစေတီတော်ဝင်းအတွင်းရှိ သီရိလင်္ကာနိုင်ငံမှ ပင့်ဆောင်စိုက်ပျိုးထားသော မဟာဗောဓိညောင်ပင်၌ အရွက်များ အစိမ်းရောင်မှ ရွှေအိုရောင်သို့ ထူးခြားစွာ ပြောင်းလဲနေကြောင်း စေတီတော်ဂေါပကအဖွဲ့က ယမန်နေ့( မေ ၆ရက်)တွင် ထုတ်ပြန်ခဲ့သည်။
ဂေါပကအဖွဲ့၏ ထုတ်ပြန်ချက်တွင် မေ ၅ ရက်နေ့ နံနက်ပိုင်းမှစတင်၍ ညောင်ရွက်များမှာ ထူးခြားစွာ အရောင်ပြောင်းလဲလာခြင်းဖြစ်ပြီး၊ ယင်းဖြစ်စဉ်အား အများပြည်သူ သိရှိနိုင်စေရန်အတွက် ဓာတ်ပုံမှတ်တမ်းများနှင့်တကွ သာသနာရေးဝန်ကြီးဌာနမှတစ်ဆင့် အစီရင်ခံတင်ပြထားခြင်းဖြစ်သည်။
ဤဖြစ်စဉ်နှင့် ပတ်သက်၍ စိုက်ပျိုးရေးပညာရှင်တစ်ဦးကမူ ၎င်းမှာ သဘာဝတရားအရ ဖြစ်ပေါ်သည့် အပင်၏ ဇီဝကမ္မဖြစ်စဉ်တစ်ခုသာ ဖြစ်သည်ဟု ဆိုသည်။
“အပင်တစ်ပင်မှာ ရုတ်တရက် အရွက်တွေ ဝါလာတာဟာ ရာသီဥတု ပြောင်းလဲမှု၊ ရေဓာတ်မလုံလောက်မှု ဒါမှမဟုတ် အမြစ်ပိုင်းမှာ ပိုးမွှားဒဏ်ခံရတာကြောင့် ဖြစ်နိုင်ပါတယ်” ဟု ၎င်းက ဆိုသည်။
စိုက်ပျိုးရေးပညာရှင်က ဆက်လက်၍ “အထူးသဖြင့် ကဆုန်လလို အပူရှိန်ပြင်းတဲ့အချိန်မှာ အပင်က ရေငွေ့ပျံမှုကို ထိန်းညှိဖို့အတွက် အရွက်ဟောင်းတွေကို စွန့်ပစ်ဖို့ ပြင်ဆင်တတ်ပါတယ်။ ဒါကို သိပ္ပံနည်းကျ မကြည့်ဘဲ ထူးခြားဖြစ်စဉ်လို့ ပုံဖော်နေတာကတော့ ကျိုးကြောင်းခိုင်လုံမှု မရှိပါဘူး” ဟု ရှင်းလင်းပြောကြားသည်။
တစ်ဖက်တွင်လည်း မိုးကုတ်၌ အင်မတန်ကြီးမားသော ပတ္တမြားကြီးတစ်ပွင့်ကို စစ်ကော်မရှင်က ရရှိခဲ့ကြောင်း သတင်းထွက်ပေါ်လာချိန်နှင့် ယခုညောင်ရွက်အရောင်ပြောင်းမှုသတင်းမှာ တစ်ပြိုင်နက်တည်း ထွက်ပေါ်လာခြင်းဖြစ်ရာ၊ ယင်းမှာ တိုက်ဆိုင်မှုမဟုတ်ဘဲ စနစ်တကျ စီစဉ်ထားသည့် ဝါဒဖြန့်မှုဖြစ်ကြောင်း ဝေဖန်မှုများရှိနေသည်။
ရန်ကုန်မြို့ခံ ပြည်သူတစ်ဦးကမူ “တိုင်းပြည်မှာ စစ်ပွဲတွေ၊ ကုန်စျေးနှုန်းတက်တာတွေနဲ့ ပြည်သူတွေ ဒုက္ခရောက်နေချိန်မှာ အခုလို နိမိတ်တွေ၊ အတိတ်တွေပြပြီး ဘာသာရေးကို ခုတုံးလုပ်တာဟာ တကယ့်ကို ရုပ်ဆိုးလွန်းပါတယ်။ ဒါဟာ လူထုရဲ့ အာရုံကို လွှဲဖို့ ကြိုးစားတဲ့ ရှေးရိုးစွဲ ဝါဒဖြန့်နည်းဟောင်းကြီးပါပဲ” ဟု ပြောသည်။
၎င်းက ဆက်လက်၍ “ဘုရားဝင်းထဲက အပင်တစ်ပင် အရွက်ဝါတာကို အစိုးရဌာနအဆင့်ဆင့် တင်ပြနေတာက တကယ့်ကို ဦးနှောက်မဲ့တဲ့ လုပ်ရပ်ပါ။ နိမိတ်တွေထက် လက်တွေ့ကျတဲ့ ပြည်သူ့ဘဝတွေကိုပဲ အာရုံစိုက်စေချင်ပါတယ်” ဟု ဆိုသည်။
မဟာဝိဇယစေတီတော်သည် သမိုင်းကြောင်းအရ ယခင်စစ်အစိုးရလက်ထက်က တည်ထားခဲ့ခြင်းဖြစ်ရာ၊ ယခုကဲ့သို့ စစ်ကော်မရှင်လက်ထက်တွင် နိမိတ်ကောင်း အဖြစ် ပုံဖော်နေခြင်းမှာ ၎င်းတို့၏ အုပ်ချုပ်ရေးအာဏာအပေါ် ဘုန်းကံရှိသယောင် ဟန်ပြလိုခြင်းဖြစ်သည်ဟု နိုင်ငံရေးလေ့လာသူများက ဆိုသည်။
နိုင်ငံတကာတွင် သဘာဝဘေးအန္တရာယ်နှင့် စစ်ပွဲများအကြား သိပ္ပံနည်းကျ ဖြေရှင်းမှုများကို ဦးစားပေးနေချိန်တွင်၊ မြန်မာနိုင်ငံ၌မူ အပင်အရွက်အရောင်ပြောင်းသည်ကိုပင် နိုင်ငံတော်အဆင့် သတင်းတစ်ရပ်အဖြစ် ဖော်ပြနေခြင်းမှာ ခေတ်နောက်ပြန်ဆွဲသည့် လုပ်ရပ်တစ်ခုသာ ဖြစ်ကြောင်း ဝေဖန်မှုများလည်းရှိနေသည်။
ဂေါပကအဖွဲ့၏ ထုတ်ပြန်ချက်တွင် လူအများလာရောက် ကြည့်ရှုနေကြောင်း ဖော်ပြထားသော်လည်း၊ အသိပညာရှိသည့် လူငယ်ထုအကြားတွင်မူ ယင်းဖြစ်စဉ်အပေါ် လှောင်ပြောင်ဝေဖန်မှုများသာ ဆိုရှယ်မီဒီယာများပေါ်၌ ပျံ့နှံ့လျက်ရှိသည်။
မဟာဝိဇယစေတီတော်မှ ညောင်ရွက်များ အရောင်ပြောင်းလဲမှုသည် ဘာသာရေးနှင့် နိမိတ်အပေါ် အခြေခံသည့် ဝါဒဖြန့်ချိရေးသက်သက်သာဖြစ်ပြီး၊ သိပ္ပံနည်းကျ အချက်အလက်များနှင့် ပြည်သူတို့၏ အသိတရားရှေ့မှောက်တွင် ယုတ္တိမရှိသော လုပ်ရပ်တစ်ခုအဖြစ်သာ မှတ်တမ်းတင် ကျန်ရစ်မည် ဖြစ်ကြောင်း နိုင်ငံရေးလေ့လာသူ တစ်ဦးက ဆိုသည်။