ကျိုက်ဒုံမြို့အထွက် KNU ဂိတ်တစ်ခုကို စစ်တပ်က ဗုံးကြဲရှင်းလင်းရာ လေးဦးသေဆုံးဆိုသည့် အကြောင်း အရာသည် စစ်ကော်မရှင်ဝါဒဖြန့် တယ်လီဂရမ်ချန်နယ်များတွင် ပျံ့နှံ့လျက်ရှိသည်။
“Nwaymaung News” တယ်လီဂရမ်ချန်နယ်က မေ ၂၅ ရက် နံနက် ၇ နာရီ ၅၅ မိနစ်တွင် ကြာအင်းဆိပ် ကြီး၊ ကျိုက်ဒုံမြို့အထွက်က KNU ဂိတ်တစ်ခုကို စစ်တပ်က လေယာဉ်ဖြင့် ဗုံးကြဲတိုက်ခိုက်ခဲ့ရာ လေးဦး သေဆုံးသွားကြောင်း ဓာတ်ပုံများနှင့်တကွ ဖြန့်ဝေထားခြင်းဖြစ်သည်။
မူရင်းသတင်းအမှားလင့်ခ် >>> https://archive.ph/EUuml
အဆိုပါ အကြောင်းအရာကို “Snow Queen, Min Din” အပါအဝင် အခြားစစ်တပ်ဝါဒဖြန့်တယ်လီဂရမ် ချန်နယ်များက ကူးယူဖော်ပြခဲ့သဖြင့် ပျံ့နှံ့မှုများပြားနေသည်။
တယ်လီဂရမ်တွင် ပျံ့နှံ့နေသော သတင်းအမှားလင့်ခ်များ >>>
Snow Queen – https://archive.ph/au3Lv
Min Din – https://archive.ph/IaXb3
အထက်တွင် ပျံ့နှံ့နေသော အကြောင်းအရာများနှင့် ပတ်သက်၍ Myanmar Fact-Checking Network ၏ အဖွဲ့ဝင်ဖြစ်သော MPA က အချက်အလက် စစ်ဆေးကြည့်ရာ သတင်းအမှားဖြစ်ကြောင်း တွေ့ရှိခဲ့သည်။
သတင်းစိစစ်ချက်
တယ်လီဂရမ်တွင် ပျံ့နှံ့နေသော ဓာတ်ပုံများကို Google Lens ဖြင့် စစ်ဆေးကြည့်ရာ “KIC” သတင်းဌာန၌ ဖော်ပြထားသော ဓာတ်ပုံများနှင့် ထပ်တူညီနေသည်။
KIC တွင် မေလ ၂၄ ရက်က ကရင်အမျိုးသားအစည်းအရုံး(KNU) ဒူးပလာယာခရိုင်၊ တပ်မဟာ ( ၆ ) နယ် မြေ၊ ကျိုက်ဒုံမြို့အဝင် ဘုရားတောင်ဘက်ခြမ်း တံတားအနီးရှိ စားသောက်ဆိုင်တန်းများ ရှိရာနေရာကို စစ် အုပ်စု လေယာဉ် ဖြင့် ဗုံးကြဲတိုက်ခိုက်ခဲ့ကြောင်း၊ ဗုံးဒဏ်ကြောင့် အမျိုးသမီး သုံးဦး သေဆုံးပြီး တစ်ဦး ပြင်း ထန်စွာ ဒဏ်ရာရရှိသွားကြောင်း၊ လူနေအိမ်နှင့် အဆောက်အအုံ သုံးလုံးထက်မနည်း ထိခိုက်ပျက်စီး ခဲ့ ကြောင်း ဖော်ပြထားသည်။
အပြည့်အစုံကြည့်ရန် >>> https://bitly.cx/3Gpe2
Google တွင် “ကျိုက်ဒုံ ဈေးဆိုင်တန်း လေကြောင်းဗုံးကြဲခံရ” ဆိုသည့် စကားလုံးဖြင့် ရှာဖွေကြည့်ရာ “Radio NUG” နှင့် “မြို့တော်” သတင်းဌာနတို့က သတင်းဖော်ပြထားသည်။
သတင်းမီဒီယာများတွင် မေလ ၂၄ ရက်နေ့က KNU တပ်မဟာ ( ၆ ) နယ်မြေ၊ ကျိုက်ဒုံမြို့အဝင် ဘုရား တောင်ဘက်ခြမ်း တံတားအနီးရှိ စားသောက်ဆိုင်တန်းများ ရှိရာ လူနေရပ်ကွက်အတွင်းကို စစ်တပ်က လေကြောင်းဗုံးကြဲတိုက်ခိုက်ခဲ့ကြောင်း၊ တိုက်ခိုက်မှုအတွင်း အမျိုးသမီး သုံးဦး ပွဲချင်းပြီး သေဆုံးကာ၊ အမျိုးသမီး တစ်ဦး ပြင်းထန်စွာဒဏ်ရာရရှိခဲ့ကြောင်း ဖော်ပြထားသည်။
အပြည့်အစုံကြည့်ရန် >>>
Radio NUG – https://bitly.cx/9SNP
မြို့တော် – https://bitly.cx/Ww6B
ကရင်အမျိုးသား အစည်းအရုံး(KNU) ဒူးပလာယာခရိုင်၏ လူမှုကွန်ယက် စာမျက်နှာတွင်လည်း အဆိုပါ လေကြောင်းတိုက်ခိုက်မှုနှင့် ပတ်သက်၍ သတင်းထုတ်ပြန်ထားသည်။
ထုတ်ပြန်ချက်တွင် မေလ ၂၄ ရက် နေ့လည် ၁၂ နာရီခွဲ တွင် ကရင်အမျိုးသားအစည်းအရုံး၊ ကော်သူးလေ အုပ်ချုပ်နယ်မြေ၊ ဒူးပလာယာခရိုင်၊ ကျိုက်ဒုံမြို့အဝင် တံတား၏ တစ်ဖက်ကမ်းဖြစ်သော နို့တကောမြို့နယ် အတွင်းရှိ ပြည်သူနေအိမ်များကို စစ်တပ်က ဂျက်ဖိုက်တာဖြင့် ဗုံးကြဲခဲ့ရာ အမျိုးသမီး သုံးဦး သေဆုံးပြီး နှစ်ဦး ထိခိုက်ဒဏ်ရာရခဲ့ကြောင်း ဖော်ပြထားသည်။
အပြည့်အစုံကြည့်ရန် >>> https://bitly.cx/WelJ5
သုံးသပ်ချက်
သတင်းမီဒီယာများတွင် ကျိုက်ဒုံမြို့အဝင် စားသောက်ဆိုင်တန်းများရှိရာ လူနေရပ်ကွက်အတွင်းကို စစ်တပ် က ဗုံးကြဲခဲ့ရာ အမျိုးသမီး သုံးဦး သေဆုံးပြီး တစ်ဦး ထိခိုက်ဒဏ်ရာရခဲ့ကြောင်း ဖော်ပြထားသည်။
ထို့ကြောင့် စစ်တပ်လော်ဘီတယ်လီဂရမ်ချန်နယ်များတွင် ပျံ့နှံ့နေသော “KNU ဂိတ်စခန်းကို စစ်တပ်က ဗုံးကြဲရာ လေးဦး သေဆုံး” ဆိုသော အကြောင်းအရာသည် သတင်းအမှားဖြစ်သည်။
ဆိုရှယ်မီဒီယာများတွင် ပျံ့နှံ့နေသောအကြောင်းအရာများအား သတင်းမီဒီယာလုပ်ငန်းစဉ်အတိုင်း အဆင့်ဆင့် အတည်ပြုဖော်ပြနေသော သတင်းမီဒီယာများ၌ ရှာဖွေဖတ်ရှုသင့်သည်။