မြန်မာစစ်ခေါင်းဆောင်ကို အိန္ဒိယက ကော်ဇောနီခင်း ကြိုဆိုခဲ့မည့်အစား လက်ထိပ်ပဲ ကမ်းလှမ်းခဲ့သင့်

By The Independent

မြန်မာစစ်ကော်မရှင်ခေါင်းဆောင် မင်းအောင်လှိုင်အား ကော်ဇောနီခင်း ကြိုဆိုခဲ့သည့် အိန္ဒိယနိုင်ငံ၏ ဆုံးဖြတ်ချက်အပေါ် ဝေဖန်မှုများ တိုးပွားလာနေပြီး၊ ၎င်းကိုယ်တိုင် သမ္မတအဖြစ် ကြေညာခဲ့ပြီးနောက်ပိုင်း ပထမဆုံး လက်ခံတွေ့ဆုံသည့် နိုင်ငံအဖြစ် အိန္ဒိယ ဖြစ်လာခဲ့သည်။

မင်းအောင်လှိုင်သည် ၎င်း၏ ငါးရက်ကြာ အစိုးရခရီးစဉ်ကို ဗုဒ္ဓဟူးနေ့တွင် အဆုံးသတ်ခဲ့ပြီး အဆိုပါခရီးစဉ်ကို စစ်ဂုဏ်ပြုတပ်ဖွဲ့ဖြင့် စတင်ခဲ့ကာ ဝန်ကြီးချုပ် နာရင်ဒရာမိုဒီ၊ သမ္မတ ဒရုပဒီမူရ်မူ တို့နှင့် တွေ့ဆုံမှုများ ပါဝင်ခဲ့သည်။

၎င်းသည် ၂၀၂၁ ခုနှစ်တွင် ဒေါ်အောင်ဆန်းစုကြည်၏ ဒီမိုကရေစီနည်းကျ ရွေးကောက်တင်မြှောက်ထားသည့် အစိုးရကို စစ်အာဏာသိမ်းပြီးနောက်ပိုင်း နိုင်ငံတကာ၏ ပိတ်ဆို့အရေးယူမှုများနှင့် ရှုတ်ချမှုများကို နှစ်ပေါင်းများစွာ ရင်ဆိုင်ခဲ့ရသူဖြစ်သည်။

၎င်းက ယခုနှစ်အတွင်း ပြုလုပ်ခဲ့သည့် ရွေးကောက်ပွဲများအပြီးတွင် ၎င်း၏ကိုယ်ပိုင် အရပ်သားအုပ်ချုပ်ရေးအဖွဲ့ကို ဖွဲ့စည်းခဲ့သည်ဟု ဆိုသော်လည်း ထိုရွေးကောက်ပွဲမှာ စစ်တပ်က အာဏာဆုပ်ကိုင်ထားနိုင်ရန် လုပ်ဆောင်သည့် လှည့်စားမှုတစ်ခုအဖြစ် ကျယ်ကျယ်ပြန့်ပြန့် ရှုတ်ချခြင်း ခံခဲ့ရသည်။

အိန္ဒိယနိုင်ငံကမူ အရေးပါသော အိမ်နီးချင်းနိုင်ငံနှင့် ဆွေးနွေးမှုလမ်းကြောင်း ထိန်းသိမ်းထားရန် ဤအစိုးရခရီးစဉ်မှာ လိုအပ်သော ခြေလှမ်းတစ်ခုဖြစ်သည်ဟု ကာကွယ်ပြောဆိုသော်လည်း၊ လေ့လာဆန်းစစ်သူများနှင့် လူ့အခွင့်အရေးအဖွဲ့များကမူ ယခုဆုံးဖြတ်ချက်သည် အမြော်အမြင်နည်းပါးပြီး မြန်မာပြည်သူများအတွက်ကော အိန္ဒိယနိုင်ငံအတွက်ပါ အကျိုးမရှိကြောင်း ဝေဖန်ခဲ့ကြသည်။

“မင်းအောင်လှိုင်ဟာ မြန်မာနိုင်ငံရဲ့ တရားဝင်သမ္မတ မဟုတ်ပါဘူး” ဟု အာဆီယံလွှတ်တော်အမတ်များ လူ့အခွင့်အရေးအဖွဲ့ (APHR) ဥက္ကဋ္ဌ Mercy Chriesty Barends က ပြောကြားခဲ့သည်။

“သူဟာ ဒီမိုကရေစီနည်းကျ ရွေးကောက်ခံထားရတဲ့ အစိုးရကို ဖြုတ်ချခဲ့တဲ့ ရက်စက်ကြမ်းကြုတ်တဲ့ အာဏာသိမ်းမှုရဲ့ ဗိသုကာဖြစ်ပြီး၊ အဲဒီနောက်ပိုင်းကတည်းက သူ့ရဲ့ ကိုယ်ပိုင်ပြည်သူတွေအပေါ် အစုလိုက်အပြုံလိုက် ရက်စက်ကြမ်းကြုတ်မှုတွေကို ဦးဆောင်နေသူ ဖြစ်ပါတယ်” ဟု Mercy Chriesty Barends ကဆိုသည်။

ခရီးစဉ်၏ အဓိကအစီအစဉ်မှာ တနင်္လာနေ့က ပြုလုပ်ခဲ့သည့် မင်းအောင်လှိုင်နှင့် မိုဒီတို့၏ တွေ့ဆုံမှုဖြစ်သည်။ တွေ့ဆုံမှုအပြီးတွင် ခေါင်းဆောင်နှစ်ဦးစလုံး မီဒီယာများကို ပြောကြားခြင်း မရှိခဲ့ပေ။ ထုတ်ပြန်ချက်တစ်ခုတွင် ခေါင်းဆောင်နှစ်ဦးစလုံးသည် နှစ်နိုင်ငံ ပူးပေါင်းဆောင်ရွက်မှု အားကောင်းရေး အရေးကြီးပုံကို အလေးပေးပြောကြားခဲ့ကြကြောင်း နှင့် ကုန်သွယ်ရေး၊ ကာကွယ်ရေးနှင့် လုံခြုံရေး ပူးပေါင်းဆောင်ရွက်မှု၊ နယ်စပ်စီမံခန့်ခွဲမှု၊ နှစ်ဦးနှစ်ဖက် အကျိုးတူဖြစ်စေမည့် ဒေသတွင်းနှင့် ကမ္ဘာလုံးဆိုင်ရာ ကိစ္စရပ်များကို ဆွေးနွေးခဲ့ကြကြောင်း ဖော်ပြထားသည်။

ထို့နောက် မင်းအောင်လှိုင်အား အိန္ဒိယသမ္မတအိမ်တော်၌ သမ္မတ မူရ်မူက လက်ခံတွေ့ဆုံခဲ့ပြီး အိန္ဒိယနှင့် မြန်မာနိုင်ငံတို့သည် ရာစုနှစ်ပေါင်းများစွာ နောက်ကြောင်းပြန်သည့် နက်ရှိုင်းသော ယဉ်ကျေးမှု၊ ထွန်းကားမှုနှင့် စိတ်ပိုင်းဆိုင်ရာ ဆက်နွှယ်မှုများကို မျှဝေခံစားထားကြကြောင်း ပြောကြားခဲ့သည်။

အင်္ဂါနေ့တွင် ၎င်းသည် အိန္ဒိယ၏ စီးပွားရေးမြို့တော် မွန်ဘိုင်းသို့ သွားရောက်ကာ စီးပွားရေးနှင့် လုပ်ငန်းရှင်ခေါင်းဆောင်များနှင့် တွေ့ဆုံခဲ့ပြီး ဗုဒ္ဓဟူးနေ့တွင် မပြန်မီ အခြေခံအဆောက်အအုံ စီမံကိန်းများသို့ သွားရောက်လေ့လာခဲ့သည်။

နယူးဒေလီသည် ပထဝီဝင်အနေအထားအရ ၎င်း၏အရှေ့ဘက်အိမ်နီးချင်းနိုင်ငံကို မည်သည့်အစိုးရက ထိန်းချုပ်ထားသည်ဖြစ်စေ ဆက်ဆံရေး ထိန်းသိမ်းထားရန်မှတစ်ပါး အခြားရွေးချယ်စရာ မရှိသလောက်ဖြစ်ကြောင်း ကာလရှည်ကြာ စတင်အငြင်းပွားခဲ့သည်။ နှစ်နိုင်ငံသည် ကီလိုမီတာ ၁,၆၀၀ ရှည်လျားသော နယ်စပ်ကို မျှဝေထားသဖြင့် လုံခြုံရေး၊ ရွှေ့ပြောင်းနေထိုင်မှုနှင့် နယ်စပ်ဖြတ်ကျော် ကုန်သွယ်မှုတို့နှင့် ပတ်သက်၍ ဘုံစိန်ခေါ်မှုများ ရှိနေသည်။

သို့သော်လည်း မြန်မာနိုင်ငံသည် စစ်တပ်၏ ဒီမိုကရေစီလိုလားသော ဆန္ဒပြသူများအပေါ် ရက်စက်စွာ နှိမ်နင်းမှုကြောင့် ဖြစ်ပွားခဲ့သည့် ပြည်တွင်းစစ်ဒဏ်ကို ခံစားနေရဆဲဖြစ်ပြီး၊ လူပေါင်းထောင်ချီ သေဆုံးကာ သန်းပေါင်းများစွာ အိုးအိမ်စွန့်ခွာနေရချိန်တွင် အိန္ဒိယက မင်းအောင်လှိုင်ကို လက်ခံတွေ့ဆုံခြင်းမှာ သိသာထင်ရှားလှသည်။

နိုဘယ်လ်ငြိမ်းချမ်းရေးဆုရှင် ဒေါ်အောင်ဆန်းစုကြည်သည် နိုင်ငံရေးအရ လုပ်ကြံဖန်တီးထားသည်ဟု ကျယ်ကျယ်ပြန့်ပြန့် ရှုတ်ချခံထားရသည့် စွဲချက်များဖြင့် နေအိမ်အကျယ်ချုပ် ကျခံနေရဆဲဖြစ်ပြီး ရှေ့နေများနှင့် တွေ့ဆုံခွင့် သို့မဟုတ် မိသားစုဝင်များ လာရောက်ခွင့် မရရှိပေ။

၎င်းသည် လွန်ခဲ့သည့် ငါးနှစ်တာကာလ၏ အချိန်အများစုကို တစ်ဦးတည်း သီးသန့်ချုပ်နှောင်ခံရမှုဖြင့် ကုန်လွန်ခဲ့ရပြီး တစ်နိုင်ငံလုံးရှိ တော်လှန်ရေးအဖွဲ့များကမူ စစ်ကော်မရှင်ကို တိုက်ခိုက်ရာတွင် နယ်မြေအများအပြားကို ဆက်လက်ထိန်းချုပ်ထားဆဲ ဖြစ်သည်။

မင်းအောင်လှိုင်သည် ၂၀၂၁ အာဏာသိမ်းမှုကို မဦးဆောင်မီကတည်းက စစ်တပ်တွင် သြဇာကြီးမားသူတစ်ဦးဖြစ်ပြီး၊ ကုလသမဂ္ဂ လူ့အခွင့်အရေးဆိုင်ရာအကြီးအကဲက လူမျိုးတုန်းသတ်ဖြတ်မှုအဖြစ် ဖော်ပြခဲ့သည့် ရိုဟင်ဂျာလူနည်းစုများအပေါ် စစ်တပ်၏ တိုက်ခိုက်မှုများတွင် ပါဝင်ပတ်သက်မှုကြောင့် ပိတ်ဆို့အရေးယူခြင်း ခံထားရသူဖြစ်သည်။

မြန်မာနိုင်ငံ ရခိုင်ပြည်နယ်တွင် မွေးဖွားခဲ့ပြီး ယူကေသို့ ပြောင်းရွှေ့ခဲ့သည့် ထင်ရှားသော ရိုဟင်ဂျာတက်ကြွလှုပ်ရှားသူ ထွန်းခင်က “အိန္ဒိယအနေနဲ့ မင်းအောင်လှိုင်ကို ကော်ဇောနီခင်း ကြိုဆိုမယ့်အစား လက်ထိပ်ပဲ ခတ်သင့်ပါတယ်။ မြန်မာစစ်တပ်ဟာ အိန္ဒိယနယ်စပ်မှာ မတည်ငြိမ်မှုတွေ၊ ဒုက္ခသည်တွေ၊ ငွေလိမ်ဂိုဏ်း (scam) စင်တာတွေ ဖန်တီးပြီး စီးပွားရေးအခွင့်အလမ်းတွေကို ပျက်စီးစေကာ အိန္ဒိယအတွက် ဆယ်စုနှစ်ပေါင်းများစွာ ပြဿနာတွေ ဖြစ်စေခဲ့တာပါ။ အိန္ဒိယအနေနဲ့ လူမျိုးတုန်းသတ်ဖြတ်မှုအတွက် တာဝန်ရှိတဲ့ စစ်ဗိုလ်ချုပ်တစ်ယောက်ကို တရားဝင်မှုပေးနေမယ့်အစား ဒီမိုကရေစီနည်းကျတဲ့ မြန်မာနိုင်ငံကို ထောက်ပံ့တာက ပိုကောင်းပါလိမ့်မယ်” ဟု The Independent သို့ ပြောကြားခဲ့သည်။

၂၀၁၉ ခုနှစ်တွင် ရိုဟင်ဂျာများအပေါ် လူ့အခွင့်အရေး ချိုးဖောက်မှုများ (ရာနှင့်ချီသော လူပေါင်းများကို ဘင်္ဂလားဒေ့ရှ်နိုင်ငံထဲသို့ ထွက်ပြေးစေခဲ့သည့် စစ်ဆင်ရေးများအပါအဝင်) နှင့် ပတ်သက်၍ အမေရိကန်သည် မင်းအောင်လှိုင်ကို ပထမဆုံး ပိတ်ဆို့အရေးယူခဲ့သည်။ ၂၀၂၁ စစ်အာဏာသိမ်းမှုအပြီးတွင် နောက်ထပ် ပိတ်ဆို့အရေးယူမှုများ ဆက်တိုက် ထွက်ပေါ်လာခဲ့သည်။

၂၀၂၀ ပြည့်နှစ် ဇူလိုင်လတွင် ယူကေကလည်း ၎င်းအပေါ် ပိတ်ဆို့အရေးယူမှုများ ချမှတ်ခဲ့ပြီး ဥရောပသမဂ္ဂ (EU) ကလည်း မြန်မာစစ်ခေါင်းဆောင်ပိုင်းအပေါ် ၎င်း၏ ပိတ်ဆို့အရေးယူမှု စနစ်ကို ဆက်လက်ထိန်းသိမ်းကာ တိုးမြှင့်ခဲ့သည်။

ယခုနှစ်အစောပိုင်းတွင် ကုလသမဂ္ဂ၏ အမြင့်ဆုံးတရားရုံးဖြစ်သော အပြည်ပြည်ဆိုင်ရာတရားရုံး (ICJ) သည် ဂမ်ဘီယာနိုင်ငံက မြန်မာစစ်တပ်အပေါ် စွဲဆိုထားသည့် လူမျိုးတုန်းသတ်ဖြတ်မှုအမှုကို ကြားနာခဲ့သည်။ အဆိုပါအမှုသည် ၂၀၁၆ နှင့် ၂၀၁၇ ခုနှစ်အတွင်း ရိုဟင်ဂျာ ၇၀၀,၀၀၀ ကျော်ကို ဘင်္ဂလားဒေ့ရှ်နိုင်ငံအတွင်းသို့ ထွက်ပြေးစေခဲ့သည့် စစ်ဆင်ရေးများကို ဗဟိုပြုထားသည်။ ၂၀၂၅ ခုနှစ်တွင် အာဂျင်တီးနားတရားရုံးတစ်ခုက ရိုဟင်ဂျာလူနည်းစုအပေါ် လူမျိုးတုန်းသတ်ဖြတ်မှုနှင့် လူသားမျိုးနွယ်အပေါ် ကျူးလွန်သည့် ရာဇ၀တ်မှုများဖြင့် မင်းအောင်လှိုင်ကို ဖမ်းဝရမ်း ထုတ်ပြန်ခဲ့သည်။

Burma Campaign UK ၏ ဒါရိုက်တာ Mark Farmaner က The Independent သို့ ပြောကြားရာတွင် – မိုဒီ၏ လက်ရှိမူဝါဒသည် တရုတ်၏ သြဇာလွှမ်းမိုးမှုကို တန်ပြန်လိုသည့် ဆန္ဒကြောင့် ဖြစ်သော်လည်း၊ ရေရှည်တွင် နယူးဒေလီအနေဖြင့် ပေကျင်းအပေါ် မှီခိုမှုနည်းပါးမည့် ဒီမိုကရေစီနည်းကျ မြန်မာနိုင်ငံကို ထောက်ပံ့ခြင်းဖြင့် ပိုမိုအကျိုးရှိစေမည် ဖြစ်ကြောင်း ပြောဆိုသည်။

“မိုဒီဟာ ဂျင်နရယ်မင်းအောင်လှိုင် ကိုယ့်ကိုယ်ကိုယ် သမ္မတအဖြစ် ခန့်အပ်ပြီးကတည်းက ပထမဆုံး ဖိတ်ကြားတဲ့နိုင်ငံ ဖြစ်လာခြင်းအားဖြင့် အိန္ဒိယအတွက် ပိုမိုကောင်းမွန်တဲ့ စေတနာနဲ့ သြဇာလွှမ်းမိုးမှုကို ဝယ်ယူနိုင်လိမ့်မယ်လို့ တွက်ချက်နေပုံရပါတယ်” ဟု ၎င်းက ပြောသည်။

“အိန္ဒိယရဲ့ လက်ရှိ မြန်မာနိုင်ငံအပေါ် ချဉ်းကပ်ပုံဟာ တရုတ်ရဲ့နောက်က ဒုတိယတန်းစားအဖြစ် ကစားဖို့ပဲ ကံကြမ္မာ သတ်မှတ်လိုက်သလို ဖြစ်နေပါတယ်။ ဘာဖြစ်လို့လဲဆိုတော့ အိန္ဒိယဟာ စီးပွားရေးအရော၊ နိုင်ငံရေးအရော၊ ကုလသမဂ္ဂ လုံခြုံရေးကောင်စီ အမြဲတမ်းအဖွဲ့ဝင်နေရာနဲ့ ကမ္ဘာလုံးဆိုင်ရာ သြဇာအာဏာမှာပါ တရုတ်ကို မပြိုင်နိုင်လို့ ဖြစ်ပါတယ်”Mark Farmaner က ဆိုသည်။

အရှေ့တောင်အာရှရှိ လက်ရှိနှင့် လွှတ်တော်အမတ်ဟောင်းများ ပါဝင်သည့် ဒေသဆိုင်ရာအဖွဲ့အစည်းဖြစ်သော အာဆီယံလွှတ်တော်အမတ်များ လူ့အခွင့်အရေးအဖွဲ့က ပြောကြားရာတွင် – အိန္ဒိယ၏ အိမ်နီးချင်းပထမ (Neighbourhood First) နှင့် အရှေ့ဘက်သို့ မျှော်ကြည့်လုပ်ဆောင်ရေး (Act East) နိုင်ငံခြားရေးမူဝါဒများသည် တည်ငြိမ်မှု၊ ယုံကြည်မှုနှင့် စည်းမျဉ်းအခြေခံသည့် ဒေသတွင်းစနစ်အပေါ် တည်ဆောက်ထားခြင်းဖြစ်ပြီး၊ ဤတန်ဖိုးအားလုံးကို မြန်မာစစ်တပ်က ဖျက်ဆီးခဲ့သည်ဟု အငြင်းပွားခဲ့သည်။

ခရီးစဉ်မတိုင်မီ အရပ်ဘက်လူမှုအဖွဲ့အစည်းများ၊ လူသားချင်းစာနာထောက်ထားမှုဆိုင်ရာ ကွန်ရက်များနှင့် တိုင်းရင်းသားလူမျိုးစုအဖွဲ့ပေါင်း ၁၂၂ ဖွဲ့က လက်မှတ်ရေးထိုးထားသည့် အိတ်ဖွင့်ပေးစာတစ်စောင်တွင် အိန္ဒိယအနေဖြင့် ဖိတ်ကြားချက်ကို ရုပ်သိမ်းရန်နှင့် မြန်မာနိုင်ငံ၏ ဘက်စုံအကျပ်အတည်း ဗိသုကာအဖြစ် ဖော်ပြထားသည့် ခေါင်းဆောင်တစ်ဦးအား တရားဝင်မှုပေးခြင်းကို ရှောင်ရှားရန် တောင်းဆိုခဲ့ကြသည်။

၎င်းစာတွင် မင်းအောင်လှိုင်ကို လက်ခံတွေ့ဆုံခြင်းသည် မြန်မာပြည်သူများအပေါ် စနစ်တကျ လူ့အခွင့်အရေး ချိုးဖောက်မှုများနှင့် ရက်စက်ကြမ်းကြုတ်သည့် ရာဇ၀တ်မှုများအတွက် တာဝန်ရှိသော တရားမဝင် စစ်ကောင်စီကို မရည်ရွယ်ဘဲ တရားဝင်မှု ပေးသလို ဖြစ်သွားစေလိမ့်မည် ဟု ဖော်ပြထားသည်။

ခရီးစဉ်အတွင်း ပြုလုပ်သည့် သတင်းစာရှင်းလင်းပွဲတစ်ခုတွင် အိန္ဒိယ နိုင်ငံခြားရေးအတွင်းဝန် ဗီကရမ်မစ်ဆရီ (Vikram Misri) က နေပြည်တော်အစိုးရနှင့် ထိတွေ့ဆက်ဆံခြင်းသည် ၎င်းတို့၏ နိုင်ငံရေးစနစ်ကို အသိအမှတ်ပြု ထောက်ခံခြင်းဟု မဆိုလိုကြောင်း ပြောကြားခဲ့သည်။

ဝန်ကြီးချုပ် မိုဒီသည် ဒေါ်အောင်ဆန်းစုကြည်အား ဖမ်းဆီးထိန်းသိမ်းထားမှု ကိစ္စနှင့် နိုင်ငံအတွင်း ဒီမိုကရေစီ လမ်းကြောင်းပေါ်သို့ ပြန်လည်ရောက်ရှိရေး ကိစ္စရပ်များကို လွတ်လပ်ပွင့်လင်းစွာ ဆွေးနွေးမှု၏ တစ်စိတ်တစ်ပိုင်းအဖြစ် ထည့်သွင်းပြောကြားခဲ့သည်ဟု ၎င်းက ဆိုသည်။

“ထိတွေ့ဆက်ဆံမှု မလုပ်ဘဲ နေတာဟာ ထိတွေ့ဆက်ဆံတာထက် ပိုကောင်းတဲ့ ရလဒ်မျိုး မပေးနိုင်ဘူးဆိုတာ သမိုင်းက သက်သေပြခဲ့ပြီးသားပါ။ တကယ်လို့ ကျွန်တော်တို့ စိတ်ဝင်စားတာ ဒီမိုကရေစီ အပြောင်းအလဲဆိုရင်လည်း ဆက်ဆံရေးဖြတ်တောက်မှုက အပြောင်းအလဲကို မဖန်တီးပေးနိုင်ပါဘူး” ဟု ၎င်းက ပြောသည်။

“အခြားတစ်ဖက်မှာလည်း ဆက်ဆံရေးဖြတ်တောက်လိုက်ရင် တခြားသူတွေ ဝင်ရောက်နေရာယူမယ့် လဟာပြင်တစ်ခုကိုပဲ ဖြစ်ပေါ်စေမှာဖြစ်ပြီး အဲဒါက ကျွန်တော်တို့ကို ထိခိုက်စေပါလိမ့်မယ်။ အဲဒီ တခြားသူတွေကလည်း ဒီမိုကရေစီကို စိတ်ဝင်စားတဲ့သူတွေ မဟုတ်ဘူးဆိုတာ ကျွန်တော် ရဲရဲကြီး အာမခံရဲပါတယ်” ဟု တရုတ်နိုင်ငံကို ရည်ညွှန်းကာ ၎င်းက ပြောကြားခဲ့သည်။

တရုတ်နှင့် အာရှသုတေသနအဖွဲ့ (ORCA) မှ တွဲဖက်သုတေသီတစ်ဦးဖြစ်သူ Ophelia Yumlembam က The Independent သို့ ပြောကြားရာတွင် -ချင်းပြည်နယ်ကဲ့သို့ မြန်မာနိုင်ငံ၏ နယ်စပ်ဒေသများတွင် ဖြစ်ပေါ်တိုးတက်မှုများသည် အိန္ဒိယအတွက် အလွန်အရေးကြီးကြောင်း ဆိုသည်။

“နယူးဒေလီအတွက်တော့ မြန်မာနိုင်ငံက အကျပ်အတည်းဟာ ဝေးကွာလှတဲ့ နိုင်ငံရေးပြဿနာတစ်ခု မဟုတ်ပါဘူး။ နယ်စပ်လုံခြုံရေး၊ ဒေသတွင်းတည်ငြိမ်မှု၊ ချိတ်ဆက်မှုစီမံကိန်းတွေနဲ့ ဒုက္ခသည်စီးဆင်းမှုတွေအပေါ် တိုက်ရိုက်သက်ရောက်မှုရှိနေတဲ့ လက်ငင်း ရင်ဆိုင်နေရတဲ့ အိမ်နီးချင်း စိန်ခေါ်မှုတစ်ခု ဖြစ်ပါတယ်” ဟု ၎င်းက ပြောကြားခဲ့သည်။