By MPA
ကမ္ဘာ့ဘောလုံးလောကမှာ Juju ဟု ခေါ်ကြသည့် ဂမ္ဘီရယုံကြည်မှုများနှင့် အောက်လမ်းအစီအမံများအကြောင်း ပြောဆိုမှုများမှာ ယနေ့ခေတ်အထိ ရှိနေဆဲ ဖြစ်သည်။
ဂါနာနိုင်ငံသားတစ်ဦးက အင်္ဂလန်အသင်းခေါင်းဆောင်နှင့် ကမ္ဘာကျော်တိုက်စစ်မှူး ဟာရီကိန်းကို ဂိုးမသွင်းနိုင်အောင် Juju အစီအမံများ အသုံးပြုသွားမည်ဟု လူမှုကွန်ရက်များပေါ်တွင် ထုတ်ဖော်ပြောကြားခဲ့သည်။
ပွဲစဉ်အတွင်း၌လည်း ၎င်းအား ကွင်းဘေးတွင် ထူးခြားသည့် ရိုးရာအခမ်းအနားပုံစံများ၊ မန္တန်ရွတ်ဆိုမှုများနှင့် အခြားဂမ္ဘီရဆန်သည့် လှုပ်ရှားမှုများ ပြုလုပ်နေသည်ဟု ဆိုထားသော ဓာတ်ပုံများနှင့် ဗီဒီယိုများ ပျံ့နှံ့လာခဲ့သည်။
ပရိသတ်အချို့က ယင်းဖြစ်ရပ်ကို ရယ်စရာအဖြစ် သဘောထားခဲ့ကြသော်လည်း ပွဲအပြီးတွင် ဟာရီကိန်းက ဂိုးသွင်းယူနိုင်ခြင်း မရှိခဲ့သဖြင့် Juju အစီအမံများနှင့် ပတ်သက်ပြီး ဆွေးနွေးမှုများ ပြန်လည်မြင့်တက်လာခဲ့သည်။
သို့သော် ဘောလုံးကျွမ်းကျင်သူများကတော့ ကစားသမားတစ်ဦး၏ စွမ်းဆောင်ရည်သည် နည်းဗျူဟာ၊ ပြိုင်ဘက်၏ ခံစစ်စနစ်၊ ပွဲအခြေအနေနှင့် ကိုယ်ပိုင်ခြေစွမ်းတို့အပေါ်တွင်သာ အဓိက မူတည်ကြောင်း သုံးသပ်ထားကြသည်။
ထို့ကြောင့် ဟာရီကိန်း ဂိုးမသွင်းနိုင်ခဲ့ခြင်းမှာ ရိုးရိုးတိုက်ဆိုင်မှုသာ ဖြစ်သည်လား၊ သို့မဟုတ် Juju အစီအမံများ၏ လျှို့ဝှက်သက်ရောက်မှုများ ရှိနေသည်လား ဆိုသည်မှာ ပရိသတ်များကြား အငြင်းပွားဖွယ်ရာ အကြောင်းအရာတစ်ခုအဖြစ် ဆက်လက်တည်ရှိနေဆဲ ဖြစ်သည်။