By Reuters
ဗင်နီဇွဲလားနိုင်ငံတွင် ပြီးခဲ့သည့် ဗုဒ္ဓဟူးနေ့က လှုပ်ခတ်ခဲ့သည့် ပြင်းထန်သော ငလျင်ဘေးဒဏ်ကြောင့် လက်ရှိအချိန်အထိ သေဆုံးသူအရေအတွက်သည် အနည်းဆုံး ၁,၄၅၀ ဦးအထိ မြင့်တက်လာကြောင်း သိရသည်။
ငလျင်ဒဏ်ကို အဆိုးရွားဆုံး ခံခဲ့ရသည့် ကမ်းရိုးတန်းဒေသ လာဂွိုင်ရာ (La Guaira) ပြည်နယ်တွင် အဆောက်အအုံများစွာ ပြိုကျပျက်စီးခဲ့ပြီး လက်ရှိအချိန်အထိ လူပေါင်း သောင်းနှင့်ချီ၍ ပျောက်ဆုံးနေဆဲဖြစ်သဖြင့် ရှာဖွေကယ်ဆယ်ရေးလုပ်ငန်းများကို အပြင်းအထန် ဆောင်ရွက်နေရသည်။
ယင်းသို့ ရှာဖွေနေစဉ်အတွင်း ဇွန်လ ၂၈ ရက် တနင်္ဂနွေနေ့တွင် ပြိုကျပျက်စီးသွားသည့် အဆောက်အအုံအပျက်အစီးများအောက်၌ ၄ ရက်တိုင်တိုင် ပိတ်မိနေခဲ့သည့် ဖခင်နှင့်သားဖြစ်သူတို့ကို ကယ်ဆယ်ရေးသမားများက အသက်ရှင်လျက် ပြန်လည်ကယ်တင်နိုင်ခဲ့သည်။
အဆိုပါ ကယ်ဆယ်ရေးလုပ်ငန်းကို ပြင်သစ်အရပ်ဘက်လုံခြုံရေးအဖွဲ့နှင့် အမေရိကန် ဖဲဖက်ခ် (Fairfax) ခရိုင် မြို့ပြရှာဖွေရေးအဖွဲ့တို့ ပူးပေါင်းကာ အထူးရှာဖွေရေးကင်မရာများကို အသုံးပြု၍ ပြိုကျလုနီးပါးဖြစ်နေသည့် အပျက်အစီးများကြားမှ ၁၂ နာရီကြာ အသည်းအသန် ကြိုးပမ်းဆောင်ရွက်ခဲ့ရခြင်း ဖြစ်သည်။
၄ ရက်တိုင် အစားအစာနှင့် ရေမရှိဘဲ ပိတ်မိနေခဲ့သည့် သားအဖနှစ်ဦးမှာ အလွန်အမင်း အားအင်ချိနဲ့နေသဖြင့် အပြင်သို့ ဆွဲမထုတ်မီ အပျက်အစီးများအောက်၌ပင် သွေးကြောထဲ ဆေးသွင်းခြင်းနှင့် ရေဓာတ်ဖြည့်တင်းခြင်းများကို လုပ်ဆောင်ခဲ့ရသည်။
၎င်းပူးပေါင်းကယ်ဆယ်ရေးအဖွဲ့သည် ပြီးခဲ့သည့်ရက်ပိုင်းကလည်း မိခင်ဖြစ်သူနှင့် ၉ လအရွယ် ကလေးငယ်တစ်ဦးကို ကယ်တင်နိုင်ခဲ့သဖြင့် လက်ရှိအချိန်အထိ စုစုပေါင်း လူ ၃၃ ဦးကို အသက်ရှင်လျက် ကယ်ဆယ်ထားနိုင်ခဲ့ပြီ ဖြစ်သည်။
သို့သော်လည်း ပညာရှင်များ၏ ထုတ်ပြန်ချက်အရ ငလျင်လှုပ်ခတ်ပြီးနောက် ကယ်ဆယ်ရေးအတွက် အရေးပါသည့် ၇၂ နာရီ (Golden Hours) ကျော်လွန်သွားပြီဖြစ်၍ အပျက်အစီးများအောက်မှ လူများ အသက်ရှင်လျက် ရှိနေနိုင်ခြေ ခန့်မှန်းချက်မှာ သိသိသာသာ ကျဆင်းသွားပြီဖြစ်သည်။
ကယ်ဆယ်ရေးအဖွဲ့များက ကံကောင်း၍ အသက်ရှင်ကျန်ရစ်သူ အနည်းစုကို တွေ့ရှိနေရသော်လည်း ပျောက်ဆုံးနေသူ သောင်းနှင့်ချီအတွက် အချိန်ကြာလာသည်နှင့်အမျှ မျှော်လင့်ချက် မှေးမှိန်လာနေပြီး သေဆုံးသူစာရင်းမှာ ယခုထက်မက ထပ်မံမြင့်တက်လာနိုင်ကြောင်း ခန့်မှန်းထားကြသည်။
လက်ရှိအချိန်ထိ ထိုငလျင်အတွင်း ပျောက်ဆုံးနေသူပေါင်း ငါးသောင်းနှင့်အထက် ကျန်ရှိနေသေးကြောင်း နိုင်ငံတကာသတင်းဌာနများ၏ ဖော်ပြချက်အရ သိရသည်။