စစ်ကိုင်းတိုင်း၊ မြင်းမူမြို့နယ်တွင် ပြည်သူ ၄၀ ကျော်ကို ဓားစားခံအဖြစ် စစ်တပ်က ဖမ်းဆီးခဲ့ကြောင်း သိရသည်။
ယနေ့ (စက်တက်ဘာ ၂၄ရက်)တွင် မြင်းမူမြို့နယ်၌ အင်အား ၂၀၀ ကျော်ပါသည့် စစ်ကြောင်းက ပြည်သူ ၄၀ ကျော်ကို ဓားစာခံအဖြစ်ဖမ်းဆီးပြီး ကန်တော်ရွာဘက်သို့ စစ်ကြောင်းထိုးခဲ့ကြောင်း People’s Knight Defence Force – Myinmu (PKDF-MMU)အဖွဲ့ထံက သိရသည်။
” မနေ့တုန်းက မြင်းမူမြို့ အထက ၁ထဲမှာ စကစ ၁၂ဘီးကားတစ်စီးရယ်၊ ၆ဘီးကား ၂စီးရယ်၊ အိမ်စီးကားတစ်စီးရယ် မနေ့တုန်းက အင်အားဖြည့်တင်းထားပြီးတော့ ခုမြင်းမူအထက ၁ ကနေ ထီးဆောင်းဘက်ကို ထွက်လာပြီးတော့ ထီးဆောင်းကနေ ကန်တော်ရွာဘက်ကို ထွက်လာတယ်ဗျ “ဟု People’s Knight Defence Force – Myinmu (PKDF-MMU)မှ တာဝန်ရှိသူ ရဲဘော်အေးချမ်းက MPA သို့ပြောသည်။
ယင်းစစ်ကြောင်းသည် ထီးဆောင်ရွာမှ ကန်တော်ရွာသို့ ပြန်ထွက်စဉ် ဒေသခံပြည်သူ ၄၀ကျော်ကို ဖမ်းဆီးခဲ့ခြင်းဖြစ်သည်။
” လောလောဆယ်တော့ တိတိပပမသိရသေးဘူးဗျ။ အများစုကတော့ ထီးဆောင်းရွာထဲကလို့ ယူဆရတယ်ဗျ” ဟု ၎င်းက ဆက်လက်ပြောသည်။
ထီးဆောင်းရွာသည် ချောင်းဦး-မြင်းမူလမ်းပိုင်းပေါ်၌ရှိသည့် ကျေးရွာဖြစ်ပြီး ထီးဆောင်းရွာနှင့် မြင်းမူကြား၌ စစ်ဆေးရေးဂိတ်လည်းရှိကာ ဒေသခံပြည်သူများသည် စစ်ကြောင်းများလာလည်း ထွက်ပြေးတိမ်းရှောင်လေ့မရှိကြောင်း သိရသည်။
ယင်းစစ်ကြောင်းသည် ကန်တော်ရွာဘက်သို့လည်း လက်နက်ကြီးများဖြင့် ပစ်ခတ်နေပြီး ညနေ လေးနာရီခန့်တွင် ထီးဆောင်ရွာဘက်သို့ပြန်ဆုတ်သွားသော်လည်း ဓားစားခံများ လွတ်၊မလွတ်ကိုမူ မသိရသေးပေ။
ယင်းစစ်ကြောင်းကြောင့် ကန်တော်ရွာနှင့် ဆပ်ပြာကျင်းရွာမှ ဒေသခံပြည်သူများ ထွက်ပြေးတိမ်းရှောင်နေရကြောင်းသိရသည်။