ရှမ်းပြည်နယ်တောင်ပိုင်း၊ တောင်ကြီးမြို့တွင် အရက်သေစာ သောက်စားမူးယစ်ရာမှ စတင်ခဲ့သည့် အာဃာတဒေါသတရားကြောင့် ရန်စရှိသူ လူငယ်နှစ်ဦး ထပ်မံရန်ဖြစ်ရာမှ တစ်ဦးက ဓားဖြင့်မသေမချင်းထိုးသတ်၍ ပွဲချင်းပြီးသေဆုံးခဲ့ရသည့်ဖြစ်ရပ်ဖြစ်ပွားခဲ့ကြောင်း သိရသည်။
ဇူလိုင်လ ၉ ရက် ယမန်နေ့ နံနက် ၁၀ နာရီဝန်းကျင်တွင် တောင်ကြီးမြို့၊ စိန်ပန်းရပ်ကွက်၊ နှင်းဆီလမ်းထိပ်၌ တစ်ရပ်ကွက်တည်း နေထိုင်ကြသည့် လူငယ်နှစ်ဦးဖြစ်သော ကိုထွန်းထွန်းနိုင်နှင့် ကိုထက်ပိုင်မှူးတို့ လမ်းထိပ်တွင် ရန်ဖြစ်စကားများရာမှတစ်ဆင့် ဓားထိုးမှု ဖြစ်ပွားခဲ့ခြင်း ဖြစ်သည်ဟု ဖြစ်စဉ်သိရှိသူများထံမှ သိရသည်။
ပြစ်မှုကျူးလွန်သူ ကိုထွန်းထွန်းနိုင်သည် ကိုထက်ပိုင်မှူးအား ဓားဖြင့် ၈ ချက်ခန့်အထိ မသေမချင်း ထိုးနှက်ခဲ့သဖြင့် ကိုထက်ပိုင်မှူးမှာ ရင်ဘတ်၊ လည်ပင်း၊ လက်ပြင်နှင့် ဂုတ်ပိုးတို့တွင် ပြင်းထန်သည့် ဓားဒဏ်ရာများစွာရရှိကာ အခင်းဖြစ်ပွားရာနေရာ၌ပင် ပွဲချင်းပြီး သေဆုံးသွားခဲ့ရသည်ဟု ဆိုသည်
အဆိုပါ ဖြစ်စဉ်နှင့်ပတ်သက်၍ တစ်ရပ်ကွက်တည်းနေထိုင်ပြီး ဖြစ်စဉ်ကို သိရှိထားသည့် ဒေသခံမျက်မြင်သက်သေတစ်ဦးက ယခုလို ပြောပြသည်။
“သူတို့နှစ်ယောက်က ပြီးခဲ့တဲ့ရက်ပိုင်းကတည်းက အရက်ဆိုင်မှာ အတူတူသောက်ရင်း စကားများ ရန်ဖြစ်ထားကြတာ။ အဲဒီတုန်းက ပတ်ဝန်းကျင်က ဝိုင်းဖြန်ဖြေပေးလိုက်လို့ ပြီးသွားတယ် ထင်နေတာ။ ဒါပေမဲ့ အရက်ခွက်ထဲကစတဲ့ ရန်ငြိုးကို ရင်ထဲမှာ မမေ့ဘဲ သယ်လာကြပုံရတယ်။ မနေ့မနက် လမ်းထိပ်မှာ ပြန်တွေ့တော့ ဒေါသမီး ပေါက်ကွဲပြီး ဓားနဲ့ပြေးထိုးတဲ့အထိ ဖြစ်သွားတာပဲ။ ကောင်လေးက နေရာတင် လဲကျပြီး သေသွားတာ၊ သိပ်ကို စိတ်မကောင်းဖို့ကောင်းပါတယ်” ဟု ၎င်းက ပြောသည်။
ပြစ်မှုကျူးလွန်ပြီးနောက် ကိုထွန်းထွန်းနိုင်သည် ထွက်ပြေးတိမ်းရှောင်ခြင်းမရှိဘဲ ရပ်ကွက်အုပ်ချုပ်ရေးမှူးရုံးသို့ ကိုယ်တိုင်လာရောက်အဖမ်းခံခဲ့ကြောင်း သိရသည်။
လက်ရှိတွင် တောင်ကြီးမြို့မရဲစခန်းက ပြစ်မှုကျူးလွန်သူ ကိုထွန်းထွန်းနိုင်ကို ရာဇသတ်ကြီးဥပဒေပုဒ်မ ၃၀၂ (လူသတ်မှု) ဖြင့် အမှုဖွင့်လှစ်ကာ တရားဥပဒေအရ ထိရောက်စွာ အရေးယူနိုင်ရန် စစ်ဆေးဆောင်ရွက်လျက်ရှိသည်ဟု သိရသည်။
ယင်းဖြစ်စဉ်သည် ရိုးရိုးရှင်းရှင်း ရာဇဝတ်မှုတစ်ခုတင်မကဘဲ လက်ရှိမြန်မာ့လူ့အဖွဲ့အစည်းအတွင်းရှိ အခြေခံလူတန်းစား လူငယ်များကြား စိတ်ပိုင်းဆိုင်ရာ ထိန်းချုပ်နိုင်စွမ်းကင်းမဲ့လာမှုနှင့် မူးယစ်ဆေးဝါး၊ အရက်သေစာ၏ သားကောင်ဖြစ်နေရသည့် အခြေအနေကို မီးမောင်းထိုးပြနေသည်။
အဆိုပါ လူသတ်မှုနှင့်ပတ်သက်၍ တောင်ကြီးမြို့ခံတစ်ဦးက “အခုနောက်ပိုင်း ရပ်ကွက်တွေထဲမှာ ဥပဒေစိုးမိုးမှုက လုံးဝအားနည်းလာတယ်။ အဲဒါကြောင့် စိတ်အလိုလိုက်ပြီး လက်ရဲဇာတ်ရဲ ကျူးလွန်တဲ့ အလေ့အထတွေက ပိုကြီးစိုးလာတာ။ စစ်တပ်က အာဏာသိမ်းပြီးနောက်ပိုင်း ကပ်ပါလာတဲ့ ကုန်ဈေးနှုန်းကြီးမြင့်မှု၊ အလုပ်အကိုင်ရှားပါးမှု စတဲ့ လူမှုစီးပွား အဆင်မပြေမှုတွေက လူငယ်တွေကို စိတ်ပိုင်းဆိုင်ရာ ချို့ယွင်းလာစေပြီး အရက်နဲ့မူးယစ်ဆေးဘက် ရောက်သွားစေတာ။ ဒီလို ဒေါသနဲ့ အာဃာတတွေ ရပ်ကွက်ထဲအထိ အမြစ်တွယ်နေတာဟာ အာဏာသိမ်းမှုရဲ့ နောက်ဆက်တွဲ ဆိုးကျိုးတွေကြောင့်ပဲ ဖြစ်ပါတယ်။ ပြီးတော့ အခုဖြစ်တဲ့ စိန်ပန်းရပ်ကွက်ဆိုတာကလည်း လူစုံတယ်၊ စရိုက်စုံတယ်။ အမြဲတမ်းလိုလို မှုခင်းတွေကို ကြားသိနေရတယ်” ဟု မြို့ခံတစ်ဦးက ထောက်ပြပြောဆိုသည်။
အသိဉာဏ်ကို ကွယ်ပိတ်စေသည့် အရက်သေစာကြောင့် လူငယ်တစ်ယောက် အသက်ဆုံးရှုံးခဲ့ရသလို၊ ကျန်လူငယ်တစ်ယောက်မှာလည်း လူသတ်သမားဘဝဖြင့် ထောင်တံခါးနောက်ကွယ်သို့ ရောက်ရှိသွားခဲ့ရသည့် ယခုဖြစ်စဉ်သည် လူ့အဖွဲ့အစည်းအတွက် သတိပေးခေါင်းလောင်းသံတစ်ခု ဖြစ်နေကြောင်း သုံးသပ်မှုများ ထွက်ပေါ်နေသည်။