ဒေါ်အောင်ဆန်းစုကြည်ကို ညီမဖြစ်သူနှင့် ထားရှိဟု စစ်ကော်မရှင်က ပြောသော်လည်း အာဆီယံကိုယ်စားလှယ်နှင့် တွေ့ခွင့်မပြုသေး

၂၀၂၁ ခုနှစ်နောက်ပိုင်း ၅ နှစ်တာကာလအတွင်း ပထမဆုံးအကြိမ်အဖြစ် အာဆီယံနိုင်ငံခြားရေးဝန်ကြီးများနှင့် မြန်မာစစ်ကော်မရှင်၏ နိုင်ငံခြားရေးဝန်ကြီး ဦးတင်မောင်ဆွေတို့အကြား လူချင်းတွေ့ဆုံသည့် အလွတ်သဘော အထူးအစည်းအဝေးကို ထိုင်းနိုင်ငံ ဘန်ကောက်မြို့၌ ယနေ့ (ဇူလိုင် ၁၂ ရက်) တွင် ကျင်းပခဲ့သည်။

ယခုအစည်းအဝေးမှ ထွက်ပေါ်လာသည့် အရေးပါဆုံးနှင့် ထူးခြားဆုံး အလှည့်အပြောင်းတစ်ခုမှာ ယခင်က သွားလာခွင့် ကန့်သတ်ထားသည့် တိုက်ပွဲနယ်မြေများအပါအဝင် ဘေးဒုက္ခကြုံတွေ့နေရသည့် လူထုထံသို့ အာဆီယံအထူးကိုယ်စားလှယ်ကိုယ်တိုင် သွားရောက်ပြီး လူသားချင်းစာနာမှုဆိုင်ရာ ကူညီပံ့ပိုးမှုများ တိုးမြှင့်လုပ်ဆောင်နိုင်ရန် စစ်ကော်မရှင်ဘက်က လမ်းဖွင့်ပေးလိုက်ခြင်းပင် ဖြစ်သည်။

အစည်းအဝေးအပြီး ပြုလုပ်သည့် သတင်းစာရှင်းလင်းပွဲတွင် အာဆီယံအလှည့်ကျဥက္ကဋ္ဌ၏ မြန်မာနိုင်ငံဆိုင်ရာ ဖီလစ်ပိုင်အထူးကိုယ်စားလှယ် မာရီယာ ထရီဆာ လာဇာရိုက ယခုနှစ် ဒုတိယနှစ်ဝက်အတွင်း အာဆီယံဖွံ့ဖြိုးရေးမိတ်ဖက်များ၊ AHA စင်တာတို့နှင့် ပူးပေါင်းကာ မြန်မာနိုင်ငံသို့ လူသားချင်းစာနာမှု မစ်ရှင်ခရီးစဉ် သွားရောက်ရန် ရှိနေကြောင်း အတည်ပြုခဲ့ပြီး၊ စစ်ကော်မရှင်ဘက်က ယခုကဲ့သို့ လမ်းဖွင့်ပေးလာခြင်းအပေါ် “ဒါဟာ ချက်ခြင်းလက်ငင်း တစ်ကြိမ်တည်းနဲ့ လုပ်လို့မရနိုင်တဲ့ ထူးခြားတဲ့ ရုပ်လုံးပေါ် လှုပ်ရှားမှုတစ်ခု ဖြစ်ပါတယ်” ဟု ပြောကြားခဲ့သည်။

ထို့ပြင် အများပြည်သူ စိတ်ဝင်စားနေသည့် ဒေါ်အောင်ဆန်းစုကြည်၏ ကျန်းမာရေးအခြေအနေနှင့် ပတ်သက်၍လည်း စစ်ကော်မရှင်နိုင်ငံခြားရေးဝန်ကြီးဘက်က နိုင်ငံတော်အတိုင်ပင်ခံပုဂ္ဂိုလ်အား သတ်မှတ်ထားသည့် နေအိမ်သို့ ပြောင်းရွှေ့ထားပြီး ကျန်းမာရေးကောင်းမွန်ကြောင်း၊ ၎င်း၏ ညီမတစ်ဦးနှင့်ထားရှိကာ စောင့်ရှောက်ထားသည်ဟု သံတမန်များကို ပြောကြားခဲ့ကြောင်း မစ္စ လာဇာရိုက ထည့်သွင်းပြောဆိုခဲ့သည်။

သို့သော် အထူးကိုယ်စားလှယ်ကိုယ်တိုင် လူချင်းတွေ့ဆုံ စိစစ်ခွင့်ရရန် တောင်းဆိုချက်ကိုမူ စစ်ကော်မရှင်ဘက်က ခွင့်ပြုခြင်း မရှိသေးပေ။

ဆွေးနွေးပွဲကို ကြားခံညှိနှိုင်းပေးခဲ့သည့် ထိုင်းဒုတိယဝန်ကြီးချုပ်နှင့် နိုင်ငံခြားရေးဝန်ကြီး သီဟစပ် ဖူအန်ကေအိုကမူ ဤခြေလှမ်းသည် အခြေအနေပေါ်မူတည်၍ ချိန်ညှိထိတွေ့ဆက်ဆံသည့် နည်းဗျူဟာသစ်ဖြစ်ကြောင်း ပြောကြားခဲ့ပြီး “ဒါဟာ နှစ်ဦးနှစ်ဖက်သွားရမယ့်လမ်း ဖြစ်ပါတယ်။ မြန်မာဘက်ကလည်း အာဆီယံနဲ့ နိုင်ငံတကာရဲ့ စိုးရိမ်ပူပန်မှုတွေကို ဖြေရှင်းဖို့ လက်ကမ်းလာရပါမယ်” ဟု နေပြည်တော်သို့ သတိပေးချက် ထည့်သွင်းပြောဆိုခဲ့သည်။

သို့သော် သတင်းစာရှင်းလင်းပွဲအတွင်း နိုင်ငံတကာသတင်းထောက်များက မြန်မာ့လွှတ်တော်အမတ်များကိုယ်တိုင်က ဆီလျော်မှုမရှိတော့ဟု ပယ်ချထားသည့် ဘုံသဘောတူညီချက် ၅ ချက်ကို အာဆီယံက ဘာကြောင့် ဆက်လက်ဖက်တွယ်နေသနည်းဟူသည့်အချက်နှင့် တိုးတက်မှုများကို တိုင်းတာမည့် အချိန်ဇယားအတိအကျ မရှိခြင်းတို့အပေါ် ပြင်းပြင်းထန်ထန် ဖိအားပေး မေးမြန်းခဲ့ကြသည်။

အဆိုပါ တာဝန်ခံမှုဆိုင်ရာ မေးခွန်းများနှင့် ပတ်သက်၍ အာဆီယံအထူးကိုယ်စားလှယ် လာဇာရိုက “ဒါက တဖြည်းဖြည်း ပြောင်းလဲတိုးတက်နေတာဖြစ်လို့ ရက်စွဲတွေ သတ်မှတ်လို့မရပါဘူး” ဟု ဝန်ခံခဲ့ပြီး၊ ထိုင်းနိုင်ငံခြားရေးဝန်ကြီး သီဟစပ်ကမူ ယခုနှစ် အာဆီယံထိပ်သီးအစည်းအဝေးသည် မြန်မာ့အရေး သိသာထင်ရှားသည့် တိုးတက်မှု ရှိ၊ မရှိကို လက်တွေ့ကျကျ အကဲဖြတ်မည့် အလှည့်အပြောင်းတစ်ခု ဖြစ်လာလိမ့်မည်ဟု ပြောကြားခဲ့သည်။

ယနေ့ကျင်းပခဲ့သည့် ဘန်ကောက်ဆွေးနွေးပွဲသည် စစ်ကော်မရှင်ဘက်က တိုက်ပွဲနယ်မြေများသို့ ဝင်ရောက်ခွင့် လမ်းဖွင့်ပေးလိုက်ခြင်းဖြင့် ၅ နှစ်တာ အကျပ်အတည်းကို အမှန်တကယ် အရည်ပျော်စေမည့် အစပြုခြင်း ဖြစ်လာမလား သို့မဟုတ် အချိန်ဆွဲသည့် နည်းဗျူဟာတစ်ခုမျှသာ ဖြစ်မလားဆိုသည်မှာ လာမည့်ရက်ပိုင်းအတွင်း ကျင်းပမည့် အာဆီယံနိုင်ငံခြားရေးဝန်ကြီးများ အစည်းအဝေးတွင် ဆက်လက်စောင့်ကြည့်ရဖွယ် ရှိနေသည်။