ရုရှားနိုင်ငံက လာမည့်နှစ်တွင် မြောက်ကိုရီးယား၏ ပင်လယ်ကြမ်းပြင်၌ သဘာဝဓာတ်ငွေ့နှင့် ရေနံ ရှာဖွေရေးအတွက် ဒေါ်လာသန်းပေါင်းများစွာကို ရင်းနှီးမြှုပ်နှံရန် ပြင်ဆင်နေကြောင်း NK News ၏ စုံစမ်းစစ်ဆေးမှုအရ တွေ့ရှိရသည်။
အဆိုပါ စီမံကိန်းသည် ရုရှား၏ အရှေ့ဖျားဒေသအနီးရှိ ဟိုက်ဒရိုကာဗွန် (hydrocarbons) သိုက်များကို ထပ်မံရယူနိုင်ရန်နှင့် မြောက်ကိုရီးယား၏ ကာလကြာရှည်ဖြစ်နေသော စွမ်းအင်ရှားပါးမှုကို ကူညီဖြေရှင်းရန် စီမံချက်၏ တစ်စိတ်တစ်ပိုင်း ဖြစ်သည်။
ရုရှားဘဏ္ဍာရေးဝန်ကြီး ပထမဦးစီးအရာရှိ အီရီနာ အိုကလဒ်နီကိုဗာက ၂၀၂၆-၂၀၂၈ ခုနှစ်အတွက် ရုရှားဖက်ဒရယ်ဘတ်ဂျက်မူကြမ်းကို ပြန်လည်သုံးသပ်ရာ၌ လွှတ်တော် ဘတ်ဂျက်နှင့် အခွန်ကော်မတီသို့ ပြောကြားရာ၌ သမ္မတ ဗလာဒီမာ ပူတင်က မြောက်ကိုရီးယား ပင်လယ်ကြမ်းပြင်ရှိ “Sea of Japan ၏ ရေနက်ပိုင်းတွင် ရေနံနှင့် သဘာဝဓာတ်ငွေ့ အလားအလာကို အကဲဖြတ်ရန်” အဆိုပြုချက်ကို တင်သွင်းခဲ့ကြောင်း ပြောကြားခဲ့သည်။
ရုရှားနိုင်ငံသည် ၂၀၂၆ ခုနှစ်တွင် ရှာဖွေရေး စီမံကိန်းကို လုပ်ဆောင်ရန်အတွက် ဒေါ်လာ ၁၁ သန်း (ရူဘယ် သန်း ၈၉၀) နီးပါး ရင်းနှီးမြှုပ်နှံရန် စီစဉ်ထားကြောင်း ကော်မတီမှ ထုတ်ပြန်သည့် နောက်ဆက်တွဲ စာရွက်စာတမ်းများက ဖော်ပြသည်။
တရားဝင် ဝယ်ယူရေးစာရွက်စာတမ်းများအရ ရုရှားသည် ကိုရီးယား အရှေ့ပင်လယ်ရှိ လီနီယာ ကီလိုမီတာ ၂,၃၀၀ ၌ ပင်လယ်ကြမ်းပြင်အောက်ရှိ ရေနံနှင့် သဘာဝဓာတ်ငွေ့ကို ရှာဖွေရာတွင် အသုံးပြုသည့် နည်းပညာတစ်ခုဖြစ်သော Hydromagnetic စစ်တမ်းကောက်ယူခြင်းများကို လုပ်ဆောင်နေကြောင်း တွေ့ရှိရပြီး ၎င်းသည် နောင်အနာဂတ်တွင် ထိုဒေသ၌ ဘူမိဗေဒဆိုင်ရာ ရှာဖွေမှုများအတွက် ပြင်ဆင်ထားပြီးဖြစ်ကြောင်း ဖော်ပြနေသည်။