တရုတ်သမ္မတအနေဖြင့် စစ်ရေးပြအခမ်းအနားကြီးတွင် အမေရိကန်၏ ကျေးဇူးကို ဖော်ပြသင့်သည်ဟု ထရန့်ပ်ပြောကြား

တရုတ်နိုင်ငံတွင် ပေကျင်းမြို့တွင် စက်တင်ဘာလ ၃ ရက်က ပြုလုပ်ခဲ့သည့် ဒုတိယကမ္ဘာစစ်ပြီးဆုံးခြင်း အထိမ်းအမှတ် အခမ်းအနားတွင် ဂျပန်ကို အနိုင်ရရှိရေးအတွက် အမေရိကန်၏ အခန်းကဏ္ဍကို ဖော်ပြသင့်သည်ဟု သမ္မတ ဒေါ်နယ်ထရန့်ပ်က ပြောကြားလိုက်သည်။

ဘေဂျင်း၌ တွေ့ဆုံနေသော နိုင်ငံခြားခေါင်းဆောင်များသည် အမေရိကန်ကို ပူးပေါင်းကြံစည်နေနိုင်ကြောင်း အွန်လိုင်းလူမှုကွန်ရက်တွင် ထရန့်ပ်ကအရိပ်အမြွက်ပြောကြားပြီး နာရီပိုင်းအကြာတွင် “ ဒါဟာ လှပတဲ့အခမ်းအနားလို့ ထင်ပါတယ်။ အလွန်အလွန် ထူးခြားတယ်လို့လည်း ထင်ပါတယ်” ဟု အိုဗယ်ရုံးခန်း၌ သတင်းထောက်များကို ပြောကြားခဲ့သည်။

“ပြီးခဲ့သည့်ညက မိန့်ခွန်းကို ကြည့်ခဲ့ပါတယ်။ သမ္မတရှီကျင့်ဖျင်ဟာ ကျွန်ုပ်ရဲ့ မိတ်ဆွေပါ။ ဒါပေမဲ့ ပြီးခဲ့သည့်ညက မိန့်ခွန်းမှာ အမေရိကန် ကို ထည့်သွင်းပြောကြားသင့်တယ်လို့ ကျွန်ုပ်ထင်ပါတယ်၊ ဘာကြောင့်လဲဆိုတော့ အမေရိကန်ဟာ တရုတ်ကို အများကြီးကူညီခဲ့လို့ပါ” ဟု ထရန့်ပ်က ပြောကြားခဲ့သည်။

တရုတ်သမ္မတ ရှီကျင့်ဖျင်သည် စစ်ပွဲပြီးဆုံးခြင်း၏ နှစ် ၈၀ ပြည့်နှစ်ပတ်လည်နေ့ကို ၎င်း၏အစိုးရ၊ အမေရိကန်အစိုးရတို့နှင့် ဆန့်ကျင်ဘက်ဖြစ်နေသော နိုင်ငံများအကြား ခိုင်မာသောဆက်ဆံရေးကို ပြသသည့် အဓိကအခမ်းအနားတစ်ခုအဖြစ် ပြုလုပ်ခဲ့သည်။

ပူတင်နှင့် ကင်ဂျုံအွန်တို့၏ ဘေးတွင် ရှီကျင့်ဖျင်က တီယန်အန်မင်ရင်ပြင်ရှိ လူ ၅၀,၀၀၀ ကျော် ပရိသတ်ရှေ့တွင် မိန့်ခွန်းပြောကြားခဲ့သည်။ သူသည် အမေရိကန်အပါအဝင် ပြိုင်ဘက်များကို ဟန့်တားရန် ရည်ရွယ်သည့် စစ်သားများ စီတန်းလှည့်လည်ခြင်းနှင့် ခေတ်မီစစ်အသုံးအဆောင်ပစ္စည်းများကို ကြည့်ရှုခဲ့သည်။

၁၉၃၇ ခုနှစ်တွင် ဂျပန်က တရုတ်ကို ကျူးကျော်ဝင်ရောက်ခဲ့ခြင်းသည် ဒုတိယကမ္ဘာစစ် ဖြစ်ပွားစေမည့် တိုက်ခိုက်မှုကြီးတစ်ခုဖြစ်သည်။ ၁၉၄၅ ခုနှစ်တွင် ဂျပန်လက်နက်ချခြင်းသည် စစ်ပွဲ၏အဆုံးသတ်ကို ဖော်ညွှန်းသည်။ အမေရိကန်က၁၉၄၁ ခုနှစ်တွင် စစ်ပွဲထဲသို့ ဝင်ရောက်ခဲ့ပြီး ဂျပန်စစ်တပ်ကို တိုက်ခိုက်နေသည့် တရုတ်တပ်ဖွဲ့များကို ကူညီခဲ့ကာ ဂျပန်၏ ရှုံးနိမ့်မှုတွင် အဆုံးအဖြတ်ပေးသည့် အခန်းကဏ္ဍမှ ပါဝင်ခဲ့သည်။

ပစ္စုပ္ပန်နိုင်ငံရေးတိုက်ပွဲများအတွက် သမိုင်းကို အသုံးပြု၍ ရှီကျင့်ဖျင်သည် ဒုတိယကမ္ဘာစစ်ကို ၎င်း၏ တရုတ်ကွန်မြူနစ်ပါတီနှင့် မဟာမိတ်များအုပ်ချုပ်သည့် “တရုတ်လူမျိုး၏ ကြီးမားသော ပြန်လည်နိုးကြားမှု” တွင် အဓိက အချိုးအကွေ့တစ်ခုအဖြစ် သရုပ်ဖော်ခဲ့သည်။

ရှီကျင့်ဖျင်က “တရုတ်ပြည်သူလူထုကို ထောက်ပံ့ကူညီခဲ့သည့် နိုင်ငံခြားအစိုးရများနှင့် နိုင်ငံတကာမိတ်ဆွေများ” ကို ကျေးဇူးတင်ရှိကြောင်း ပြောကြားခဲ့သော်လည်း စစ်ပွဲတွင် အမေရိကန်၏ အခန်းကဏ္ဍကို အလေးထားပြောကြားခဲ့ခြင်း မရှိပေ။

အမေရိကန်-တရုတ်ဆက်ဆံရေးသည် တင်းမာနေသော အခြေအနေသို့ ရောက်ရှိနေသည်။ နှစ်နိုင်ငံသည် ယူကရိန်းစစ်ပွဲအပြင် တောင်တရုတ်ပင်လယ်အထိ လုံခြုံရေးကိစ္စရပ်များစွာနှင့်ပတ်သက်၍ သဘောထားကွဲလွဲနေပြီး အချင်းချင်း၏ ကုန်ပစ္စည်းများအပေါ် အခွန်စည်းကြပ်မှုများကို ရပ်တန့်ရန်အတွက် ကျယ်ပြန့်သော ကုန်သွယ်ရေးသဘောတူညီချက်တစ်ရပ်အတွက် အငြင်းပွားနေကြသည်။

သို့သော် ထရန့်ပ်သည် ရှီကျင့်ဖျင်နှင့် ရင်းနှီးသော ပုဂ္ဂိုလ်ရေးဆက်ဆံရေးကို အကြိမ်ကြိမ် ချီးကျူးပြောဆိုခဲ့ပြီး ၎င်း၏အကူအညီများက ကမ္ဘာ့အကြီးဆုံးစီးပွားရေးနိုင်ငံနှစ်ခုကို အပြုသဘောဆောင်သည့် ဦးတည်ရာသို့ ဦးဆောင်နိုင်သည်ဟု ဆိုသည်။ သူသည် မကြာမီ ရှီကျင့်ဖျင်နှင့် တွေ့ဆုံနိုင်ကြောင်းလည်း ပြောကြားခဲ့သည်။

စစ်ရေးပြအခမ်းအနား စတင်ချိန်တွင် ထရန့်ပ်က Truth Social တွင် ရှီကျင့်ဖျင်ကို ရည်ညွှန်း၍ “ခင်ဗျားတို့ အမေရိကန်ကို ပူးပေါင်းကြံစည်နေတဲ့အတွက် ဗလာဒီမီယာပူတင်နဲ့ ကင်ဂျုံအွန်ကို ကျုပ်ရဲ့ နွေးထွေးတဲ့နှုတ်ခွန်းဆက်စကား ပေးလိုက်ပါ” ဟု ရေးသားခဲ့သည်။

ရုရှားအစိုးရက ၎င်းတို့သည် ပူးပေါင်းကြံစည်ခြင်းမရှိကြောင်းနှင့် အဆိုပါပြောကြားချက်များသည် သရော်ခြင်းဖြစ်နိုင်ကြောင်း အရိပ်အမြွက်ပြောကြားခဲ့သည်။