တအာင်းတပ်မတော် TNLA ထိန်းချုပ်ထားသည့် ကွတ်ခိုင်မြို့တွင် ပြန်ပေးဆွဲ ငွေညှစ်မှု ပြုလုပ်ခဲ့သူများကို မဖမ်းဆီးဘဲ ကျူးလွန်ခံရသူနှစ်ဦးကို ဖမ်းဆီးထားကြောင်း စုံစမ်းသိရှိရသည်။
ဖြစ်စဉ်မှာ ပြီးခဲ့သည့် နိုဝင်ဘာ ၁၇ရက်က ကိုမျိုးဝင်း (ခေါ်) ကိုကျောက်ခဲနှင့် နိုင်ကျဉ်းဟောင်းတစ်ဦးဖြစ်သူ ကိုမျိုးမင်းထွန်း (ခေါ် ) ဘီလားတို့သည် ကွတ်ခိုင်မြို့နေ ကိုနိုင် (ခေါ်) မိုင်းအနိုင် ဆိုသူအဖွဲ့၏ ဖမ်းဆီးခြင်း ခံခဲ့ရပြီး ကိုနိုင်၏ နေအိမ်အတွင်း ရိုက်
နှက်ခံခဲ့ရကာ ငွေ ကျပ် ၇၄ သိန်း ကနဦး ပေးခဲ့ရသည်။
ဆက်လက်ပြီး နိုဝင်ဘာ ၁၈ရက်တွင် ကိုနိုင်အဖွဲ့က ကျပ်သိန်းငါးရာ ထပ်မံတောင်းခံခဲသော်လည်း ကိုမျိုးဝင်းနှင့် ကိုမျိုးမင်းထွန်းက ၎င်းတို့ထံတွင်ပါလာသည့် ဖုန်းဖြင့် K-payမှတဆင့် ကျပ် ၂၂သိန်းကျော်သာပေးခဲ့သည့်အတွက် ကိုနိုင်၏ နေအိမ်အတွင်း ထပ်မံ နှိပ်စက်ခံခဲ့ရသည်။
ထို့နောက် နိုဝင်ဘာ ၁၈ရက် ၊ ည ရှစ်နာရီခွဲခန့်တွင် ကိုမျိုးဝင်းနှင့် ကိုမျိုးမင်းထွန်းတို့ကို TNLA လက်အောက်ခံ ကွတ်ခိုင်မြို့မရဲစခန်းမှ ရုံးအုပ်နှင့် တပ်သား နှစ်ဦးက ကိုနိုင်နေအိမ်မှ တဆင့် ရဲစခန်းသို့ ခေါ်ဆောင်သွားခဲ့ကြောင်း သိရသည်။
“အချုပ်ထဲမှာ ၁၂ရက်ရှိပြီ၊ ၁၈ရက် ည ရှစ်ခွဲမှာ အချုပ်ခန်းထဲရောက်တယ်။ အခုကျတော် ဖုန်းခဏသုံးလို့ရတယ်။ ကျတော့် အသံနဲ့ ကျတော် စာရေးမူအတိုင်းမဟုတ်ဘူးဆိုရင် ဒီဟာကို Cancel လုပ်ပေးပါ၊ ဖုန်းကတော့ ကျတော်တို့ ခေတ္တခဏ သုံးရတယ်။ ပြီးရင် သူတို့ ပြန်သိမ်းထားတယ်” ဟု ကိုမျိုးမင်းထွန်းက ဖုန်းခဏ အသုံးပြုရချိန်၌ ၎င်း မိတ်ဆွေများကို အသိပေးပြောဆိုခဲ့သည်။
ထို့ပြင် နိုဝင်ဘာ ၂၃ရက်၊ ည ခုနှစ်နာရီခွဲခန့်တွင် ညှိနှိုင်းမည်ဟုဆိုကာ ကိုမျိုးဝင်းနှင့် ကိုမျိုးမင်းထွန်းကို ကွတ်ခိုင်မြို့နယ် ရဲတပ်ဖွဲံမှူး နေအိမ်သို့ ခေါ်ဆောင်ပြီး ကျပ် သိန်း ၂၀၀ပေးရန် တောင်းခံခဲ့ကြောင်း ကိုမျိုးမင်းထွန်းက ၎င်း၏ မိတ်ဆွေများကို အသိပေးခဲ့သည်။
ကိုမျိုးမင်းထွန်း၏ ရေးသားချက်အရ ၎င်းတို့ နှစ်ဦးအား ပြန်ပေးဆွဲ ဖမ်းဆီး ငွေညစ်သည့် ကိုနိုင်သည် ကွတ်ခိုင်မြို့တွင် လက်နက် အရောင်းအဝယ် ပြုလုပ်နေသူ ဖြစ်ကြောင်း သိရသည်။
လက်ရှိတွင် ကိုနိုင်ကို ဖမ်းဆီးပေးရန် နိုဝင်ဘာ ၂၈ ရက်နေ့တွင် အမှုဖွင့်ထားသော်လည်း တအာင်းရဲတပ်ဖွဲ့က အမှုဖွင့် မပေးဘဲ ကိုမျိုးဝင်းနှင့် ကိုမျိုးမင်းထွန်း ကွတ်ခိုင်မြို့ရဲစခန်း၌ အချုပ်ချထားကြောင်း သိရသည်။
” ၂၈ ရက်နေ့မှာ ကျတော်တို့ကို အမှုဖွင့်ခိုင်းတယ်။ အမှုဖွင့်ခိုင်းတဲ့ အပေါ်မှာ ကျတော်တို့ အမှုဖွင့်တယ်။ အဲ့ဒါကိုလည်း သူတို့က ဝေ့လည်ကြောင်ပတ်လုပ်ပြီး အမှုဖွင့် မပေးဘူး။ အခုချိန်ထိ ကြန့်ကြာနေတာ၊ အဲ့ဒီလိုပုံစံနဲ့လုပ်ပြီး ညှိပြီးတော့ ထားထားတယ်။ ငါတို့တရားလိုကို တရားခံတွေနဲ့ အတူတူ အချုပ်ခန်းထဲမှာ ထည့်ထားတယ်။ အဲ့တာ လုံးဝမတရားဘူး။ ” ဟု ကိုမျိုးမင်းထွန်းက နိုဝင်ဘာ ၂၉ ရက်တွင် ဖုန်းအသုံးပြုခွင့်ရချိန်၌ MPA သို့ပြောသည်။
ကိုမျိုးမင်းထွန်းသည် ၁၀၂၇ ရှမ်းမြောက်စစ်ဆင်ရေးအတွင်း လားရှိုးထောက်ပေါက်စဉ်က ပြန်လည်လွတ်မြောက်လာသည့် နိုင်ငံရေးအကျဉ်းသားတစ်ဦးလည်းဖြစ်သည်။
” သူ ဖုန်းခဏ သုံးရတဲ့အချိန် ၂၉ ရက်နေ့ နေ့လယ်က ညီမတို့ဆီ စာပို့ အသိပေးသွားတာ။ သူဖမ်းခံထားရတာရယ်၊ သူ့ကို မီဒီယာတင်ပေးဖို့ရယ်ပဲ။ သူကိုယ်တိုင်လဲတင်ထားခဲ့တယ်။ အဲ့နေ့ကတည်းက သူလိုင်းဆင်းသွားတယ်။ အခုတော့ အဆက်သွယ် မရသေးဘူး။ ” ဟု ကိုမျိုးမင်းထွန်း၏ မိတ်ဆွေတစ်ဦးက ဆိုသည်။
အဆိုပါ ဖြစ်စဉ်နှင့်ပတ်သက်ပြီး တအာင်းတပ်အနေဖြင့် အမှုမှန် ပေါ်ပေါက်ရေးအတွက် အထူးစုံစမ်းရေးကော်မတီ ဖွဲ့စည်းပြီး အရေးယူပေးရန်ကျူးလွန်ခံရသူ နှစ်ဦးက တောင်းဆိုထားသည်။