ဩစတြေးလျ ကမ်းခြေ ပစ်ခတ်မှုတွင် သေဆုံးသူ ၁၆ ဦးအထိရှိလာ

ဩစတြေးလျနိုင်ငံ၊ ဆစ်ဒနီမြို့၊ ဘွန်ဒီကမ်းခြေ၌ ဖြစ်ပွားခဲ့သော အစုလိုက်အပြုံလိုက် ပစ်ခတ်မှုအတွင်း ၁၆ ဦးထက်မနည်း သေဆုံးပြီး ဒါဇင်နှင့်ချီ ဒဏ်ရာရရှိခဲ့ရာ ယင်းဖြစ်စဉ်ကို ဂျူးလူမျိုးဆန့်ကျင်ရေး ရည်ရွယ်ချက်ပါသော အကြမ်းဖက်တိုက်ခိုက်မှု အဖြစ် အာဏာပိုင်များက ထုတ်ပြန်ထားသည်။

အဆိုပါ တိုက်ခိုက်မှုသည် ဒီဇင်ဘာလ ၁၄ ရက်နေ့ ညနေပိုင်းတွင် ဂျူးလူမျိုးတို့၏ Hanukkah ပွဲတော်ကို ကျင်းပရန် ရာနှင့်ချီသောလူများ စုဝေးခဲ့ကြသည့် Campbell Parade အနီး Archer Park ၌ ဖြစ်ပွားခဲ့သည်။

တိုက်ခိုက်သူနှစ်ဦးသည် လူအုပ်စုကို ဖြတ်ကျော်နေသော လူကူးတံတားပေါ်မှနေ၍ သေနတ်များဖြင့် ပစ်ခတ်ခဲ့သည်။

ယခုပစ်ခတ်မှုကို ကျူးလွန်ခဲ့သူ သားအဖ နှစ်ဦးအနက် ဖခင် အသက် ၅၀ အရွယ် ဆာဂျစ် အကရမ်သည် အခင်းဖြစ်ပွားရာ၌ပင် သေဆုံးခဲ့ပြီး အသက် ၂၄ နှစ်အရွယ် သားဖြစ်သူ နာဗိဒ် အကရမ်သည် အခြေအနေ စိုးရိမ်ရသည့် အနေအထားဖြင့် ဖမ်းဆီးခံထားရသည်။

ရဲတပ်ဖွဲ့သည် နောက်ပိုင်းတွင် သံသယရှိသူများနှင့် ဆက်နွှယ်သော ယာဉ်တစ်စီးမှ မသင်္ကာဖွယ် ပေါက်ကွဲစေတတ်သော ပစ္စည်းများကို ရှာဖွေတွေ့ရှိကာ အန္တရာယ်ကင်းစွာ ဖယ်ရှားခဲ့သည်။ အာဏာပိုင်များက တိုက်ခိုက်မှု၏ ရည်ရွယ်ချက်မှာ ဂျူးလူမျိုးဆန့်ကျင်ရေးဖြစ်ကြောင်း ဖော်ပြခဲ့ပြီး ယင်းဖြစ်ရပ်သည် ဩစတြေးလျသမိုင်းတွင် ဂျူးအသိုင်းအဝိုင်းအပေါ် အသေအပျောက် အများဆုံး တိုက်ခိုက်မှုများထဲမှ တစ်ခုဖြစ်ကြောင်း ရဲတပ်ဖွဲ့က ပြောကြားခဲ့သည်။

သေဆုံးသူများတွင် အသက် ၁၀ နှစ်အရွယ် ကလေးငယ်မှအစပြု၍ သက်ကြီးရွယ်အိုများအထိ ပါဝင်သည်။ သေဆုံးသူများထဲတွင် Chabad ဘုန်းတော်ကြီးများ နှင့် ဟိုလိုကော့ (Holocaust) အသက်ရှင်ကျန်ရစ်သူ တစ်ဦးအပါအဝင် ရပ်ရွာခေါင်းဆောင်များလည်း ပါဝင်သည်။

ဝန်ကြီးချုပ် အန်ထော်နီ အယ်လ်ဘာနီးစ်က အဆိုပါ ပစ်ခတ်မှုများကို ပြစ်တင်ရှုတ်ချခဲ့ပြီး ၎င်းကို “စင်စစ်သော မကောင်းမှုလုပ်ရပ်” ဟု ခေါ်ဆိုခဲ့ကာ အမုန်းတရားကြောင့် ဖြစ်ပွားသော အကြမ်းဖက်မှုများကို တိုက်ဖျက်ရန် ကြိုးပမ်းအားထုတ်မှုများကို အားဖြည့်သွားမည်ဟု ကတိပြုခဲ့သည်။ မြို့သူမြို့သားများ ဝမ်းနည်းပူဆွေးနေချိန်တွင် ဘွန်ဒီကမ်းခြေ၌ အမှတ်တရ ဂုဏ်ပြုပွဲများ ကျင်းပခဲ့ကြသည်။

ယခုပစ်ခတ်မှုသည် ၁၉၉၆ ခုနှစ် Port Arthur အစုလိုက်အပြုံလိုက်သေဆုံးမှု နောက်ပိုင်း ဩစတြေးလျနိုင်ငံ၏ သမိုင်းတွင် အသေအပျောက် အများဆုံး အစုလိုက်အပြုံလိုက် ပစ်ခတ်မှုဖြစ်သည်။

ထိုစဉ်က ဩစတြေးလျနိုင်ငံ၊ တက်စ်မေးနီးယားပြည်နယ် Port Arthur သမိုင်းဝင်နေရာတစ်ခုတွင် ၂၈ နှစ်အရွယ် မာတင် ဘရိုင်းယန့်ဆိုသူ အမျိုးသားတစ်ဦးက ပစ်ခတ်မှုကြောင့် ၃၅ ဦး သေဆုံး ခဲ့ပြီး ၂၃ ဦး ဒဏ်ရာ ရရှိခဲ့သည်။