စစ်ကိုင်းတိုင်း၊ တမူးခရိုင်၊ တမူးမြို့နယ်အတွင်းရှိ အမျိုးသားညီညွတ်ရေးအစိုးရ(NUG) စိုးမိုးထိန်းချုပ်ထားသော နယ်မြေများတွင် ညမထွက်ရအမိန့် ထုတ်ပြန်လိုက်သည့်အပေါ် ပေါ်တာဆွဲရန်ဟုသာ ပြည်သူများကယုံကြည်နေသည်။
ဒေသလုံခြုံရေးလုပ်ငန်းများဆောင်ရွက်ရန်နှင့် မူးယစ်ဆေးဝါးတိုက်ဖျက်ရေးလုပ်ငန်းများ ဆောင်ရွက်ရန်ဟုဆိုကာ ည(၁၀)နာရီမှ နံနက်(၄)နာအရီအထိ ညမထွက်ရအမိန့်ကို အမျိုးသားညီညွတ်ရေးအစိုးရ(NUG) လက်အောက်ရှိ တမူးမြို့နယ်အရေးပေါ်အုပ်ချုပ်ရေး ဗဟိုအဖွဲ့မှ ဒီဇင်ဘာ၂၃ရက်နေ့တွင် ထုတ်ပြန်လိုက်ခြင်းဖြစ်သည်။
ပြီးခဲ့သည့် ဒီဇင်ဘာ (၁၈)ရက်နေ့ကလည်း ခမ်းပါတ်မြို့ပေါ်တွင် ပြည်သူ(၄၀)ကျော်အား တော်လှန်ရေးအဖွဲ့များက မူးယစ်ဆေးဝါးတိုက်ဖျက်ရေးဟုဆိုကာ ဖမ်းဆီးခေါ်ဆောင်မှုများရှိခဲ့သည်။
ယင်းနောက် ယခုကဲ့သို့ ညမထွက်ရအမိန့်ထုတ်ပြန်လိုက်ခြင်းသည် တရားဝင်ပေါ်တာဆွဲရန် ထုတ်ပြန်လိုက်ခြင်းဖြစ်သည်ဟု ခမ်းပါတ်မြို့အမှတ်(၁)ရပ်ကွက်နေ အမျိုးသားတစ်ဦးက MPAကိုပြောသည်။
” အခုလွတ်မြောက်နယ်မြေမှာ မလွတ်မလပ်နေရတော့မှာပေါ့။ အမိန့်ထုတ်တာရော ဟိုနေ့ကဆွဲတာရောဆိုတော့ ပြည်သူအားလုံး စိတ်ထဲတော့လန့်ကြတာပါပဲ။ ဟိုနေ့ကဆွဲတဲ့လူတွေ အကုန်ပြန်လွှတ်ပြီလို့တော့ကြားတယ်။ ဒါပေမဲ့ လွှတ်ပြီးမှ ညမထွက်ရအမိန့် ထုတ်လာပြန်တာလေ “ဟု ၎င်းကဆိုသည်။
ယခုကာလသည် ခရစ်စမတ်ကာလဖြစ်ပြီး ဒေသခံခရစ်ယာန်ဘာသာဝင်များအနေဖြင့် ယခင်က စိတ်လွတ်လပ်စွာပျော်ရွှင်ခဲ့ကြရသော်လည်း လက်ရှိ ညမထွက်ရအမိန့်ကြောင့် အပြည့်အဝမပျော်ရွှင်ရကြောင်း ကနန်စံပြရွာမှ အမျိုးသားတစ်ဦးက ပြောသည်။
” ပွဲတွင်းတော့ သူတို့(အုပ်ချုပ်ရေးဗဟိုအဖွဲ့) နားလည်ပေးမလားတော့ မပြောတတ်ဘူး။ အခုကတော့ ကိုယ့်အိမ် သူ့အိမ်ထဲမှာဘဲ စားကြသောက်ကြရတော့တာ။ ၁၀ နာရီကျော်မထွက်ရအမိန့်ထုတ်တော့ စိတ်ထဲမပျော်ဘူး “ဟု ၎င်းက ပြောသည်။
တော်လှန်ရေးအဖွဲ့များအနေဖြင့် ယခင်ကလည်း ကမ္မကြီးရွာနှင့် ဘုက္ကန်ကျေးရွာများမှ ပြည်သူများအား တပ်သားသစ်စုဆောင်းရေးပေါ်တာဆွဲခဲ့ဖူးပြီး ယခုမူးယစ်ဆေးဝါးတိုက်ဖျက်ရေးအကြောင်းပြ ညမထွက်ရအမိန့်ထုတ်ပြန်ခြင်းသည် ပေါ်တာဆွဲသည့်အပေါ် အကာအကွယ်ယူခြင်းသာ ဖြစ်သည်ဟု ဘုက္ကန်ကျေးရွာနေအမျိုးသားတစ်ဦးကဆိုသည်။
” သူတို့လုပ်ချင်တာလုပ်ဖို့ ကာဗာယူနေတာအသိသာကြီးပါဗျာ။ မူးယစ်ဆေးဝါးဖမ်းချင်လို့တော့ ညမထွက်ရအမိန့်ထုတ်စရာမလိုပါဘူး။ စစ်ရေးကလည်း ဆိုးနေတာမဟုတ်ဘူး။ လိုအပ်ရင်စစ်ဆေး၊ လုပ်တဲ့လူအရေးယူ ရှင်းနေတာပဲ”ဟု ၎င်းက ပြောသည်။
ဒီဇင်ဘာ(၁၈)ရက်နေ့က ပေါ်တာဆွဲခံရသော ခမ်းပါတ်မြို့ပေါ်မှပြည်သူများအား ပြန်လွှတ်ခြင်းသည်ပင် လိုင်းပေါ်တွင်နာမည်ကြီးသွား၍ဖြစ်ပြီး ယခင်အခြားကျေးရွာများမှ ပေါ်တာဆွဲခံရသော ပြည်သူများကိုမူ ပြန်လွှတ်ပေးခြင်းမရှိကြောင်း ၎င်းကဆက်လက်ပြောသည်။
တမူးမြို့နယ်အရေးပေါ်အုပ်ချုပ်ရေး(ဗဟို)အဖွဲ့အနေဖြင့် ဤအမိန့်ထုတ်ပြန်သည့်နေ့မှစ၍ ၎င်းတို့၏လုပ်ငန်းစဥ်များအား အရှိန်အဟုန်ပိုမိုတိုးမြှင့် ဆောင်ရွက်သွားမည်ဖြစ်ပြီး အမိန့်ထုတ်ပြန်ချက်အား လိုက်နာခြင်းမရှိပါက ထိရောက်စွာအရေးယူသွားမည်ဖြစ်ကြောင်း ထုတ်ပြန်ကြေညာထားသည်။
ယင်းညမထွက်ရအမိန့်ထုတ်ပြန်ခြင်းနှင့်ပတ်သက်၍ တမူးမြို့နယ်အရေးပေါ်အုပ်ချုပ်ရေး(ဗဟို)အဖွဲ့အား မေးမြန်းရန် MPAက အွန်လိုင်းမှတဆင့်ဆက်သွယ်ခဲ့သော်လည်း ပြန်လည်ဖြေကြားခြင်းမရှိပေ။