အမျိုးသားညီညွတ်ရေးအစိုးရ (NUG)၊ ပြည်ထောင်စုဝန်ကြီးချုပ်ရုံး၏ အမြဲတမ်းအတွင်းဝန် ဒေါ်ကြည်ပြာသည် ၎င်းအပေါ် စွပ်စွဲထားသည့် အချက်အလက်များမှာ မမှန်ကန်ကြောင်း အဖြေပေါ်ပေါက်ခဲ့သော်လည်း၊ လက်ရှိကျန်းမာရေး အခြေအနေကြောင့် ရာထူးမှ နုတ်ထွက်ခွင့်ပြုရန် ယနေ့ ၂၀၂၆ ခုနှစ်၊ ဖေဖော်ဝါရီလ ၂၁ ရက်စွဲဖြင့် နုတ်ထွက်စာတင်ထားကြောင်းသိရသည်။
ဒေါ်ကြည်ပြာသည် ပြီးခဲ့သည့် ၂၀၂၅ ခုနှစ်၊ နိုဝင်ဘာလ ၁၉ ရက်နေ့တွင် ၎င်းနှင့် ၎င်း၏ခင်ပွန်းဖြစ်သူအပေါ် စွပ်စွဲတိုင်ကြားချက်များကြောင့် နိုဝင်ဘာလ ၂၂ ရက်နေ့မှစ၍ တာဝန်မှ ယာယီရပ်နားကာ စစ်ဆေးမှုများ ခံယူခဲ့ရခြင်းဖြစ်သည်။
၎င်း၏ နုတ်ထွက်စာတွင် (၃) လတာ စုံစမ်းစစ်ဆေးမှုများ ပြုလုပ်ခဲ့ပြီးနောက် ယခုအခါ စစ်ဆေးမှုရလဒ်များ ထွက်ပေါ်လာပြီး မမှန်မကန် စွပ်စွဲထားသည့် ကိစ္စရပ်များမှာလည်း အဖြေပေါ်ပေါက် ရှင်းလင်းသွားပြီဖြစ်ကြောင်း ဖော်ပြထားသည်။
သို့သော်လည်း ကျန်းမာရေးစောင့်ရှောက်မှု ခံယူရန် လိုအပ်နေသောကြောင့် အမြဲတမ်းအတွင်းဝန် တာဝန်မှ နုတ်ထွက်ခွင့်ပြုရန် တင်ပြခဲ့ခြင်းဖြစ်ကာ တော်လှန်ရေး အောင်မြင်သည်အထိ တတ်နိုင်သည့်ဘက်မှ ဆက်လက်ပါဝင်သွားမည်ဖြစ်ကြောင်း ကတိပြုထားသည်။
ဒေါ်ကြည်ပြာနှင့် ၎င်း၏ခင်ပွန်းဖြစ်သူ ဦးညီညီမင်း (ပညာရေးဝန်ကြီးဌာန၊ ရုံးဦးစီးအဖွဲ့မှူး – ညွှန်ကြားရေးမှူးချုပ်အဆင့်) တို့သည် တော်လှန်ရေးကာလအတွင်း အာဏာအလွဲသုံးစားလုပ်ခြင်း၊ အဂတိလိုက်စားခြင်းနှင့် ဝန်ထမ်းများအပေါ် ဖိနှိပ်ခြင်းများ ပြုလုပ်ခဲ့သည်ဟု စွပ်စွဲခံထားရခြင်း ဖြစ်သည်။
အဆိုပါ စွပ်စွဲချက်များနှင့် ပတ်သက်၍ ဒေါ်ကြည်ပြာဘက်ကမူ လက်ရှိစုံစမ်းစစ်ဆေးရေးအဖွဲ့တွင် တိုင်ကြားသူများနှင့် ပုဂ္ဂိုလ်ရေးအရ ပတ်သက်နေသူများ ပါဝင်နေသဖြင့် အဖွဲ့၏ တရားမျှတမှုအပေါ် ကန့်ကွက်ထားမှုများလည်း ရှိခဲ့သည်။
အခြားတစ်ဖက်တွင်လည်း CDM ကျန်းမာရေးကွန်ရက်က ဒေါ်ကြည်ပြာအား ရာထူးမှထုတ်ပယ်ရန်နှင့် အလွဲသုံးစားလုပ်ထားသည့် ငွေကြေးများ ပြန်လည်ပေးလျော်ရန် တောင်းဆိုထားပြီး၊ ဆောင်ရွက်ပေးခြင်းမရှိပါက NUG နှင့် ပူးပေါင်းဆောင်ရွက်မှုများ ရပ်ဆိုင်းမည်ဟု ကြေညာထားသည်။
“ဒေါ်ကြည်ပြာဘက်က စုံစမ်းစစ်ဆေးမှုတွေမှာ အပြစ်မရှိဘူးလို့ ဆိုထားပေမဲ့ ကျန်းမာရေးကို အကြောင်းပြပြီး နုတ်ထွက်စာတင်လိုက်တာဟာ တော်လှန်ရေးကာလအတွင်းမှာ ဖြစ်နေတဲ့ ရာထူးတာဝန်ဆိုင်ရာ အငြင်းပွားမှုတွေကို အဆုံးသတ်ဖို့အတွက် ထွက်ပေါက်တစ်ခုအနေနဲ့ ကြိုးစားတာ ဖြစ်နိုင်တယ်” ဟု နိုင်ငံရေးလေ့လာသူတစ်ဦးက သုံးသပ်သည်။
သို့သော်လည်း NUG ဝန်ကြီးချုပ်ရုံးဝန်ကြီး ဒေါက်တာဇော်ဝေစိုးက ဒေါ်ကြည်ပြာအား ရာထူးတာဝန်မှ ယာယီရပ်နားထားဆဲဖြစ်ပြီး ပြန်လည်ခန့်အပ်ခြင်း မရှိသေးကြောင်း ယမန်နေ့(ဖေဖော်ဝါရီ ၂၁ရက်)က ပြုလုပ်သည့် သတင်းစာရှင်းလင်းပွဲတွင် ပြောကြားခဲ့သည်။
“ကျနော်တို့ စစ်ဆေးစဉ်ကနေ ယခုအချိန်ထိ ဒီအမှုအခင်းနဲ့ ပတ်သက်တဲ့သူတွေ အစိုးရအဖွဲ့ထဲမှာ ဆက်ပြီးအဲဒီနေရာမှာ စစ်ဆေးဖို့အတွက် ယာယီရပ်နားတယ်ဆိုတာ ထုတ်ထားတာတွေ့ရပါတယ်။ ယခုအထိလည်း ပြန်မခန့်ရသေးပါဘူး။ ယာယီရပ်နားထားဆဲဖြစ်ပါတယ်” ဟု ဒေါက်တာဇော်ဝေစိုးက ဆိုသည်။
ပြည်ထဲရေးဝန်ကြီး ဦးလွင်ကိုလတ်ကလည်း အမှုနှင့်ပတ်သက်၍ တာဝန်မှ ရပ်နားရန် စာထုတ်ရမည့်ကိစ္စများ ဆက်လက်ရှိနေကြောင်းနှင့် စုံစမ်းစစ်ဆေးရေးခုံရုံးအနေဖြင့် တွေ့ရှိချက်များကို ဝန်ကြီးချုပ်ထံ တင်ပြထားပြီးဖြစ်ကာ အရေးယူဆောင်ရွက်မှုများကို ဆက်တိုက်လုပ်ဆောင်သွားရန် ရှိနေကြောင်း ရှင်းလင်းသည်။
NUG အစိုးရအနေဖြင့် ယခုဖြစ်စဉ်အပေါ် သင်ခန်းစာယူပြီး သမာသမတ်ကျစွာ ဆုံးဖြတ်ချက်ချကာ တာဝန်ယူမှု၊ တာဝန်ခံမှုရှိရှိဖြင့် ဆက်လက်ဆောင်ရွက်သွားမည်ဖြစ်ကြောင်း ဒေါက်တာဇော်ဝေစိုးက အတည်ပြုပြောကြားခဲ့သည်။
စာတည်း-ကိုဆန်း