စစ်ကော်မရှင်က ၎င်းတို့၏ အတုအယောင် ရွေးကောက်ပွဲရလဒ်ကို အခြေခံသည့် တတိယအကြိမ်မြောက် လွှတ်တော်အစည်းအဝေးများကို လာမည့် မတ်လ ၁၆ ရက်တွင် စတင်ကျင်းပမည်ဖြစ်ကြောင်း ယနေ့(ဖေဖော်ဝါရီ ၂၃ရက်)တွင် ထုတ်ပြန်ထားသည်။
ပြည်သူ့လွှတ်တော်အစည်းအဝေးကို မတ် ၁၆ ရက်တွင် လည်းကောင်း၊ အမျိုးသားလွှတ်တော်အစည်းအဝေးကို မတ် ၁၈ ရက်တွင် လည်းကောင်း ကျင်းပမည်ဖြစ်ပြီး ကိုယ်စားလှယ်များအနေဖြင့် မတ် ၁၀ ရက်ထက် မစော၊ မတ် ၁၁ ရက်ထက် နောက်မကျစေဘဲ သတင်းပို့ရန် ညွှန်ကြားထားသည်။
နိုင်ငံရေးလေ့လာသူတစ်ဦးက “ဒီလွှတ်တော်ဟာ ပြည်သူ့ဆန္ဒနဲ့ လုံးဝမဆိုင်ဘဲ စစ်ကော်မရှင်က စိတ်ကြိုက်ရေးဆွဲထားတဲ့ ဇာတ်ညွှန်းတစ်ခုသာ ဖြစ်တယ်။ တရားမဝင်တဲ့ အဖွဲ့အစည်းက ခေါ်ယူတဲ့အတွက် ဒီလွှတ်တော်ဟာလည်း တရားမဝင်ဘူး” ဟု သုံးသပ်သည်။
တက်ကြွလှုပ်ရှားသူများကမူ စစ်ကော်မရှင်သည် မြေပြင်တွင် ရှုံးနိမ့်မှုများပြားနေချိန်၌ နိုင်ငံတကာကို လှည့်ဖြားရန်နှင့် ၎င်းတို့တွင် အုပ်ချုပ်ရေးယန္တရားရှိသေးကြောင်း ပြသရန် ယခုကဲ့သို့ လွှတ်တော်ပြကွက်ကို ဖန်တီးလာခြင်းဖြစ်သည်ဟု ဆိုသည်။
အထူးသဖြင့် အရပ်သားဒေသများကို လေကြောင်းမှ ဗုံးကြဲတိုက်ခိုက်ကာ စစ်ရာဇဝတ်မှုများ ကျူးလွန်နေသည့် စစ်ကော်မရှင်က နိုင်ငံရေးအရွေ့တစ်ခု ဖော်ဆောင်မည်ဆိုခြင်းမှာ အဓိပ္ပာယ်မရှိကြောင်း လူ့အခွင့်အရေးလှုပ်ရှားသူများက ထောက်ပြသည်။
ဝါရင့်ရှေ့နေတစ်ဦးက “ဖွဲ့စည်းပုံအခြေခံဥပဒေကို အလွဲသုံးစားလုပ်ပြီး ခေါ်ယူတဲ့ ဒီလွှတ်တော်ဟာ ဥပဒေကြောင်းအရ ပျက်ပြယ်နေပြီးသားပါ။ ဒီထဲက ထွက်လာတဲ့ ဆုံးဖြတ်ချက်မှန်သမျှဟာလည်း တရားဝင်မှာ မဟုတ်ဘူး” ဟု မှတ်ချက်ပြုသည်။
လွှတ်တော်သို့ တက်ရောက်မည့် ကိုယ်စားလှယ်များအတွက် နေပြည်တော်ရှိ ဧည့်ရိပ်သာများ၊ ပါတီဌာနချုပ်များနှင့် စစ်ကြောရေးစခန်းများတွင် နေရာချထားရန် ပြင်ဆင်နေမှုသည် ယခင်ကဲ့သို့ပင် စစ်တပ်၏ ထိန်းချုပ်မှုအောက်တွင်သာ ရှိနေဦးမည်ဖြစ်ကြောင်း နိုင်ငံရေးလေ့လာသူတစ်ဦးက ထောက်ပြသည်။
စစ်ရေးလေ့လာသူတစ်ဦးကမူ “မြစ်ကြီးနားလေဆိပ်မှာ ခရီးသည်တင်လေယာဉ် ထိမှန်မှုကို War Crime လို့ အော်နေတဲ့ စစ်ကော်မရှင်ဟာ ဒီလွှတ်တော်ကနေတစ်ဆင့် တော်လှန်ရေးအင်အားစုတွေကို အကြမ်းဖက်အဖြစ် သတ်မှတ်ဖို့ ဥပဒေအသစ်တွေ ထပ်ထုတ်လာနိုင်တယ်” ဟု သတိပေးသည်။
စစ်ကော်မရှင်၏ ထုတ်ပြန်ချက်တွင် တပ်မတော်သား ကိုယ်စားလှယ်များကိုလည်း အမှတ် (၃) စစ်ကြောရေးနှင့် တည်းခိုရေးစခန်း (ရွာတော်) တွင် သတင်းပို့ရန် ညွှန်ကြားထားပြီး ယင်းသည် လွှတ်တော်အတွင်း စစ်တပ်၏ အခန်းကဏ္ဍကို ဆက်လက်ခိုင်မာစေရန် ဖြစ်ကြောင်း ရှေ့နေတစ်ဦးက မှတ်ချက်ပြုသည်။
နိုင်ငံရေးတက်ကြွလှုပ်ရှားသူတစ်ဦးက “ပြည်သူတွေက ဒီလွှတ်တော်ကို စိတ်မဝင်စားသလို၊ အသိအမှတ်လည်း မပြုဘူး။ ဒါဟာ စစ်ကော်မရှင်ရဲ့ နောက်ဆုံးထွက်သက်ကို ဆွဲဆန့်ဖို့ ကြိုးစားတဲ့ နိုင်ငံရေးလှည့်ကွက်တစ်ခုပဲ” ဟု ပြတ်သားစွာ ပြောဆိုသည်။
မတ် ၁၆ ရက်တွင် စတင်မည့် စစ်ကော်မရှင်၏ လွှတ်တော်သည် နိုင်ငံရေးထွက်ပေါက် ရှာဖွေမှုတစ်ခုသာဖြစ်ပြီး တရားဝင်မှုမရှိသည့်အတွက် ပြည်တွင်းပြည်ပ ဖိအားများကို ပိုမိုရင်ဆိုင်ရဖွယ်ရှိကြောင်း ၎င်းက သုံးသပ်သည်။