ဟော်မုဇ်ရေလက်ကြား ကာကွယ်ရေးတွင် မကူညီပါက NATO ၏ အနာဂတ် အလွန်ဆိုးရွားနိုင်ဟု ထရမ့် ခြိမ်းခြောက်

အမေရိကန် သမ္မတ ဒေါ်နယ်ထရမ့်သည် ဟော်မုဇ် ရေလက်ကြား (Strait of Hormuz) ကာကွယ်ရေးတွင် ဥရောပ မဟာမိတ်များ ပါဝင်ကူညီရန် ဖိအားပေးမှုများကို ပြင်းထန်စွာ မြှင့်တင်လိုက်ပြီး၊ အကယ်၍ ဝါရှင်တန်ကို ကူညီရန် ပျက်ကွက်ပါက နေတိုး (NATO) အဖွဲ့၏ အနာဂတ်မှာ “အလွန်ဆိုးရွား” သွားနိုင်ကြောင်း သတိပေးထားသည်။

အမေရိကန်နှင့် အစ္စရေးတို့၏ လေကြောင်းတိုက်ခိုက်မှုများကို လက်တုံ့ပြန်သည့်အနေဖြင့် အီရန်က ဤအရေးပါသော ရေလမ်းကြောင်းကို ပိတ်ဆို့လိုက်ခြင်းသည် ကမ္ဘာ့စွမ်းအင်နှင့် ကုန်သွယ်မှုစီးဆင်းမှုအပေါ် ကပ်ဘေးသဖွယ် သက်ရောက်စေခဲ့ပြီး သမိုင်းတစ်လျှောက် အကြီးမားဆုံး ရေနံပြတ်လပ်မှုနှင့်အတူ ရေနံဈေးနှုန်းများကိုလည်း အဆမတန် ထိုးတက်သွားစေခဲ့သည်။

သမ္မတထရမ့်က စီးပွားဖြစ် သင်္ဘောများကို အကာအကွယ်ပေးရန်နှင့် ရေနံစီးဆင်းမှု ပြန်လည်စတင်နိုင်ရန် စစ်သင်္ဘောများ စေလွှတ်ပေးရန် တောင်းဆိုခဲ့သော်လည်း ဩစတြေးလျ၊ ပြင်သစ်၊ ဂျပန်နှင့် ဗြိတိန်တို့ကဲ့သို့ မဟာမိတ်နိုင်ငံများထံမှ တုံ့ပြန်မှုမှာ အားနည်းနေဆဲဖြစ်ကာ ၎င်းတို့အနေဖြင့် စစ်သင်္ဘောများ စေလွှတ်ရန် အစီအစဉ်မရှိကြောင်း အသီးသီး ထုတ်ဖော်ပြောကြားထားကြသည်။

ဂျပန်ဝန်ကြီးချုပ် ဆာနာအေး တာကိုင်ချီက လက်ရှိတွင် စစ်သင်္ဘောစေလွှတ်ရန် အစီအစဉ်မရှိသေးကြောင်း အတည်ပြုသော်လည်း ရေနံပြတ်လပ်မှုကို ဖြေရှင်းရန်အတွက် ၂၀၂၂ ခုနှစ်နောက်ပိုင်း ပထမဆုံးအကြိမ်အဖြစ် နိုင်ငံတော်၏ အရန်ရေနံများကို ထုတ်ယူသုံးစွဲနေပြီ ဖြစ်သည်။

တစ်ဖက်တွင်လည်း ထရမ့်သည် တရုတ်သမ္မတ ရှီကျင့်ဖျင်နှင့် တွေ့ဆုံမည့် ထိပ်သီးအစည်းအဝေးကို ရွှေ့ဆိုင်းနိုင်သည်ဟု ဆိုကာ အီရန်၏ မဟာမိတ်ဖြစ်သော တရုတ်နိုင်ငံအနေဖြင့် ရေလက်ကြား လုံခြုံရေးအတွက် ကူညီရန် ဖိအားပေးခဲ့သည်။

တရုတ်သည် ၎င်း၏ ရေနံ ၉၀ ရာခိုင်နှုန်းကို ယင်းရေလက်ကြားမှ ရရှိနေခြင်းကြောင့် ဤပြဿနာကို ဖြေရှင်းရန် တာဝန်ရှိကြောင်း ထရမ့်က ထောက်ပြခဲ့သည်။

သို့သော်လည်း အီရန်နိုင်ငံခြားရေးဝန်ကြီး အဘတ်စ် အာရက်ချီကမူ ၎င်းတို့အနေဖြင့် အပစ်အခတ်ရပ်စဲရေး သို့မဟုတ် ဆွေးနွေးပွဲများအတွက် မည်သည့်အခါမျှ တောင်းဆိုထားခြင်းမရှိဘဲ မိမိကိုယ်ကိုယ် ကာကွယ်ရန် အသင့်ရှိကြောင်း၊ အမေရိကန်နှင့် အစ္စရေးတို့၏ တိုက်ခိုက်မှုများကြောင့် အီရန်၏ ရေတပ်နှင့် လက်နက်တိုက်များ ထိခိုက်ခဲ့သော်လည်း အီရန်သည် တည်ငြိမ်ပြီး အင်အားတောင့်တင်းဆဲဖြစ်ကြောင်း တုံ့ပြန်ခဲ့သည်။

လက်ရှိတွင် စစ်ပွဲသည် သုံးပတ်မြောက်သို့ ရောက်ရှိလာပြီး အာရပ်စော်ဘွားများ ပြည်ထောင်စုအတွင်းရှိ ဒူဘိုင်းနှင့် ဖူဂျိုင်ရာဒေသများတွင် ဒရုန်းနှင့် ဒုံးကျည်ဖြင့် တိုက်ခိုက်မှုများ ဆက်လက်ဖြစ်ပွားနေကာ ကမ္ဘာ့ရေနံဈေးနှုန်းမှာလည်း တစ်စည်လျှင် ၁၀၄ ဒေါ်လာကျော်အထိ မြင့်တက်လျက်ရှိနေသည်။