ရခိုင်ပြည်နယ်၊ မြောက်ဦးမြို့နယ်အတွင်းရှိ (ဘက) ကျောင်းတစ်ခုတွင် ပညာသင်ကြားနေသည့် အသက် ၈ နှစ်အရွယ် ကျောင်းသူကလေးငယ်တစ်ဦးအပါအဝင် စုစုပေါင်း ၄ ဦးအား မုဒိမ်းမှုကျူးလွန်ရန် ကြံစည်အားထုတ်ခဲ့သည့် ကျောင်းဆရာတစ်ဦးကို အာရက္ခတပ်တော်(AA) ၏ တရားဥပဒေစိုးမိုးရေးနှင့် ပြည်သူ့လုံခြုံရေးဌာန (DLEPS) က ဖမ်းဆီးအရေးယူထားကြောင်း သိရှိရသည်။
ဖြစ်စဉ်မှာ မြောက်ဦးမြို့၊ ဆင်ချဆိပ်ရပ်ကွက်ရှိ တေဇာရာမ (ဘက) ကျောင်းမှ အသက် ၅၆ နှစ်အရွယ် ကျောင်းဆရာ ဦးမောင်ငယ် (ခ) မောင်တင်နုသည် ပြီးခဲ့သည့် ဖေဖော်ဝါရီလ ၂၃ ရက်နေ့က အဆိုပါကျောင်း၌ ပညာသင်ယူနေသည့် အသက် ၈ နှစ်အရွယ် KG တန်း ကျောင်းသူငယ်တစ်ဦးအား မဖွယ်မရာပြုလုပ်ခဲ့ခြင်းဖြစ်သည်။
အဆိုပါဖြစ်စဉ်ကို ကာယကံရှင် မိန်းကလေးငယ်က ၎င်း၏မိခင်ထံ ပြန်လည်ပြောပြခဲ့ရာမှတစ်ဆင့် မြေပြင်စုံစမ်းမှုများ ထပ်မံပြုလုပ်ခဲ့ရာ အဆိုပါကျောင်းဆရာသည် ၂၀၂၅ ခုနှစ်အတွင်းကလည်း အသက် ၆ နှစ်၊ ၇ နှစ်နှင့် ၈ နှစ်အရွယ်ရှိ KG ကျောင်းသူ ၃ ဦးကို အလားတူ မဖွယ်မရာပြုလုပ်ခဲ့သည့် အမှုဟောင်းများပါ ထပ်မံပေါ်ပေါက်ခဲ့ခြင်းဖြစ်သည်။
ထို့ကြောင့် ကလေးငယ်များ၏ မိဘများက မတ်လ ၆ ရက်နေ့တွင် DLEPS ဌာန၌ အမှုဖွင့်တိုင်တန်းခဲ့ရာ တာဝန်ရှိသူများက အမှုအမှတ် (ပ) ၁၄/၂၀၂၆၊ ရာဇသတ်ကြီးပုဒ်မ ၃၇၆/၅၁၁ ဖြင့် အမှုဖွင့်လှစ်ခဲ့ပြီး ကျူးလွန်သူ ဦးမောင်ငယ်ကို မတ်လ ၁၁ ရက်နေ့တွင် ဖမ်းဆီးခဲ့ကာ ဥပဒေလုပ်ထုံးလုပ်နည်းများနှင့်အညီ အရေးယူဆောင်ရွက်လျက်ရှိသည်။
မြောက်ဦးမြို့ခံ မိခင်တစ်ဦးက “ကျောင်းဆိုတာ ကလေးတွေအတွက် အလုံခြုံဆုံးနေရာ ဖြစ်ရမှာပါ။ အခုလို ဆရာဆိုတဲ့သူကိုယ်တိုင်က ကလေးငယ်လေးတွေကို ဒီလိုလုပ်တယ်ဆိုတာ တကယ်ကို ရွံရှာစရာကောင်းပြီး စိတ်မချမ်းမြေ့စရာပါ။ ကျူးလွန်သူကို ထိုက်တန်တဲ့ ပြစ်ဒဏ် အပြင်းထန်ဆုံး ပေးစေချင်ပါတယ်” ဟု ပြောကြားသည်။
အလားတူ မတ်လ ၁၆ ရက်နေ့ကလည်း မောင်တောမြို့နယ်၊ အောင်သုခကျေးရွာတွင် အသက် ၃ နှစ်အရွယ် မိန်းကလေးငယ်တစ်ဦးအား အသက် ၁၆ နှစ်အရွယ် လူငယ်တစ်ဦးက မုဒိမ်းကျင့်သတ်ဖြတ်ခဲ့သည့် ဖြစ်စဉ်တစ်ခု ဖြစ်ပွားခဲ့သေးသည်။
အဆိုပါအမှုတွင်လည်း ပြစ်မှုကျူးလွန်သူကို တစ်ရက်အတွင်း စုံစမ်းဖော်ထုတ်ဖမ်းဆီးနိုင်ခဲ့ပြီး မုဒိမ်းမှု၊ လူသတ်မှု၊ အလောင်းဖျောက်ဖျက်ရန် ကြိုးစားမှုများဖြင့် အရေးယူထားကြောင်း သိရသည်။
လူ့အခွင့်အရေးလှုပ်ရှားသူတစ်ဦးက “အခုနောက်ပိုင်း သက်ငယ်မုဒိမ်းမှုတွေ ခဏခဏ ကြားနေရတာ စိုးရိမ်စရာ အရမ်းကောင်းပါတယ်။ ဒီလိုလူမျိုးတွေကို အကာအကွယ်မပေးဘဲ ဝိုင်းဝန်းရှုတ်ချရပါမယ်။ အာဏာပိုင်တွေအနေနဲ့လည်း ဥပဒေအရ ထိထိရောက်ရောက် အရေးယူပေးဖို့ မျှော်လင့်ပါတယ်” ဟု ဆိုသည်။
ယခုကဲ့သို့ ကလေးငယ်များအပေါ် ကျူးလွန်သည့် ရာဇဝတ်မှုများနှင့်ပတ်သက်၍ ဒေသခံပြည်သူများက ပြင်းထန်စွာ ဝေဖန်ရှုတ်ချလျက်ရှိပြီး မိဘပြည်သူများအနေဖြင့်လည်း မိမိတို့၏ ကလေးငယ်များကို အကာအကွယ်ပေးရန်နှင့် သံသယဖြစ်ဖွယ်တွေ့ရှိပါက အချိန်မီသတင်းပေးပို့ရန် DLEPS က အသိပေးနှိုးဆော်ထားသည်။
လက်ရှိ AAက ပြဋ္ဌာန်းထားသည့် ဥပဒေအရ အသက် ၁၂ နှစ်အောက် အမျိုးသမီးကို မုဒိမ်းမှုကျူးလွန်ပါက ထောင်ဒဏ်တစ်သက်ဖြစ်စေ၊ ထောင်ဒဏ်အနှစ် ၂၀ ဖြစ်စေ ချမှတ်နိုင်ကြောင်း သိရသည်။
စာတည်း-ကိုဆန်း
ဓာတ်ပုံ-AA