အလင်းဝင်လာသည့် စစ်မှုထမ်းတပ်သား ၁၄ ဦးစလုံး စခန်းသိမ်းတိုက်ပွဲများပါ ဆင်နွှဲနေ ကြောင်း ကလေးခရိုင်ပကဖ ထံက သိရသည်။
၂၀၂၅ ခုနှစ်၊ ဇူလိုင်နှင့် ဩဂုတ်တို့၌ ကလေးခရိုင်ပြည်သူ့ကာကွယ်ရေးအဖွဲ့(ပကဖ)ရုံး၊ Drone တပ်ဖွဲ့ (Wing of Kalay) ထံသို့ စစ်မှုထမ်းတပ်သား ၁၄ဦးတို့ လက်နက်ခဲယမ်းများနှင့်တကွ နှစ်သုတ်ခွဲကာ ဆက်သွယ်အလင်းဝင်ရောက်လာခြင်းဖြစ်ပြီး ၎င်းတို့အားလုံး စစ်ကော်မရှင်ကို ပြန်တိုက်နေကြောင်း သိရသည်။
” သူတို့သည် မတရားပေါ်တာဆွဲခံရတာဖြစ်တယ်။ စစ်ကြောင်းထဲမှာ မတရားနှိပ်စက်ခံ၊ စစ်ကြောင်း တအားထိုးခိုင်းတာတွေကို ခံပြင်းလို့ စစ်ကော်မရှင်ကို ပြန်လည်တိုက်ခိုက်ချင်တယ်လို့ ဝန်ခံကတိတွေထိုးတယ်။ ကျနော်တို့ ယုံကြည်မှုရအောင် နေထိုင်တယ်။ ကျနော်တို့တပ်ဖွဲ့က ပေးတဲ့သင်တန်းတွေကို တက်ရောက်ပြီးတော့မှ ပြန်လည်တွန်းလှန်နေကြတာပါ။ ဒီ ၁၄ယောက်လုံးက PDF ၊ ပကဖ တွေနဲ့အတူ စခန်းသိမ်းတိုက်ပွဲတွေမှာပါ ပါဝင်နေကြပါတယ် ” ဟု ကလေးခရိုင်ပြည်သူ့ကာကွယ်ရေးအဖွဲ့(ပကဖ)၊ Drone တပ်ဖွဲ့ တာဝန်ခံ ကိုကုလားလေးက MPA ကို ပြောသည်။
ယင်းတပ်သားများသည် MA-3 အမျိုးအစားလက်နက်ငယ် ၅ လက်၊ MA-1 ၂ လက်၊ လက်ပစ်ဗုံးသီး ၉လုံး၊ ၆၀ မမ လက်နက်ကြီးကျည် ၄ ဖူး၊ အီနာဂါ ၃ လုံး၊ ကျည်ဘောက် ၁၅ခုနှင့် ကျည်ဆန်၁၂၀၀ တို့ ယူဆောင်လာခဲ့ရာ တစ်ဦးလျှင် ငွေကျပ် သိန်း၃၀စီ ချီးမြှင့်ခဲ့ကြောင်း သိရသည်။
” ပေါ်တာဆွဲခံရတဲ့ လူငယ်တွေကို သူတို့ ( စစ်ကော်မရှင် ) က PDF ၊ ပကဖတွေက မင်းတို့ကို တွေ့ရင် သတ်ဖြတ်တာတွေလုပ်မယ်လို့ ရိုက်ထည့်ပေးထားတာ။ ဒါတွေ လုံးဝမဟုတ်ပါဘူး။ ကျနော်တို့ဆီ ရောက်လာတဲ့ဒီလူငယ်တွေက လက်နက်ပါလာလို့ ဆုကြေးငွေပေးရင်တောင် တပ်ဖွဲ့တွေကို ပြန်လည်လှူဒါန်းတာတွေလည်း ရှိပါတယ် ” ဟု ၎င်းကဆက်လက်ပြောသည်။
စစ်မှုထမ်းတပ်သားအဖြစ် အဓမ္မစုဆောင်းခံရသည့် လူငယ်များအနေဖြင့် နီးစပ်ရာ တော်လှန်ရေးတပ်ဖွဲ့များထံ ဆက်သွယ်အလင်းဝင်ရောက်ကြရန် ၎င်းက တိုက်တွန်းသည်။
၂၀၂၅ ခုနှစ် သြဂုတ်လအတွင်း စစ်သား ၁၇၀ အလင်းဝင်ခဲ့ပြီး ၎င်းအနက် ၅၉ ဦးမှာ စစ်မှုထမ်းတပ်သားသစ်များ ဖြစ်ကြောင်း ပြည်သူ့ပန်းတိုင်က ထုတ်ပြန်ထားသည်။