မြန်မာစစ်အုပ်စုက ဖမ်းဆီး ထားသည့် ဒေါ်အောင်ဆန်းစုကြည်အား ကျန်ရှိနေသည့် ပြစ်ဒဏ်များကို နေအိမ်အကျယ်ချုပ်ဖြင့် ကျခံစေရန် ခွင့်ပြုခဲ့ပြီးနောက် ဖိလစ်ပိုင်နိုင်ငံက ပိုမိုပွင့်လင်းမြင်သာမှုရှိရန် တိုက်တွန်းခဲ့ပြီး ဒေါ်အောင်ဆန်းစုကြည်နှင့် အာဆီယံအထူးကိုယ်စားလှယ်တို့ တွေ့ဆုံခွင့်ပြုရန် ယနေ့ တောင်းဆိုလိုက်သည်။
ယခုနှစ် အာဆီယံအလှည့်ကျဥက္ကဋ္ဌအဖြစ် တာဝန်ယူထားသည့် ဖိလစ်ပိုင်နိုင်ငံက “ဒီဖြစ်ပေါ်တိုးတက်မှုတွေကို မြန်မာနိုင်ငံရဲ့ ရေရှည်တည်ငြိမ်ရေးအတွက် မရှိမဖြစ်လိုအပ်တဲ့ ယုံကြည်မှုတည်ဆောက်ရေး လုပ်ငန်းစဉ်တွေရဲ့ အရေးကြီးတဲ့ ခြေလှမ်းတွေအဖြစ် ရှုမြင်ပါတယ်” ဟု ထုတ်ပြန်ချက်တွင် ဖော်ပြထားသည်။
ဖိလစ်ပိုင် နိုင်ငံခြားရေးဝန်ကြီးဌာနက မြန်မာနိုင်ငံအနေဖြင့် “အမျိုးသားပြန်လည်ရင်ကြားစေ့ရေးအတွက် စစ်မှန်တဲ့ ကတိကဝတ်ကို ပြသတဲ့အနေနဲ့” ဒေါ်အောင်ဆန်းစုကြည်အား ၎င်း၏မိသားစုနှင့် ဆက်သွယ်ခွင့်ပြုသင့်ကြောင်း ပြောကြားခဲ့သည်။
အာဆီယံအထူးကိုယ်စားလှယ်ကို တွေ့ဆုံခွင့်ပြုခြင်းက သက်ဆိုင်သူအားလုံးနှင့် ချိတ်ဆက်ဆောင်ရွက်မှုကို အထောက်အကူပြုစေမည်ဖြစ်ပြီး အားလုံးပါဝင်သော အမျိုးသားအဆင့် ဆွေးနွေးပွဲများကို ရှေ့သို့တိုးတက်စေလိမ့်မည်ဟု ဆိုသည်။
အာဆီယံ၏ ငြိမ်းချမ်းရေးမူဘောင်ဖြစ်သော “မူဝါဒ ၅ ချက်” (Five-Point Consensus) အရ မြန်မာနိုင်ငံတွင် နိုင်ငံရေးအရ ဆွေးနွေးမှုများနှင့် ပြန်လည်ရင်ကြားစေ့ရေးအတွက် ယခုဖြစ်ပေါ်တိုးတက်မှုများကို အရှိန်အဟုန်တစ်ခုအဖြစ် အသုံးချသင့်ကြောင်းလည်း ဖိလစ်ပိုင်က ပြောကြားခဲ့သည်။