By Reuters
တောင်အမေရိကနိုင်ငံတစ်ခုဖြစ်သည့် ဗင်နီဇွဲလားနိုင်ငံတွင် ဗုဒ္ဓဟူးနေ့ မွန်းလွဲပိုင်းက အင်အားအလွန်ပြင်းထန်သည့် မြေငလျင်ကြီးများ တစ်မိနစ်အတွင်း နှစ်ကြိမ်ဆက်တိုက် လှုပ်ခတ်သွားခဲ့ရာ မြို့တော် ကာရာကတ်စ်တွင် အဆောက်အအုံများ ပြိုကျပျက်စီးပြီး လူအများအပြား အပျက်အစီးများအောက်၌ ပိတ်မိနေကြောင်း သိရသည်။
အမေရိကန်ဘူမိဗေဒလေ့လာရေးဌာန (USGS) ၏ ထုတ်ပြန်ချက်အရ မြို့တော် ကာရာကတ်စ်၏ အနောက်ဘက် မိုင် ၁၀၀ အကွာကို ဗဟိုပြု၍ ပထမဦးစွာ ပမာဏ ၇ ဒသမ ၂ အဆင့်ရှိ အင်အားပြင်းငလျင်တစ်ခု လှုပ်ခတ်ခဲ့ပြီး၊ တစ်မိနစ်မပြည့်မီအချိန်၌ပင် ပမာဏ ၇ ဒသမ ၅ အဆင့်ရှိ ဒုတိယမြောက် ငလျင်ကြီး ထပ်မံလှုပ်ခတ်ခဲ့ခြင်းဖြစ်သည်။
USGS က ယခုငလျင်ကြောင့် လူသေဆုံးမှုနှင့် ပျက်စီးဆုံးရှုံးမှု အလွန်များပြားနိုင်ပြီး ဘေးအန္တရာယ်သည် နိုင်ငံအနှံ့ ကျယ်ကျယ်ပြန့်ပြန့် ဖြစ်ပွားနိုင်ကြောင်း သတိပေးထားကာ သေဆုံးသူအရေအတွက်မှာ အနည်းဆုံး ၁ သောင်းမှ ၁ သိန်းအထိ ရှိသွားနိုင်ကြောင်း ကနဦး ခန့်မှန်းချက် ထုတ်ပြန်ထားသည်။
ဗင်နီဇွဲလား ပြည်ထဲရေးဝန်ကြီး ဒီယိုစဒါဒို ကာဘယ်လိုက အဆောက်အအုံများနှင့် လူနေအိမ်များစွာ ပြိုကျပျက်စီးသွားသဖြင့် မီးသတ်နှင့် ရဲတပ်ဖွဲ့ဝင်များကို အရေးပေါ်တာဝန်ချကာ ရှိသမျှအင်အားဖြင့် ကယ်ဆယ်ရေးလုပ်ငန်းများ ဆောင်ရွက်နေကြောင်း နိုင်ငံပိုင်ရုပ်သံမှတစ်ဆင့် ပြောကြားသည်။
ဆေးရုံကြီးများတွင်လည်း ဒဏ်ရာရလူနာများကို ကုသပေးရန် ညဆိုင်းဝန်ထမ်းအင်အားကို နှစ်ဆတိုးမြှင့်ထားရကြောင်း သိရသည်။ ငလျင်လှုပ်ခတ်သည့်အချိန်သည် ဗင်နီဇွဲလားနိုင်ငံ၏ လွတ်လပ်ရေးအထိမ်းအမှတ် ရုံးပိတ်ရက်ဖြစ်သဖြင့် ပြည်သူအများစု အိမ်တွင်း၌ ရှိနေချိန်လည်း ဖြစ်သည်။
ယခုငလျင်လှုပ်ခတ်မှုအပြီး ပွာတိုရီကိုနှင့် ဗာဂျင်ကျွန်းစုများအတွက် ဆူနာမီသတိပေးချက် ထုတ်ပြန်ခဲ့သော်လည်း တစ်နာရီခွဲခန့်အကြာတွင် ပြန်လည်ရုပ်သိမ်းခဲ့သည်။
ကာရစ်ဘီယံကျောက်ဖျာချပ်နှင့် တောင်အမေရိကကျောက်ဖျာချပ်တို့ ဆုံတွေ့ရာ ငလျင်ကြောပေါ်၌ တည်ရှိသည့် ဗင်နီဇွဲလားနိုင်ငံတွင် ပြီးခဲ့သည့် ၁၈၁၂ ခုနှစ်ကလည်း အင်အားပြင်းငလျင်ကြောင့် လူပေါင်း ၃ သောင်းကျော် သေဆုံးခဲ့ဖူးသည့် သမိုင်းမှတ်တမ်း ရှိခဲ့သည်။
လက်ရှိတွင် အမေရိကန်သံရုံးအပါအဝင် နိုင်ငံတကာက ငလျင်အလွန်အခြေအနေများကို စောင့်ကြည့်လျက်ရှိပြီး ပိတ်မိနေသူများကို ကယ်ထုတ်နိုင်ရန် နိုင်ငံလုံးကျွတ် ရှာဖွေကယ်ဆယ်ရေးများ လုပ်ဆောင်နေရသည်။
ဓာတ်ပုံ – Reuters