ရန်ကုန်မြို့တွင် တရားမဝင် ရွေးကောက်ပွဲနားနီးကာလ လုံခြုံရေးအကြောင်းပြချက်ဖြင့် လူငယ်များ ဖမ်းဆီးမှုကို အရှိန်မြှင့်လုပ်ဆောင်နေကြောင်း သိရသည်။
ယခင်က ရပ်ကွက်များအတွင်း ညဘက် ကင်းလှည့်ခြင်းကို ရဲတပ်ဖွဲ့က ပုံမှန် လုပ်ဆောင်လေ့မရှိ သော်လည်း ယခုအခါ ညစဉ် ကင်းလှည့်ကာ လမ်းမပေါ်နှင့် လမ်းမနံဘေးရှိ လူငယ်များအား ဖမ်းဆီးနေကြောင်း ရန်ကုန်မြို့ရဲသတင်းရင်းမြစ်ထံက သိရသည်။
“ဘယ်လောက်ထိ ဖမ်းမိသလဲဆိုတဲ့ စာရင်းကတော့ မရှိဘူး။ဘာလို့လဲဆိုတော့ အားလုံးက စာ ရင်းပျောက်ချည်းပဲ။ ဖမ်းမိရင် ငွေညှစ်တယ်။ငွေမပေးနိုင်ရင် စစ်မှုထမ်းထဲ ရောင်းစားတယ်ဆိုတော့ ဘာစာရင်းမှ မရှိဘူး”ဟု ၎င်းက MPAသို့ပြောသည်။
ဖမ်းဆီးမိသော လူငယ်များကို စစ်မှုထမ်းထဲသို့ ရောင်းစားပါက ၁၀သိန်းမှ ၁၅သိန်းအထိ ရရှိနေသော ကြောင့် ရန်ကုန်တွင် စစ်တပ်၊ရဲ၊ ရပ်ကွက်အုပ်ချုပ်ရေးအဖွဲ့၊ စစ်တပ်နှင့်ချိတ်ဆက်လုပ်စားနေသော ပျူစောထီးနှင့် လူရောင်းစားဂိုဏ်းတို့က ကိုယ့်နည်းကိုယ့်ဟန်ဖြင့် လိုက်ဖမ်းနေကြကြောင်း သိရ သည်။
“ညဘက် ကိုယ့်ရပ်ကွက်ထဲက လမ်းဘေးမှာထိုင်ပြီး သောက်နေတယ်။ဂစ်တာတီးနေတယ်။ အိမ်အ ပြန်နောက်ကျတယ်။ဖမ်းတဲ့ကောင်တွေနဲ့ တည့်တည့်တိုးရင် ပါတာပဲ။မကြာသေးဘူး၊ အလုံမှာ လက် ဖက်ရည်ဆိုင်ကကောင်လေး ဆိုင်ပိတ်တဲ့အချိန် ဆိုင်ရှေ့မှာ ခဏထိုင်နေတာ ဆွဲစေ့ခံလိုက်ရတယ်” ဟု ၎င်းက ဆက်လက်ပြောသည်။
ရန်ကုန်မြို့တွင် ဒီဇင်ဘာ၈ရက်မှ ၁၄ရက်အတွင်း လမ်းမပေါ်သွားလာနေစဉ် ဖမ်းဆီးခံရသူ၁၁ဦး၊ လမ်းဘေးထိုင်နေစဉ် ဖမ်းဆီးခံရသူ ၆ဦး၊ ရှာဖွေဖမ်းဆီးခံရသူ၂ဦးနှင့် ဖမ်းဆီးသည့်ပုံစံမသိရသူ၆ဦး စုစုပေါင်း ၂၅ဦးရှိကြောင်း Rangoon Scout Network က ယနေ့(ဒီဇင်ဘာ၁၅ရက်)သတင်းထုတ်ပြန် သည်။
ဒီဇင်ဘာပထမပတ်အတွင်းကလည်း ရန်ကုန်တွင် လမ်းဘေး၌ အရက်သောက်နေသည်ဟုဆိုကာ ရဲနှင့် အရပ်ဝတ်တို့၏ ဖမ်းဆီးခြင်းခံရသူ အယောက်၄၀ ရှိကြောင်း Rangoon Scout Network က ထုတ်ပြန်ထားသည်။