ပြီးခဲ့သည့်ရက်ပိုင်းက ကျင်းပခဲ့သော ဖျော်ဖြေပွဲတစ်ခုတွင် ကပြဖျော်ဖြေမှုနှင့် ပတ်သက်၍ နာမည်ကြီးသရုပ်ဆောင် သင်ဇာဝင့်ကျော်ကို ဖမ်းဆီးရန်အတွက် စစ်ကော်မရှင်လက်အောက်ခံ ရဲတပ်ဖွဲ့က အမှုဖွင့်ထားကြောင်း သိရှိရသည်။
အဆိုပါအမှုမှာ ဇန်နဝါရီ (၁၅) ရက်နေ့က ပြုလုပ်ခဲ့သည့် Cloud Seven Production and Entertainment ၏ ဖျော်ဖြေပွဲတွင် ကပြခဲ့မှုအပေါ် အခြေခံကာ ကမာရွတ်မြို့မရဲစခန်း၌ ပုဒ်မ ၂၉၄(က)/၁၁၄ ဖြင့် အမှုဖွင့်လှစ်ထားခြင်း ဖြစ်သည်။
“အမှုဖွင့်ထားတုန်းပါ။ မဖမ်းရသေးဘူးလို့ သိရပါတယ်။ ဖမ်းတော့ ဖမ်းမှာပေါ့ဗျာ။ စိတ်မပူပါနဲ့” ဟု ရဲတပ်ဖွဲ့နှင့် နီးစပ်သူတစ်ဦးက အတည်ပြု ပြောကြားသည်။
အဆိုပါ ဖျော်ဖြေပွဲတွင် သင်ဇာဝင့်ကျော်သည် လိင်အသားပေး ဖျော်ဖြေမှုများဖြင့် ပြုမူခဲ့သည်ဟုဆိုကာ လူမှုကွန်ရက်ပေါ်တွင် ဗီဒီယိုများ ပျံ့နှံ့ခဲ့ပြီးနောက် ယခုကဲ့သို့ ဖမ်းဆီးရန် ဘာသာရေးအစွန်းရောက်များက လှုံ့ဆော်ခဲ့ပြီးနောက် အမှုဖွင့်မှုများ ဖြစ်ပေါ်လာခဲ့ခြင်းဖြစ်သည်။
သို့သော်လည်း အနုပညာရှင်တစ်ဦး၏ ဖျော်ဖြေတင်ဆက်မှုအပေါ် အခြေခံ၍ အမှုဖွင့်အရေးယူခြင်းမှာ လူ့အခွင့်အရေးနှင့် လွတ်လပ်စွာ ဖော်ထုတ်ခွင့်တို့အပေါ် မေးခွန်းထုတ်စရာ ဖြစ်ကြောင်း လူ့အခွင့်အရေးတက်ကြွလှုပ်ရှားသူတစ်ဦးက ပြောသည်။
“အနုပညာရှင်တစ်ယောက်က သူ့ရဲ့ ဖန်တီးမှုကို ပရိသတ်ရှေ့မှာ တင်ဆက်တာဟာ ရာဇဝတ်မှု မဟုတ်ပါဘူး။ အခုလို အနုပညာဖျော်ဖြေမှုကြောင့် အမှုဖွင့်တာဟာ လူ့အခွင့်အရေးအရ ကြည့်ရင်တော့ မဖြစ်သင့်တဲ့ ကန့်သတ်ချုပ်ချယ်မှုတစ်ခုပါ” ဟု ၎င်းက မှတ်ချက်ပြုသည်။
သင်ဇာဝင့်ကျော်၏ ဖျော်ဖြေမှုကို ပွဲစီစဉ်သူများက ရုပ်သံရိုက်ကူးခွင့် ကန့်သတ်ထားသော်လည်း ပွဲလာကြည့်သူများ၏ ဖုန်းဖြင့်ရိုက်ကူးကာ ပြန်လည်ဖြန့်ဝေမှုများကြောင့် အွန်လိုင်းတွင် လူသိများသွားခဲ့ခြင်း ဖြစ်သည်။
ယင်းဖြစ်ရပ်ကြောင့် အနုပညာသတင်းများ တင်ဆက်နေသည့် မီဒီယာအချို့မှာလည်း ဖိအားများကြောင့် သတင်းများကို ပြန်လည်ဖြုတ်ချခဲ့ရကြောင်း သိရသည်။
“ကျမတို့ သတင်းတင်ထားတာတွေပါ ပြန်ဖြုတ်ချပေးလိုက်ရတာပါ။ သင်ဇာတို့ဘက်က ပြောလာလို့လေ” ဟု ပြည်တွင်း အနုပညာသတင်းထောက်တစ်ဦးက ဆိုသည်။
“ဒီလိုမျိုး အဝတ်အစားနဲ့ ဖျော်ဖြေမှုအပေါ် မူတည်ပြီး ရာဇဝတ်အမှုအဖြစ် သတ်မှတ်တာဟာ ခေတ်နောက်ပြန်ဆွဲတဲ့ လုပ်ရပ်ဖြစ်သလို အနုပညာရှင်တွေရဲ့ လွတ်လပ်ခွင့်ကို ခြိမ်းခြောက်ရာ ရောက်နေပါတယ်” ဟု အမည်မဖော်လိုသည့် အနုပညာရှင် တစ်ဦးက ပြောသည်။
သရုပ်ဆောင် သင်ဇာဝင့်ကျော်သည် ၂၀၂၂ ခုနှစ်ကလည်း အဖော်အချွတ် ဓာတ်ပုံများ ရိုက်ကူးမှုဖြင့် စစ်ကော်မရှင်၏ ဖမ်းဆီးထောင်ချခြင်းကို ခံခဲ့ရပြီး ၂၀၂၄ ခုနှစ်မှ ပြန်လည် လွတ်မြောက်လာခဲ့သူ ဖြစ်သည်။
ယခု အမှုဖွင့်ခံရသည့် ဖျော်ဖြေပွဲသို့ အနုပညာလောကမှ ထင်ရှားသူများဖြစ်သည့် ဦးကြည်စိုးထွန်း၊ ရန်အောင်၊ မို့မို့မြင့်အောင်၊ မြင့်မြတ်နှင့် နီနီခင်ဇော်တို့လည်း တက်ရောက်ခဲ့ကြကြောင်း သိရှိရသည်။