အရှေ့အလယ်ပိုင်းဒေသတွင် အမေရိကန်နှင့် အစ္စရေးတို့၏ အီရန်အပေါ် စစ်ဆင်ရေးများ ပြုလုပ်ပြီးနောက်ပိုင်း စစ်မီးကူးစက်မှု အန္တရာယ်မှာ ပိုမိုမြင့်မားလာခဲ့ကြောင်းသိရသည်။
ဗြိတိန်ကာကွယ်ရေးဝန်ကြီး ဂျွန်ဟီးလေး၏ ယနေ့ ထုတ်ဖော်ပြောကြားချက်အရ ဆိုက်ပရပ်စ်ကျွန်းပေါ်ရှိ ဗြိတိသျှစစ်အခြေစိုက်စခန်းများ တည်ရှိရာဘက်သို့ အီရန်ဘက်မှ ဒုံးကျည်နှစ်စင်း ဦးတည်ပစ်ခတ်ခဲ့သော်လည်း ၎င်းတို့ကို လမ်းခုလတ်၌ ကြားဖြတ်ဟန့်တားနိုင်ခဲ့ကြောင်း သိရသည်။
အဆိုပါဒုံးကျည်များသည် ဗြိတိသျှစစ်ဘက်ဆိုင်ရာ အဆောက်အအုံများကို ရည်ရွယ်ချက်ရှိရှိ ပစ်မှတ်ထားခြင်း ရှိ၊ မရှိကိုမူ ဗြိတိသျှအစိုးရက အတည်မပြုနိုင်သေးပေ။ သို့သော် အီရန်အစိုးရသည် ပြီးခဲ့သည့် ဇွန်လအတွင်းက အစ္စရေးကို ကူညီပံ့ပိုးပေးသည့် မည်သည့်နိုင်ငံကိုမဆို ဒေသတွင်းရှိ စစ်စခန်းများနှင့် သင်္ဘောများကို ပစ်မှတ်ထား တိုက်ခိုက်သွားမည်ဟု ကြိုတင်သတိပေးထားခဲ့ရာ ယခုဖြစ်ရပ်မှာ အီရန်၏ လက်စားချေမှု ပြုလုပ်လာခြင်း ဖြစ်နိုင်သည်ဟု သုံးသပ်မှုများ ရှိနေသည်။
ဗြိတိန်အစိုးရသည် အီရန်အပေါ် ပြုလုပ်သည့် စစ်ဆင်ရေးများတွင် တိုက်ရိုက်ပါဝင်ခြင်း မရှိကြောင်း ငြင်းဆိုထားသော်လည်း ဆိုက်ပရပ်စ်ရှိ အက်ခရိုတီရီ (Akrotiri) လေတပ်စခန်းတွင် ကာကွယ်ရေးအတွက် အင်အားဖြည့်တင်းမှုများကို အရှိန်အဟုန်မြှင့် လုပ်ဆောင်နေသည်။
ဗြိတိန်နိုင်ငံ Norfolk ရှိ လေတပ်စခန်းမှ F-35B တိုက်လေယာဉ် ၆ စင်းကိုလည်း ဆိုက်ပရပ်စ်သို့ အရေးပေါ်စေလွှတ်ထားပြီး စစ်စခန်းများကို အမြင့်ဆုံး သတိပေးချက် ထုတ်ပြန်ထားကြောင်း သိရသည်။
တစ်ဖက်တွင်မူ ဆိုက်ပရပ်စ်အစိုးရသည် ဗြိတိန်၏ ထုတ်ဖော်ပြောကြားချက်အပေါ် ငြင်းဆိုမှုများ ပြုလုပ်ခဲ့သည်။ ဆိုက်ပရပ်စ် ကာကွယ်ရေးဝန်ကြီးနှင့် အစိုးရပြောရေးဆိုခွင့်ရှိသူတို့က ၎င်းတို့နိုင်ငံအတွက် စစ်ရေးအရ ခြိမ်းခြောက်မှုရှိသည့် အထောက်အထား တစ်စုံတစ်ရာ မရှိကြောင်း ပြောဆိုခဲ့ကြသည်။
သို့သော်လည်း ဆိုက်ပရပ်စ်သမ္မတသည် အမျိုးသားလုံခြုံရေးကောင်စီကို အရေးပေါ်ခေါ်ယူကာ ဒေသတွင်းလုံခြုံရေး အခြေအနေများကို အနီးကပ် စောင့်ကြည့်လျက်ရှိသည်။
ဗြိတိန်ကာကွယ်ရေးဝန်ကြီးက အီရန်အဓိပတိ သေဆုံးမှုအပေါ် ဝေဖန်ပြောဆိုခဲ့သော်လည်း အမေရိကန်-အစ္စရေးတို့၏ တိုက်ခိုက်မှုများကြောင့် ဒေသတွင်းစစ်ပွဲ ပိုမိုကျယ်ပြန့်လာမည့်အရေးကိုမူ အထူးစိုးရိမ်ကြောင်း ပြောကြားခဲ့သည်။
လက်ရှိတွင် ဗြိတိသျှအစိုးရသည် ဆိုက်ပရပ်စ်ရှိ ၎င်းတို့၏ စစ်ဘက်ဆိုင်ရာ ပိုင်နက်နယ်မြေများနှင့် ဝန်ထမ်းများကို ကာကွယ်ရန်အတွက် လိုအပ်သည့် အစီအမံများအားလုံးကို ဆက်လက်လုပ်ဆောင်သွားမည်ဖြစ်ကြောင်း အတည်ပြုထားသည်။