အစ္စရေးနိုင်ငံသည် လက်ဘနွန်နိုင်ငံဘက်မှ ပစ်လွှတ်လိုက်သော ဒုံးကျည်များကို ကြားဖြတ်ဟန့်တားရာတွင် ၎င်းတို့၏ နာမည်ကျော် Iron Dome စနစ်အပြင် နောက်ဆုံးပေါ် လေဆာကာကွယ်ရေး လက်နက်ဆန်းများကိုပါ ပထမဆုံးအကြိမ် ထုတ်ဖော်အသုံးပြုလိုက်ကြောင်း သိရသည်။
ယခုအသုံးပြုလိုက်သည့် လက်နက်ဆန်းမှာ “Laser Dome” (သို့မဟုတ်) “Eitan” ဟု အမည်ပေးထားသော လေဆာစနစ်ဖြစ်ပြီး၊ ၎င်းသည် ရန်သူ့ဒုံးကျည်များကို လေပေါ်၌ပင် လေဆာရောင်ခြည်ဖြင့် ထိမှန်ဖျက်ဆီးနိုင်ခြင်း ဖြစ်သည်။
ယခင်က အသုံးပြုနေကျ Iron Dome စနစ်သည် ရန်သူ့ဒုံးကျည်ကို ဒုံးကျည်ဖြင့်ပင် ပြန်လည်ပစ်ခတ်ကာကွယ်ရသဖြင့် ကုန်ကျစရိတ် မြင့်မားသော်လည်း၊ ယခု လေဆာလက်နက်သစ်သည် လျှပ်စစ်စွမ်းအင်ကိုသာ အဓိကအသုံးပြုသောကြောင့် ကုန်ကျစရိတ်ကို အဆမတန် လျှော့ချပေးနိုင်မည် ဖြစ်သည်။
စစ်ရေးကျွမ်းကျင်သူများကမူ ယခုကဲ့သို့ လေဆာစနစ်ကို လက်တွေ့စစ်မြေပြင်တွင် အောင်မြင်စွာ အသုံးပြုနိုင်ခြင်းသည် ဒုံးကျည်ကာကွယ်ရေး ကဏ္ဍအတွက် ခေတ်သစ်တစ်ခု သို့ ရောက်ရှိသွားခြင်းဖြစ်ကြောင်း သုံးသပ်ကြသည်။
ဤစနစ်၏ အဓိကလုပ်ဆောင်ပုံမှာ ၁၀၀ ကီလိုဝပ် (100kW) အားရှိသည့် အပူချိန်အလွန်မြင့်မားသော လေဆာတန်းကို အသုံးပြုကာ ရန်သူ့ဒုံးကျည် သို့မဟုတ် ဒရုန်း၏ ကိုယ်ထည်ကို စက္ကန့်ပိုင်းအတွင်း လောင်ကျွမ်းသွားစေခြင်းဖြင့် ပစ်မှတ်ကို လေထဲ၌ပင် ပေါက်ကွဲပျက်စီးသွားစေခြင်း ဖြစ်သည်။
လေဆာရောင်ခြည်သည် အလင်း၏အလျင်အတိုင်း သွားခြင်းဖြစ်သောကြောင့် ပစ်မှတ်ကို အလွန်တိကျစွာ ထိမှန်စေရုံသာမက ရန်သူ့ဘက်မှလည်း ရှောင်တိမ်းရန် အချိန်မရနိုင်တော့ပေ။
အစ္စရေး၏ ယခုလုပ်ရပ်သည် ၎င်းတို့၏ နည်းပညာအသာစီးရမှုကို ပြသလိုက်ခြင်းဖြစ်ပြီး၊ ဒေသတွင်း တင်းမာမှုများကြားတွင် မဟာမိတ်များအတွက် အားတက်စရာ ဖြစ်လာစေသည်။