အမ်ဘာပေကို အာဖရိကကျောက်ဆောင် တားနိုင်မလား?
၂၀၂၆ ကမ္ဘာ့ဖလားပွဲစဉ်တွေရဲ့ အလယ်ပိုင်းကို ကျော်လွန်လာပြီး ကွာတားအဆင့်ကို ရောက်လာခဲ့ပါပြီ။ ၈ သင်းပဲ ကျန်ရှိတော့တဲ့အလျောက် ပွဲစဉ်တွေဟာလည်း အရင် တစ်နေ့ကို ၄၊ ၅ ပွဲလောက်ကစားနေတာကနေ အခုတော့ တစ်ရက်ကို တစ်ပွဲပဲ ရင်ခုန်စိတ်လှုပ်ရှားစရာအပြည့်နဲ့ ခံစားရတော့မှာဖြစ်ပါတယ်။ ၂၀၂၆ ကမ္ဘာ့ဖလားအတွက် ပထမဆုံးကွာတားဖိုင်နယ်ပွဲစဉ်ကတော့ ဗိုလ်စွဲဖို့ရေပန်းအစားဆုံးအသင်းဖြစ်တဲ့ ပြင်သစ်နဲ့ မာကျောမှုနဲ့ စုဖွဲ့မှုအပြည့်ရှိနေတဲ့ အာဖရိကအင်အားကြီး မော်ရိုကိုတို့ရဲ့ပွဲစဉ်ပဲဖြစ်ပါတယ်။ ဒီပွဲမှာ ပြင်သစ်တို့ ဘယ်လိုစွမ်းဆောင်ပြသွားမလဲ။ မော်ရိုကိုရဲ့ စုဖွဲ့မှုကို ကျော်ဖြတ်နိုင်မှာလား။ မိနစ် ၉၀ နဲ့ ပွဲပြတ်သွားမလား။ အချိန်ပို၊ ပင်နယ်တီထိ ရောက်သွားနိုင်သလား စတာတွေနဲ့ပတ်သက်ပြီး အသေးစိတ်လေ့လာသုံးသပ်ပြီး MPA က နောက်ဆုံးရလဒ်အထိ ခန့်မှန်းသုံးသပ်ပေးသွားမှာဖြစ်ပါတယ်။
ပြင်သစ်နဲ့ မော်ရိုကို
ပွဲချိန် – ဇူလိုင် ၁၀ ရက်၊ မြန်မာစံတော်ချိန် နံနက် ၂ နာရီခွဲ
၁၆ သင်းအဆင့် ရှုံးထွက်ပွဲစဉ်တွေမှာ အာဖရိကကျောက်ဆောင် မော်ရိုကိုအသင်းဟာ အိမ်ရှင် ကနေဒါကို အသည်းခွဲကျော်ဖြတ်ပြီး ၈ သင်းအဆင့်ကို တက်လှမ်းလာခဲ့သလို၊ ပြင်သစ်ကလည်း ပါရာဂွေးရဲ့ ခံစစ်ဘတ်စ်ကားကြီးကို ဖောက်ထွက်ပြီး ဒီနေရာကို ရောက်လာခဲ့ပါပြီ။ အခုတော့ ၂၀၂၂ ကမ္ဘာ့ဖလား ဆီမီးဖိုင်နယ်တုန်းက တစ်ကမ္ဘာလုံးကို ဆွဲဆောင်ခဲ့တဲ့ ပြင်သစ်နဲ့ မော်ရိုကိုတို့ရဲ့ ထိပ်တိုက်တွေ့ဆုံမှုကြီးဟာ ၂၀၂၆ မှာ ကွာတားဖိုင်နယ်အဖြစ် ကံကြမ္မာအလှည့်အပြောင်းနဲ့ ပြန်လည်အသက်ဝင်လာခဲ့ပါပြီ။ အထူးသဖြင့် နှစ်သင်းစလုံးက ဒဏ်ရာပြဿနာ ကင်းစင်နေပြီး အကောင်းဆုံး Core Line-up (အဓိကလူစုံ) တွေနဲ့ ထွက်လာမှာဖြစ်လို့ ဒါဟာ နည်းဗျူဟာအမြင့်မားဆုံး အားပြိုင်မှုတစ်ခု ဖြစ်လာတော့မှာပါ။ ဒီနှစ်သင်းရဲ့အခြေအနေတွေကို တစ်ချက်ချင်းစီ ခွဲခြမ်းစိတ်ဖြာပြီး သုံးသပ်တင်ဆက်ပေးသွားပါမယ်။
၁။ သမိုင်းကြောင်းတွေ့ဆုံမှုနှင့် နောက်ခံဇာတ်လမ်း
ဒီနှစ်သင်းရဲ့ ထိပ်တိုက်တွေ့ဆုံမှု သမိုင်းကြောင်းက ရိုးရိုးရှင်းရှင်း မဟုတ်ဘဲ နိုင်ငံရေး၊ ယဉ်ကျေးမှုနဲ့ ဘောလုံးအနုပညာတွေပါ ရောယှက်နေတာတွေ့ရပါတယ်။
၂၀၂၂ ကမ္ဘာ့ဖလား ဆီမီးဖိုင်နယ် ဒါဏ်ရာကို အားလုံးမှတ်မိကြဦးမှာပါ။ ကာတာကမ္ဘာ့ဖလားတုန်းက မော်ရိုကိုဟာ အာဖရိကအသင်းတွေထဲမှာ ပထမဆုံးအကြိမ် ဆီမီးဖိုင်နယ်တက်ပြီး သမိုင်းရေးခဲ့ပေမဲ့ ပြင်သစ်အသင်းရဲ့ အတွေ့အကြုံရင့်ကျက်မှုနဲ့ သီယိုဟာနန်ဒက်ဇ်၊ ကော်လို မူအာနီတို့ရဲ့ ဂိုးတွေကြောင့် ၀ – ၂ နဲ့ ရှုံးနိမ့်ပြီး အိမ်ပြန်ခဲ့ရပါတယ်။ ဒါကြောင့် ဒီပွဲဟာ မော်ရိုကိုအတွက် မကျေပွဲနဲ့ ကလဲ့စားချေပွဲပါပဲ။
သမိုင်းတစ်လျှောက် မှတ်တမ်းတွေအရ ပြိုင်ပွဲစုံ တွေ့ဆုံမှု ၆ ကြိမ်အထိရှိထားတာတွေ့ရပါတယ်။ အဲဒီ ၆ ကြိမ်မှာ ပြင်သစ်က ၄ ကြိမ်နိုင်၊ ၂ ကြိမ် သရေကျထားပြီး မော်ရိုကိုအသင်းအနေနဲ့ ပြင်သစ်ကို သမိုင်းတစ်လျှောက် တစ်ကြိမ်မှ မနိုင်ဖူးသေးပါဘူး။
၂။ လက်ရှိလူစာရင်းနှင့် ခြေစွမ်းကွာဟမှု
အချက်အလက်တွေအရ ပြင်သစ်က ကမ္ဘာ့အဆင့် ၁ ထိပ်သီးအဖြစ် အသာစီးရနေပေမဲ့ မော်ရိုကိုရဲ့ ကစားကွက် ဟန်ချက်ကလည်း လျှော့တွက်လို့မရတဲ့ အနေအထားမှာ ရှိပါတယ်။
“ပြင်သစ် – ကမ္ဘာ့အဖျက်စွမ်းအားအပြင်းဆုံး တိုက်စစ်”
ဒီဒီယာ ဒက်ရွှမ့်ရဲ့ ပြင်သစ်ကတော့ ကမ္ဘာ့အဆင့် ကစားသမားတွေကို အခြေခံပြီး တောင်ပံအမြန်နှုန်း၊ တစ်ဦးချင်းစွမ်းရည်နဲ့ လျှပ်တပြက် တန်ပြန်တိုက်စစ်ကို အဓိက သုံးပါတယ်။
Key Player တွေထဲ ဧကရာဇ် ကီလီယန် အမ်ဘာပေက ထိပ်တန်းမှာရှိနေတယ်ဆိုတာ ငြင်းမရပါဘူး။ ဘယ်တောင်ပံကနေ ပွဲကို အချိန်မရွေး အဆုံးအဖြတ်ပေးဖို့ အဆင်သင့်ရှိနေသလို၊ ကွင်းလယ်မှာ ချူအာမေနီနဲ့ ကာမာဗင်ဂါတို့ရဲ့ လူငယ်အင်ဂျင်တွေက တည်ငြိမ်နေပါတယ်။ နောက်တန်းမှာလည်း ဆာလီဘာနဲ့ အူပါမီကာနိုတို့ တံတိုင်းက အားကိုးရပါတယ်။
“မော်ရိုကို – ဥရောပအဆင့်အတန်းရှိ အာဖရိကကျောက်ဆောင်”
နည်းပြ ဝါလစ် ရက်ဂရာဂီရဲ့ မော်ရိုကိုကတော့ ခံစစ်ကျစ်လျစ်မှု (Low-block Defense) မှာ ကမ္ဘာ့အကောင်းဆုံးစာရင်းဝင်ဖြစ်ပြီး ကွင်းလယ်ကနေ ဘောလုံးဖြတ်တောက်ပြီးတာနဲ့ အာရှ်ရပ်ဖ် ဟာကီမီ ဦးဆောင်တဲ့ တောင်ပံတွေကနေ လျင်မြန်လွန်းတဲ့ တန်ပြန်တိုက်စစ်ကို စတင်ကစားပါတယ်။
Key Player တွေထဲ ဂိုးသမား ယာဆင်း ဘိုနိုက အမှားအယွင်းမရှိ လက်စွမ်းပြနေသလို၊ ကွင်းလယ်က အာမ်ရာဘတ်နဲ့ တိုက်စစ်ပိုင်းက ဟာကင် ဇီယက်ရှ်၊ ဘရာဟင် ဒီယက်ဇ်တို့ရဲ့ ကစားဟန်က ဥရောပထိပ်သီးတွေကို ဒုက္ခပေးနိုင်စွမ်း ရှိပါတယ်။
၃။ စူပါကွန်ပျူတာရဲ့ ဒေတာတွက်ချက်မှုနှင့် ကျွမ်းကျင်သူများ၏ ခန့်မှန်းချက်
‘Opta Supercomputer Data ခန့်မှန်းချက်’
စူပါကွန်ပျူတာရဲ့ ပွဲကြို Simulation ဒေတာတွေအရ နှစ်သင်းလုံး လူစုံထွက်လာမယ့် အခြေအနေမှာ နိုင်ခြေ ရာခိုင်နှုန်းက အောက်ပါအတိုင်း ထွက်ပေါ်ထားပါတယ်။
ပြင်သစ် နိုင်ခြေ – ၅၈ ရာခိုင်နှုန်း
မော်ရိုကို နိုင်ခြေ – ၁၈ ရာခိုင်နှုန်း
မိနစ် ၉၀ အတွင်း သရေကျနိုင်ခြေ – ၂၄ ရာခိုင်နှုန်း
‘ကျွမ်းကျင်သူတွေရဲ့ သုံးသပ်ချက်’
ဗျူဟာအကျပ်အတည်းပိုင်းကိုကြည့်ရမယ်ဆိုရင် မော်ရိုကိုဟာ ပါရာဂွေးထက် တိုက်စစ်ကောင်တာ ပိုထက်မြက်တာကြောင့် ပြင်သစ်နောက်တန်း တက်ကစားရင် ဟာကီမီနဲ့ ဘရာဟင်ဒီယက်ဇ်တို့ရဲ့ လျှောက်လမ်းဖြစ်သွားနိုင်တယ်ဆိုတာ မမေ့စေချင်ပါဘူး။
Betting Market အခြေအနေအရ ကြေးလိုင်းမှာ ပြင်သစ်က တစ်လုံး စားရမဲ့ ‘တစ်လုံးသေ’ သို့မဟုတ် ‘တစ်လုံးနိုင်’ ကြေးမျိုး ပေါက်နေပြီး ဂိုးပေါင်းလိုင်းမှာတော့ မော်ရိုကိုရဲ့ ခံစစ်ကြောင့် ‘ဂိုးအောက်’ ကို ပိုပြီး အလေးပေး စုပြုံနေကြပါတယ်။
၄။ MPA ရဲ့ ကောက်ချက်နဲ့ အနီးစပ်ဆုံး ရလဒ်ခန့်မှန်းချက်
ဒေတာအချက်တွေနဲ့ ကျွမ်းကျင်သူတွေရဲ့ ခန့်မှန်းချက်တွေအပေါ်မူတည်လို့ နောက်ဆုံးအနေနဲ့ ဒီပွဲအတွက် MPA ရဲ့ ကောက်ချက်ကို ချပေးရမယ်ဆိုရင် ဒဏ်ရာကင်းစင်ပြီး လူစုံထွက်လာမယ့် ဒီပွဲမှာ မော်ရိုကိုဟာ ၂၀၂၂ က အမှားမျိုး ထပ်မခံဘဲ ပြင်သစ်ကို မိနစ် ၉၀ လုံး အသက်ရှူရကြပ်အောင် ပိတ်ဆို့ကစားပါလိမ့်မယ်။ အမ်ဘာပေကို ဟာကီမီက ညာနောက်ခံလူနေရာကနေ သေသေချာချာ ထိန်းချုပ်ဖို့ ကြိုးစားမှာဖြစ်လို့ ပွဲက အလွန်ကျဉ်းမြောင်းပြီး ဂိုးရဖို့ခက်တဲ့ ပွဲမျိုး ဖြစ်လာမှာပါ။
ဒါပေမဲ့ ပြင်သစ်ရဲ့ အရန်ခုံ(လူစားလဲမှုအပိုင်း) အင်အားတောင့်တင်းတာနဲ့ အဓိကပွဲကြီးပွဲကောင်းတွေမှာ ဒက်ရွှမ့်ရဲ့ ရင့်ကျက်တဲ့ ဆုံးဖြတ်ချက်တွေကြောင့် မိနစ် ၉၀ နောက်ဆုံးပိုင်း သို့မဟုတ် အချိန်ပို ရောက်မှသာ ပြင်သစ်တို့ ကပ်ပြီး အနိုင်ဂိုး ရှာဖွေသွားနိုင်ပါလိမ့်မယ်။ ပြင်သစ်အနေနဲ့ ပင်နယ်တီအထိ အရောက်ခံဖွယ်မရှိပါဘူး။
ခန့်မှန်းချက် – ဂိုးအောက် ပွဲစဉ် ဖြစ်ဖို့ ရာခိုင်နှုန်း အလွန်မြင့်မားပါတယ်။
အနီးစပ်ဆုံး ရလဒ်ခန့်မှန်းချက် – မိနစ် ၉၀ အတွင်း ပြင်သစ် ၁ – ၀ မော်ရိုကို (သို့မဟုတ် ၀ – ၀ သရေကျပြီး အချိန်ပိုတွင် ပြင်သစ် ကပ်နိုင်သွားပါလိမ့်မယ်။