အပစ်အခတ်ရပ်စဲရေးကို ချိုးဖောက်ပြီးနောက် ပါကစ္စတန်၏ လေကြောင်းတိုက်ခိုက်မှုများကြောင့် အာဖဂန်လူမျိုး ၁၀ ဦး ထက်မနည်း သေဆုံးခဲ့ပြီးနောက် ပါကစ္စတန်နှင့် အာဖဂန်နစ္စတန်တို့သည် ကာတာနိုင်ငံ၊ ဒိုဟာမြို့၌ ပြုလုပ်သည့် ဆွေးနွေးပွဲများတွင် ချက်ချင်း အပစ်အခတ်ရပ်စဲရန် သဘောတူညီခဲ့ကြသည်ဟု ကာတာနိုင်ငံက အောက်တိုဘာ ၁၉ ရက်တွင် ထုတ်ပြန်ကြေညာလိုက်သည်။
တောင်အာရှ အိမ်နီးချင်းနိုင်ငံနှစ်နိုင်ငံအကြား တစ်ပတ်ကျော်ကြာအောင် နယ်စပ် တိုက်ပွဲများဖြစ်ပွားခဲ့ကြရာ ၂၀၂၁ ခုနှစ်တွင် တာလီဘန်အစိုးရ ပြန်လည်ရောက်ရှိလာပြီးနောက်ပိုင်း ၎င်းတို့၏ အဆိုးရွားဆုံး ပဋိပက္ခဖြစ်သည်။
၄၈ နာရီကြာ အပစ်အခတ်ရပ်စဲရေးသဘောတူညီခဲ့ကြသော်လည်း အောက်တိုဘာ ၁၇ ရက်တွင် ဖြစ်ပွားခဲ့သည့် လေကြောင်း တိုက်ခိုက်မှုကြောင့် အရပ်သားများ သေဆုံးခဲ့သည်။
ကာတာနိုင်ငံ၊ ဒိုဟာမြို့တွင် ငြိမ်းချမ်းရေး ဆွေးနွေးပွဲများအပြီးတွင် ကာတာနိုင်ငံခြားရေးဝန်ကြီးဌာနက “နှစ်ဖက်စလုံးသည် ချက်ချင်း အပစ်အခတ်ရပ်စဲရန်နှင့် နိုင်ငံနှစ်ခုအကြား ရေရှည်ငြိမ်းချမ်းရေးနှင့် တည်ငြိမ်ရေးကို ခိုင်မာအောင် လုပ်ဆောင်မည့် စနစ်များကို ထူထောင်ရန် သဘောတူညီခဲ့ကြသည်” ဟု ပြောကြားခဲ့သည်။
ပါကစ္စတန် ကာကွယ်ရေးဝန်ကြီး ခါဝါဂျာ အဆစ်ဖ်က အပစ်အခတ်ရပ်စဲရေး သဘောတူညီချက် ရရှိခဲ့ကြောင်း အတည်ပြုခဲ့ပြီး နှစ်ဖက်စလုံးသည် အောက်တိုဘာ ၂၅ ရက်နေ့တွင် အစ္စတန်ဘူလ်၌ ထပ်မံတွေ့ဆုံကြမည်ဟု ဆိုသည်။
“အာဖဂန်နစ္စတန်ကနေ စတင်တဲ့ ပါကစ္စတန်မြေပေါ်က အကြမ်းဖက်မှုတွေ ချက်ချင်း ရပ်တန့်သွားပါလိမ့်မယ်။ အိမ်နီးချင်းနှစ်နိုင်ငံလုံးက တစ်ဦးချင်းစီရဲ့ အချုပ်အခြာအာဏာကို လေးစားကြမှာပါ” ဟု အဆစ်ဖ်က လူမှုမီဒီယာတွင် ရေးသားခဲ့သည်။
အာဖဂန် ကာကွယ်ရေးဝန်ကြီး မိုဟာမက် ရာကွတ်ဘ်က နှစ်ဖက်စလုံးသည် “တစ်နိုင်ငံချင်းစီက တစ်နိုင်ငံကို လေးစားရန် သဘောတူညီခဲ့ကြသည်” ဟု ပြောကြားခဲ့သည်။
“တစ်ဖက်ရဲ့ အခွင့်အရေးကို ချိုးဖောက်မှာ မဟုတ်ဘူး၊ တစ်ဖက်ကို ဆန့်ကျင်တဲ့ ရန်လိုတဲ့ လုပ်ရပ်တွေကို ထောက်ခံမှာ မဟုတ်ဘူး၊ ဘယ်ပါတီ၊ ဘယ်အဖွဲ့ကိုမှ တစ်ဖက်နိုင်ငံရဲ့ လုံခြုံရေးကို ထိခိုက်စေဖို့ ဒါမှမဟုတ် တိုက်ခိုက်ဖို့ ခွင့်ပြုမှာ မဟုတ်ဘူး” ဟု ၎င်းက ဆိုသည်။
တောင်အာရှရေးရာလေ့လာသုံးသပ်သူ မိုက်ကယ် ကူဂယ်လ်မန်းက “တာလီဘန်တွေဟာ သူတို့ထက် အဆမတန် သာလွန်တဲ့ စစ်ရေးအင်အားနဲ့ ရင်ဆိုင်ရမယ့် စစ်ပွဲတစ်ခုလုံးကို စိတ်မဝင်စားဘူး” ဟု ပြောကြားခဲ့သည်။
“ဒါက သူတို့ကို ရေရှည် အပစ်အခတ်ရပ်စဲရေး သဘောတူညီဖို့အတွက် ခိုင်မာတဲ့ လှုံ့ဆော်မှုတစ်ခု ပေးပါတယ်” ဟု ၎င်းက AFP သို့ ပြောကြားခဲ့သော်လည်း ပဋိပက္ခပိုမိုပြင်းထန်လာမည့် အန္တရာယ်များမှာ “မြင့်မားနေဆဲ” ဖြစ်ကြောင်း သတိပေးခဲ့သည်။
ပါကစ္စတန်က Tehreek-e-Taliban Pakistan (TTP) အပါအဝင် ရန်လိုသောအဖွဲ့များသည် အာဖဂန်နစ္စတန်ရှိ “ခိုလှုံရာနေရာများ” မှ လှုပ်ရှားနေသည်ဟု စွပ်စွဲသော်လည်း တာလီဘန်အစိုးရက ထိုစွပ်စွဲချက်ကို ငြင်းဆိုလေ့ရှိသည်။