Daily Finland
အီရန်တော်လှန်ရေးအစောင့်တပ် (IRGC) က ၎င်းတို့၏ လေကြောင်းကာကွယ်ရေးစနစ်သည် အီရန်တောင်ပိုင်း ဝေဟင်ပိုင်နက်အတွင်း ကျူးကျော်ဝင်ရောက်လာသော အမေရိကန်၏ F-16 Fighting Falcon တိုက်လေယာဉ်တစ်စင်းနှင့် MQ-9 Reaper ဒရုန်းတစ်စင်းကို ပစ်ချနိုင်ခဲ့ကြောင်း စနေနေ့ (မတ်လ ၂၈ ရက်) တွင် ထုတ်ပြန်ကြေညာခဲ့သည်။
အဆိုပါ ထုတ်ပြန်ချက်တွင် အမေရိကန် တိုက်လေယာဉ်နှင့် ဒရုန်းတို့မှာ အီရန်ရေတပ်နှင့် လေကြောင်းရန်ကာကွယ်ရေးတပ်ဖွဲ့တို့၏ ပူးပေါင်းတုံ့ပြန်စစ်ဆင်ရေးအတွင်း ထိမှန်ပျက်စီးခဲ့ခြင်းဖြစ်ကြောင်း ဖော်ပြထားသည်။
ဤစစ်ဆင်ရေးသည် အမေရိကန်နှင့် အစ္စရေးတို့၏ စက်မှုလုပ်ငန်းများကို ပစ်မှတ်ထားသည့် တန်ပြန်တိုက်ခိုက်မှုတစ်ခုဖြစ်ကြောင်းလည်း အီရန်ဘက်က ဆိုသည်။
သို့သော်လည်း အမေရိကန်ဗဟိုစစ်ဌာနချုပ် (CENTCOM) ကမူ အီရန်၏ ပြောကြားချက်မှာ အခြေအမြစ်မရှိကြောင်း ချက်ချင်းတုံ့ပြန်ငြင်းဆိုခဲ့ပြီး CENTCOM ၏ လူမှုကွန်ရက်စာမျက်နှာတွင် ဖော်ပြချက်အရ ၎င်းတို့၏ F-16 တိုက်လေယာဉ်မှာ စစ်ဆင်ရေးတာဝန်များကို ထမ်းဆောင်ပြီးနောက် အရှေ့အလယ်ပိုင်းရှိ အခြေစိုက်စခန်းတစ်ခုသို့ ဘေးကင်းစွာ ပြန်လည်ဆင်းသက်နိုင်ခဲ့ကြောင်း သိရသည်။
CENTCOM က အဆိုပါ တိုက်လေယာဉ် စခန်းသို့ ပြန်လည်ရောက်ရှိလာသည့် ဓာတ်ပုံကိုပါ ပူးတွဲဖော်ပြခဲ့ပြီး အီရန်ဘက်က ဝါဒဖြန့်ချိနေခြင်းသာဖြစ်ကြောင်း တုံ့ပြန်ခဲ့သည်။
ဤဖြစ်ရပ်သည် ဖေဖော်ဝါရီ ၂၈ ရက်မှစတင်ကာ အမေရိကန်-အစ္စရေး ပူးပေါင်းတပ်ဖွဲ့များနှင့် အီရန်တို့ကြား တိုက်ရိုက်စစ်ရေးပဋိပက္ခများ ဖြစ်ပွားနေစဉ်အတွင်း ထွက်ပေါ်လာသည့် လေကြောင်းစစ်ပွဲဆိုင်ရာ အငြင်းပွားမှုတစ်ခု ဖြစ်သည်။
လက်ရှိတွင် အရှေ့အလယ်ပိုင်းဒေသ၌ စစ်ရေးတင်းမာမှုများ အရှိန်မြင့်တက်နေပြီး အမေရိကန်ကလည်း ၎င်း၏ စစ်အင်အားကို တိုးမြှင့်ချထားလျက်ရှိသည်။
အထူးသဖြင့် အီရန်၏ အဓိကရေနံတင်ပို့ရာ ခါ့ဂ်ကျွန်းနှင့် အနီးဆုံးနေရာများတွင် အမေရိကန်တပ်ဖွဲ့ဝင်များ ဖြန့်ကြက်ထားခြင်းကြောင့် နှစ်ဖက်စစ်ရေးဆိုင်ရာ ထိတွေ့မှုများမှာ ပိုမိုစိုးရိမ်စရာ ဖြစ်လာနေသည်။